Read koho Broă 24 Bible Online

Broă 24 - koho bible

Broă 24

¹Pram ngai tơnơ̆, gơs cau gơnoar dờng lam bồ ơn phan duh khoai la Anania mù hơ Sesare, bal mơ bàr pe nă cau kwang kra mơ dô nă cau git jak bơta boh lam sơnđan la Tertulus, nàng yă Pol di đap cau kwang đơng lơgar.

²Tòm tŭ Pol geh hòi lòt tus rau, gen Tertulus rơp sơntòm yă khai be do:

³“Ơ kwang đơng Phelik ryŭ ryơm ngan, kơnòm di ồng gen tàng bol hi dòp geh bơta ring lơngai wil tơl, mơ kơnòm dê bơta jak chài ồng dê gen geh oă bơta gơtòmgơl tòm làng bol do, tŭ lơi mơ tiah lơi bol hi kung dòp geh bơta nđàc ồng dê mơ jơh nùs ưnngài ồng sơl.

⁴Mơya nàng añ ò pơnjê ồng tai, gen añ dan ồng ai nùs ơt ơl mơ iat tòm bàr pe jơnau bol hi đơs bơh cau do.

⁵Ngan behơ̆, bol hi neh gŏ cau do jak tơnggơs bơta iơh, neh lơh gơlik sơlồng sơlàng digùl jơh ală cau Juda tòm làm dunnia, mơ khai la cau lam bồ mpồl cau Nasaret.

⁶Khai kung neh lơh ƀơ̆ ƀơl hìu duh khoai sơl, behơ̆ tàng bol hi neh kup khai mơ kòñ cahrña di khai jat bơta boh lam bol hi dê. [

⁷Mơya nisơna gơs cau kwang at bồ mpồl ling la Lisia lòt tus ai gơnoar pràn tă tơlik khai bơh di tê bol hi.]

⁸Dan să tòm ồng lùp khai, gen rgơi git loh ală broă bol hi yă khai do.”

⁹Ală cau Juda kung pơnjat tơn be jơnau yă hơ̆, mơ đơs nền la ngan behơ̆.

¹⁰Tòm tŭ cau kwang đơng lơgar lơh tềl sồr Pol đơs, gen khai đơs lah: “Añ git ồng la cau kwang cahrña tòm làng bol do neh jŏ nam rau, gen tàng añ chò hòp nàng đơs jơnau tò să añ jê.

¹¹Be ồng neh git lah añ neh guh hơ Jerusalem nàng duh khoai ò rlau mơ jơt bàr ngai do nàng duh khoai Yàng.

¹²Cau ò gŏ añ pơndang bal mơ cau lơi hala chồl bơchồt mpồl làng bol lơh sơlồng sơlàng hala tòm hìu cau Juda hala tiah ndai tòm ƀòn dờng.

¹³Tŭ do, bol khai kung ò rgơi ai cơng tàng lơi bơh bơta bol khai yă, tòmdră mơ añ di đap ồng.

¹⁴Mơya di đap ồng añ yal song lah añ jat Gùng Duh Khoai Yàng Tom Trồ ồng pàng bol hi dê, jat gùng duh khoai hơ̆ mơ bol khai sơnđan la tìs. Mơ añ kung dòn jơh ală bơta cih tòm sră bơta boh lam Môise bal mơ ală sră cau gơnoar hwơr dê.

¹⁵Añ gơs bơta gơn kơnòm di Yàng Tom Trồ kung be bol khai gơs sơl, hơ̆ la rơp gơs bơta kis wơl cau song ring mơ cau ò song ring dê.

¹⁶Behơ̆ tàng añ kư̆ jơh nùs rcang sùm, nùs tồr sàng goh di đap Yàng Tom Trồ mơ di đap cau sơl.

¹⁷Tơnơ̆ mơ tŭ oă nam ơm ngài bơh Jerusalem, añ rê wơl tềng hơ̆ cèng priă làng bol añ in, mơ ơn phan duh khoai.

¹⁸Bol khai gŏ añ tòm tŭ neh lơh sir bơta rào goh tòm hìu duh khoai, añ ò pơjum tơrgòm mpồl làng bol hala ò lơh sơlồng sơlàng.

¹⁹Mơya gơs ală cau Juda tus bơh kơnhwàl Asia, dilah bol khai gơs jơnau lơi kòñ yă añ gen pal lòt tus di đap ồng mơ yă.

²⁰Hala să tòm ală cau ơm tềng do, yal tơlik tĕ bơta lơi tìs mơ bol khai neh gŏ añ lơh tòm tŭ añ ơm ntào di đap Mpồl Kwang Tơrña,

²¹dilah gơs gen mìng dô sèng añ hòi driau tòm tŭ ntào di đap bol khai lah: ‘Hơ̆ la tài bơh bơta kis wơl cau chơt dê tàng ngai do añ kong cahrña di đap ală ồng.’”

²²Phelik neh git loh làng bơh Gùng Duh Khoai hơ̆, gen tàng lòi wơl jơnau yă hơ̆ mơ đơs lah: “Tŭ lơi cau kwang at bồ mpồl ling la Lisia mù hơ do, gen añ rơp sơwì nền broă bol mê dê.”

²³Cau kwang đơng lơgar sồr cau at dô rhiang ling sền gàr Pol, mơya kung lòi khai in geh khat gơboh dô êt sơl, bañ bơkơ̆u oh mi bơyô lơi khai dê lòt tus cèng phan ngui sa khai in.

²⁴Tơnơ̆ mơ hơ̆ bàr pe ngai Phelik lòt tus bal mơ bau ùr khai la Drusilla, cau Juda; lồc behơ̆ sồr cau lòt hòi Pol mơ kòñ iat khai đơs bơh bơta dòn di Yàng Krist Jesu.

²⁵Mơya tòm tŭ Pol bơto bơyai bơh bơta song ring, bơta git kơrhia mơ bơta cahrña rài tơnơ̆, gen Phelik rơm să rngòt, mơ đơs lah: “Tŭ do mê lòi ing, gơn tŭ lơi añ ru gen añ rơp hòi wơl mê.”

²⁶Phelis kung kơp kòñ Pol ai priă loă khai, gen tàng hòi Pol sùm mơ tòmbơhbơr mơ khai.

²⁷Bàr nam tơnơ̆, Porsius Phestus pơrdòn ala Phelik lơh kwang đơng lơgar. Tài bơh Phelik kòñ lơh niam nùs làng bol Juda gen tàng kư̆ jàm Pol.