Read koho Broă 22 Bible Online

Broă 22 - koho bible

Broă 22

¹“Ơ ală bèp, ală bi, dan iat jơnau tò să añ jê di đap ală ồng.”

²Dơ̆ ală bol hơ̆ kơno khai đơs jơnau Hebrơ gen ơm mŏ mŏ rlau tai. Gen Pol đơs pơnjat:

³“Añ la cau Juda, deh tòm Tarsơ kơnhwàl Silisi, mơya añ geh ròng siam tòm ƀòn dờng Jerusalem, la cau bơtê Gamaliel dê, jat dô bă kràñ cê bơta boh lam ồng pàng bol he dê, mơ gơs nùs ngac ngar gơwèt hơ Yàng Tom Trồ, kung be jơh ală ồng tòm ngai do sơl.

⁴Añ neh kup kơryan Gùng Duh Khoai do jơl chơt, kup cap mơ cèng jàm ò kòp cau ùr hala cau klau.

⁵Ală cau gơnoar dờng lam bồ ơn phan duh khoai mơ jơh mpồl cau kwang tơrña rgơi lơh cơng la añ đơs jơnau song. Añ kung dòp ală sră bơh tê bol khai pơyoa ală oh mi in ơm tòm Damas mơ añ neh lòt tus tềng hơ̆ nàng cap ală cau jat Gùng Duh Khoai do cèng bol khai rê hơ Jerusalem tồ lơh glài jàm.”

⁶“Tòm tŭ añ lòt rò gùng, mòr tus hơ Damas, di digùl ngai, nisơna gơs bơta àng dờng bơh đang trồ sòl gơcrà gùt dar añ.

⁷Añ gơplơ̆ tòm ù mơ kơno jơnau đơs mơ añ lah: ‘Ơ Sol, Sol, ñchi bơh tài mê kup kơryan Añ taih?’

⁸Añ ho lah: ‘Ơ Yàng, Kơnràñ la ñcau?’ Yàng ho lah: ‘Añ la Jesu Cau Nasaret mơ mê kup kơryan.’

⁹Ală cau lòt bal mơ añ gŏ bơta àng dờng hơ̆, mơya bol khai ò kơno jơnau Bơtau đơs mơ añ.

¹⁰Añ lùp lah: ‘Ơ Yàng, mbe añ kòñ lơh taih?’ Yàng ho lah: ‘Guh tĕ mơ lòt tus hơ Damas, tềng hơ̆ cau rơp yal mê in git jơh ală bơta Añ neh lơh nền mê in pal lơh.’

¹¹Tài bơh bơta àng gơcrà hơ̆ gen añ jơngo mat, gơs ală cau lòt bal mơ añ at tê añ lam tus hơ Damas.

¹²Tòm ƀòn dờng hơ̆ gơs dô nă cau sơnđan la Anania, la cau duh rngòt prap gàr bơta boh lam, geh jơh ală cau Juda ơm tòm Damas lơh cơng niam bơh khai.

¹³Khai tus ntào di gah añ, mơ đơs lah: ‘Ơ bi Sol, àng tĕ wơl mat.’ Gen tòm jơ hơ̆ mo mat añ gơs àng mơ sền di Anania.

¹⁴Khai đơs mơ añ lah: ‘Yàng Tom Trồ ồng pàng bol he dê neh sac rwah bi in git nùs kòñ Kơnràñ dê, gŏ dĭ gơna Song Ring Kơnràñ dê, mơ kơno jơnau đơs bơh di bơr Kơnràñ.

¹⁵Bơh bi rơp lơh gơs cau lơh cơng Kơnràñ in di đap jơh tơl nă cau bơh ală broă bi neh gŏ mơ kơno.

¹⁶Tŭ do, ñchi bơh tài bi gam gơn tai taih? Ntào tĕ, gơs ƀaptem mơ hòi dan tồ tồi glài bi geh rào goh.’”

¹⁷“Añ rê wơl hơ Jerusalem, tòm tŭ añ ơm hòi dan tòm hìu duh khoai gen añ gŏ bơta gơtơnggŏ,

¹⁸añ gŏ Yàng Jesu đơs mơ añ lah: ‘Ntào tĕ sơrbac sơrbang, lik mhar bơh Jerusalem, tài bơh bol khai ò bài dòp jơnau lơh cơng mê dê bơh Añ ò.’

¹⁹Añ ho lah: ‘Ơ Yàng, să tòm bol khai git añ neh kup jàm ală cau dòn Yàng mơ pù lơh bol khai tòm ală hìu jum cau Juda sơl.

²⁰Mơ tai, tòm tŭ Etien la cau lơh cơng Yàng dê neh kong chơt, añ kung ơm tềng hơ̆, dô nùs bal mơ kơp ồi ào ală cau tơnchơt khai.’

²¹Yàng đơs mơ añ lah: ‘Lòt tĕ, bơh añ rơp sồr mê lòt tus hơ ală làng bol bơdìh tòm tiah ngài.’”

²²Bol khai iat Pol tus di jơnau hơ̆, gen hòi driau lah: “Tơnroh tĕ cau be do bơh di plai ù! Khai ò di pal kis tai!”

²³Bol khai hòi driau, hồ ào bơtồ hơđang mơ sih thul tòm pah gòi.

²⁴Cau kwang ling sồr cau cèng Pol tơmut tòm đồn ling, pù khào khai tồ git ñchi bơh tài bol khai hòi driau sò tơm di khai behơ̆.

²⁵Bol hơ̆ cap khai nàng pù, gen Pol đơs mơ cau at dô rhiang ling ơm ntào tềng hơ̆ lah: “Ală ồng geh gơnoar pù dô nă cau làng tòm Rôma dê bulah òhềt lơh nền glài cau hơ̆ ơ?”

²⁶Dơ̆ kơno ală jơnau hơ̆, gen cau at dô rhiang ling lòt yal mơ cau kwang ling lah: “Ñchi ồng mong lơh taih, bơh cau do la làng bol Rôma dê.”

²⁷Behơ̆ kwang ling lòt lùp Pol lah: “Yal tĕ añ in git, mê ngan la cau làng tòm Rôma dê sơl?” Khai ho lah: “Ngan.”

²⁸Cau kwang ling đơs tai lah: “Añ neh rwat gơnoar làng hơ̆ dê kas ngan.” Pol đơs lah: “Ai añ gen neh geh gơnoar hơ̆ bơh tòm tŭ deh.”

²⁹Tŭ hơ̆ mo ală cau mong pù khào khai ruc pleh jơh, mơ dơ̆ cau kwang ling git lah cau khai neh sồr cap la cau làng tòm Rôma dê gen kung rngòt sơl.

³⁰Ngai tơnơ̆, cau kwang ling kòñ git nền ñchi bơh tài Pol kòl cau Juda yă, gen sồr hồ che cap khai in, mơ sồr hòi ală cau gơnoar lam bồ ơn phan duh khoai, mơ jơh ală cau tòm Mpồl Kwang Tơrña pơjum bal, lồc behơ̆ lam Pol lik ntào di đap bol khai.