Read koho Broă 23 Bible Online

Broă 23 - koho bible

Broă 23

¹Pol sền di Mpồl Kwang Tơrña mơ đơs lah: “Ơ ală oh mi, di đap Yàng Tom Trồ añ neh kis bơh nùs tồr niam mơ song ngan jơl tus di ngai do.”

²Tŭ hơ̆, cau gơnoar dờng lam bồ ơn phan duh khoai la Anania sồr ală cau ntào di gah Pol pah di bơr khai.

³Pol đơs lah: “Ơ dơrñang hìu kli bò ne, Yàng Tom Trồ rơp lơh ồng; ồng nggui cahrña añ jat bơta boh lam mơ lơh tìs bơta boh lam sồr bol khai lơh añ?”

⁴Ală cau ntào di gah đơs lah: “Mê lah sơrpah cau gơnoar dờng lam bồ ơn phan duh khoai Yàng Tom Trồ dê behơ̆ ơ?”

⁵Pol ho lah: “Ơ oh mi, añ ò git khai la cau gơnoar dờng lam bồ ơn phan duh khoai ò, bơh neh cih lah: ‘Bañ đơs iơh di cau kwang at bồ làng bol he.’”

⁶Dơ̆ Pol đal git tòm Mpồl Kwang Tơrña gơs dô êt nă la cau Saduse, dô êt nă tai la cau Pharisi, gen hòi driau lah: “Ơ oh mi, añ la cau Pharisi, la kòn cau Pharisi dê. Hơ̆ la tài bơh bơta gơn kơnòm bơh bơta kis wơl ală cau chơt dê tàng añ kong cahrña do.”

⁷Khai jơh đơs behơ̆, gen gơlik bơta tòm pơndang bal digùl cau Pharisi mơ cau Saduse, mơ mpồl jơnum tòmcah is.

⁸Bơh cau Saduse đơs lah ò gơs bơta kis wơl mơ kung ò gơs cau gơnrơh hala hwềng lơi, ai cau Pharisi gen dòn dòp jơh ală bơta hơ̆.

⁹Behơ̆ gen, jơnau tòm pơndang gơ nggồr ur. Gơs bàr pe nă cau bơto bơta boh lam đah cau Pharisi dê ntào tòm pơndang lah: “Bol hi ò gŏ bơta lơi iơh tòm cau do ò. Digơlan gơs hwềng hala cau gơnrơh neh đơs mơ khai!”

¹⁰Tài bơh bơta tòm pơndang sơlo iơh rlau tai, cau kwang ling rngòt mpồl làng bol crè poac Pol dê, gen tàng sồr cau ling mù hwài tơlik khai bơh digùl bol hơ̆, mơ cèng wơl khai tòm đồn ling.

¹¹Tòm mang hơ̆ Yàng tơlik să mơ Pol mơ đơs lah: “Kơ̆ tĕ nùs, mê neh lơh cơng bơh Añ tòm Jerusalem be lơi, gen mê kung pal lơh cơng bơh Añ tòm Rôma behơ̆ sơl.”

¹²Tus diàng, cau Juda dô nùs bal bơtào kai gơrmơ̆i. Bol khai srat să lah rơp ò sào ò hùc jơl tus di tŭ neh tơnchơt Pol.

¹³Neh gơs rlau poan jơt nă cau bơtào kai gơrmơ̆i do.

¹⁴Bol khai lòt tus hơ ală cau gơnoar lam bồ ơn phan duh khoai mơ ală cau kwang kra mơ đơs lah: “Bol hi srat să bal lah ò sào sa jơl tus di tŭ geh tơnchơt Pol.

¹⁵Behơ̆ tŭ do, ală ồng bal mơ Mpồl Kwang Tơrña dan tĕ mơ cau kwang ling cèng Pol mù tus hơ ală ồng, lơh be kòñ sơwì lùp bơh broă khai dê dô bă nền cê rlau tai, ai bol hi gen rcang sir kơp nàng tơnchơt khai lài mơ tŭ òhềt tus tềng do.”

¹⁶Mơya gơs kòn klau lŏ ùr Pol dê kơno bơh kai gơrmơ̆i bol khai dê nàng tơnchơt Pol, gen khai lòt tòm đồn ling, mut yal Pol in git.

¹⁷Gen Pol hòi dô nă cau at dô rhiang ling, mơ đơs lah: “Cèng tĕ oh pơnu do lòt tus hơ cau kwang ling, khai gơs jơnau kòñ yal mơ ồng hơ̆.”

¹⁸Behơ̆ cau at dô rhiang ling cèng oh hơ̆ lòt tus hơ cau kwang ling mơ đơs lah: “Cau ơm jàm sơnđan la Pol hòi añ sồr cèng oh pơnu do lòt tus hơ ồng, khai gơs jơnau kòñ yal mơ ồng.”

¹⁹Cau kwang ling at dê tê oh pơnu hơ̆, cèng is dô nă khai mơ lùp lah: “Ñchi jơnau mê kòñ yal mơ añ taih?”

²⁰Khai ho lah: “Cau Juda neh dô nùs bal dan mơ ồng tòm ngai hìng cèng Pol mù tus di đap Mpồl Kwang Tơrña, lơh be kòñ sơwì lùp khai dô bă nền cê rlau tai.

²¹Mơya dan ồng bañ lơh jat ală bol hơ̆, bơh neh gơs rlau poan jơt nă cau tòm mpồl bol hơ̆ ơm pồn mơ kơp khai; bol khai neh srat să bal lah ò sào ò hùc jơl tus di tŭ geh tơnchơt khai sồng lòi; tòm tŭ do bol hơ̆ neh rcang sir rau, gam mìng gơn ồng dòp jơnau bol khai dê lơm.”

²²Cau kwang ling sồr oh pơnu hơ̆ rê mơ bơkơ̆u lah: “Bañ yal cau in git bơh jơnau mê neh yal mơ añ yơ.”

²³Cau kwang ling hòi bàr nă cau at dô rhiang ling mơ nting lah: “Tòm sin jơ mang do, rcang tĕ bàr rhiang ling lòt jơng, poh jơt ling hào ơseh mơ bàr rhiang ling at tà nàng lòt hơ Sesare.

²⁴Mơ kung rcang tĕ ơseh nàng Pol in hào tồ jun khai lòt gùng lơngap lơngai tus hơ Phelis la cau kwang đơng lơgar.”

²⁵Mơ khai cih dô pang sră pơyoa be tơnơ̆ do:

²⁶“Claudius Lisia pơyoa jơnau còp să Phelis la cau kwang đơng lơgar ryŭ ryơm ngan.

²⁷Làng bol Juda neh kup cau do, mong tơnchơt khai, gen tàng añ cèng cau ling lòt tus nàng dong tă khai, tài bơh añ git lah khai la cau làng tòm Rôma dê.

²⁸Añ kòñ git loh ñchi bơh tài bol hơ̆ yă khai, gen tàng añ cèng khai tus di đap Mpồl Kwang Tơrña.

²⁹Añ gŏ khai kong yă wơn mìng bơh jơnau tòm pơndang bơh bơta boh lam bol khai dê lơm, mơya ò di bơh glài lơi pal chơt hala pal kong jàm.

³⁰Mơya cau yal añ in git lah gơs cau bơyai bơtào kai gơrmơ̆i nàng tơnchơt khai, gen tàng añ pơyoa khai mo hơ ồng mơ añ kung sồr ală cau yă khai lah pal lòt tus di đap ồng nàng tòmyă. Ơm ngac yơ.”

³¹Behơ̆ ală cau ling lơh jat be gơnoar sồr, mơ tòm trồ mang cèng Pol lòt tus hơ Antipatris.

³²Ngai tơnơ̆, ală cau ling hào ơseh lòt jun Pol, ai mpồl ling lòt jơng gen rê wơl tòm đồn.

³³Tòm tŭ tus hơ Sesare, gen bol khai tong sră pơyoa cau kwang đơng lơgar in, mơ kung tơlik Pol sơnio khai in sơl.

³⁴Neh sir cau kwang đơng lơgar sền sră pơyoa rau, gen lùp Pol la cau bơh kơnhwàl lơi. Tòm tŭ neh git khai la cau Silisi,

³⁵gen đơs lah: “Tŭ lơi ală cau yă mê lòt tus añ rơp iat broă mê dê.” Gen khai sồr cau tơmut Pol tòm gơlang Herôt dê.