Read koho Broă 27 Bible Online

Broă 27 - koho bible

Broă 27

¹Tòm tŭ neh lơh nền lah bol hi pal lòt mơ ơhò nàng tiă hơ lơgar Itali, bol hơ̆ jào Pol bal mơ bàr pe nă cau ơm jàm ndai tòm tê dô nă cau at dô rhiang ling, sơnđan la Julius, bal mơ mpồl ling Ôgustơ.

²Bol hi hào ơhò tus bơh Adramit rơp lòt rò gah dàlềng Asia dê, gen bol hi lòt. Aristak cau Masedoan, ƀòn tòm khai la Tesalônika, lòt bal mơ bol hi sơl.

³Ngai tơnơ̆, bol hi lòt tus hơ Sidôn, gen Julius gơwèt niam mơ Pol, ai khai in gơnoar lòt còp oh mi khai, mơ lòi bol khai dong kòl Pol.

⁴Bơh tềng hơ̆ bol hi hào ơhò lòt jat rò gah bồt pơlào Ciprus tài bơh tŭ hơ̆ càl khồm sơlơ̆u.

⁵Tơnơ̆ mơ tŭ neh tiă rlau đah ne dàlềng Silisi mơ Pamphili, gen bol hi lòt tus hơ Mira tòm kơnhwàl Lisia.

⁶Tềng hơ̆ cau at dô rhiang ling gŏ gơs dô nơm ơhò bơh Aleksandria rơp tiă lòt hơ lơgar Itali, gen sồr bol hi hào ơhò hơ̆.

⁷Ơhò lòt adàr ngan tòm jŏ ngai, kong bòl glar ngan gen sồng tus rềp mơ Kơnit. Tài bơh càl dră, ò rgơi lòt ngài rlau, gen tàng bol hi lòt jat rò gah bồt pơlào Kret, mơ lòt gan Salmôn.

⁸Bol hi kong bòl glar lòt jat rò gah dàlềng hơ̆ rau, gen sồng bol hi lòt tus dô bă tiah sơnđan la Rnơs Niam, rềp ƀòn dờng Lase.

⁹Bol hi neh roh oă ngai rau, gùng ơhò lòt gơlik gơs sơbơng roh ngan, tài bơh ală ngai ơt sa neh rlau rau. Pol bơto pơndòm bol khai,

¹⁰mơ đơs lah: “Ơ ală ồng, añ gŏ bơta tiă dàlềng do la gơ rơp sơbơng roh mơ roh gơcoh dờng ngan, ò di mìng ală phan mơna mơ să ơhò lơm ò, mơya kung tus di bơta kis bol he dê sơl.”

¹¹Mơya cau at dô rhiang ling dòn jơnau cau at ơhò mơ cau tòm ơhò rlau mơ jơnau Pol đơs.

¹²Bơh rnơs hơ̆ ò diơng ơhò in dah tòm kơnhai noat hơ̆, behơ̆ tàng oă cau bơyai lah pal lòi tiah hơ̆ mơ pơnđơl lòt tus hơ Phenis, la rnơs Kret dê, pơnah đah đang mattơngai mut mơ đah đơm mattơngai mut, nàng gơ in dah tòm kơnhai noat tềng hơ̆.

¹³Tòm tŭ gơs dô êt càl đơm sơntòm khồm, bol khai tồnlah rgơi lơh jat be bơta lơh nền lài, gen hwài tơngguh lòs kơlnĕ mơ lòt jat rò gah bồt pơlào Kret.

¹⁴Mơya tòm dô êt jŏ gơs dô ròs càl dờng sơnđan la càl Ơrakilôn bơh hơđang bồt pơlào gơpuh glơm.

¹⁵Ơhò kòl gơpơrdô, ò jai tòmdră mơ pràn càl, gen tàng bol hi lòi tơndò gơ.

¹⁶Tòm tŭ ơhò gơpơrdô rò gah đah đơm dô nơm bồt pơlào dềt sơnđan la Kaôda, mơ bol hi kong bòl glar ngan sồng rgơi đơng plung.

¹⁷Tơnơ̆ mơ tŭ neh hwài tơngguh plung, gen bol khai ngui che kơt pùt ơhò, mơ tài bơh rngòt kòl di tiah thòl bràs Sirtơ dê, gen tơmù bềl yàr, lòi càl in khồm pơrdô dò gơ.

¹⁸Ngai tơnơ̆, rbut kư̆ gam pràn sùm behơ̆ sơl, gen bol khai dòñ jơh ală phan mơna kă bro sơrbì tòm dàlềng.

¹⁹Tus di pe ngai bol khai ai tê tòm dòñ phan ngui tòm ơhò mơ sơrbì tòm dàlềng.

²⁰Tòm jŏ ngai ò gŏ mattơngai, mơ sơmañ kung ò gŏ sơl, mơya rbut dờng gam khồm pràn sùm, tian gơs bol hi roh jơh bơta gơn kơnòm geh dong klàs.

²¹Tài bơh bol khai ò sào neh jŏ rau, behơ̆ Pol ntào digùl mpồl bol hơ̆ mơ đơs lah: “Ơ ală ồng, dilah neh dòn jơnau añ, mơ ò lik lòt bơh bồt pơlào Kret, gen bol he ò gơs kòl tòm bơta roh gơprah mơ roh gơcoh do.

²²Mơ tŭ do añ bơto pơndòm ală ồng kơ̆ tĕ nùs, tòm ală ồng ò gơs dô nă cau lơi roh bơta kis ò, roh mìng dô nơm ơhò lơm.

²³Bơh tòm mang do Yàng Tom Trồ la Bơtau mơ añ gơrê bal mơ duh broă, neh ai cau gơnrơh Kơnràñ dê ntào di gah añ,

²⁴mơ đơs lah: ‘Ơ Pol, bañ rngòt, mê pal lòt tus ntào di đap Sesa, mơ do, Yàng Tom Trồ neh ai mê in jơh ală cau hào ơhò bal mơ mê.’

²⁵Behơ̆, ơ ală ồng, kơ̆ tĕ nùs, bơh añ dòn di Yàng Tom Trồ lah rơp gơlik gơs tòm toh be jơnau Kơnràñ neh đơs mơ añ.

²⁶Mơya bol he rơp gơkòl di dô nơm bồt pơlào lơi hơ̆.”

²⁷Tus di jơt poan mơnang rau mơ bol he kư̆ gam gơđồng pơrdô sùm tòm dàlềng Adriatik, tòm gùl mơnang ală cau lơh broă tòm ơhò tồnlah bol khai rơp tus rềp di dô bă ù lơi.

²⁸Bol hơ̆ đùh che plai rnoas nàng was, gŏ jrô bàr jơt làs; pơgap ngài dô êt tai, đùh tai gen gŏ jơt pram làs jrô.

²⁹Tŭ hơ̆ bol khai rngòt gơ tơm di lŭ, gen bol khai đùh poan nơm lòs kơlnĕ đơng bơh tiang ơhò, mơ kơp gơn mhar àng.

³⁰Mơya bơh ală cau lơh broă tòm ơhò jòi bơta nàng dô lik bơh ơhò mơ đùh plung tòm dàlềng, lơh be lòt đùh lòs kơlnĕ bơh bồ ơhò,

³¹gen Pol đơs mơ cau at dô rhiang ling bal mơ cau ling lah: “Dilah ală cau do ò ơm tòm ơhò, gen ală ồng ò rgơi geh dong klàs.”

³²Gen cau ling siat che sang plung tòm dà.

³³Tòm tŭ trồ mòr àng, Pol bơto pơndòm jơh tơl nă cau sào tĕ, mơ đơs lah: “Ngai do la jơt poan ngai rau mơ ală ồng ơm kơp gơn mơ ơm ơt ò sào sa dô êt lơi.

³⁴Behơ̆, añ bơto pơndòm ală ồng sào tĕ, nàng gàr bơta kis ală ồng dê, mơ ò gơs cau lơi tòm ală ồng rơp roh dô dang che sŏ bơh dê bồ he dê ò.”

³⁵Neh đơs behơ̆ rau, Pol ai piang lă, ntào di đap jơh ală cau mơ ưnngài Yàng Tom Trồ, lồc behơ̆ dơrkă piang lă mơ sa lài.

³⁶Tŭ hơ̆ jơh tơl nă geh kơ̆ nùs mơ kung sa sơl.

³⁷Mơ tai, ntum cau bol hi tòm ơhò la bàr rhiang poh jơt prau nă.

³⁸Neh sa hòm rau gen bol khai sơrbì jơh kòi phe tòm dàlềng tồ nggòc ơhò.

³⁹Jơl diàng, bol khai ò git đal la ù tiah lơi, mơya gŏ dô nơm kwil dà gơs bràs di gah gen lơh nền, lòng dah ơhò tềng hơ̆ sền.

⁴⁰Behơ̆ bol khai siat che sang lòs kơlnĕ tòm dàlềng, mơ hồ che tiang tơrwơl dô dơ̆ lĕ, lì bềl yàr di bồ ơhò mơ jat càl nàng lòt tus di gah ƀòng dà.

⁴¹Mơya ơhò gơ tơm di tiah gơs bràs, gen gơkòl tềng hơ̆; gơtồt bồ ơhò ò rgơi wañ dô êt lơi, ai tiang ơhò gen gơ bơcah tai bơh ryà dàlềng tap pràn kơldang ngan.

⁴²Tŭ hơ̆ cau ling lơh nền tơnchơt jơh ală cau ơm jàm, rngòt gơs cau lơi tòm mpồl bol khai re mơ dô klàs mòn.

⁴³Mơya cau at dô rhiang ling kòñ dong klàs Pol, gen tàng kơryan bol khai lơh jat bơta bơyai hơ̆. Khai sồr cau git re, gen ntruñ tĕ lài tòm dà nàng re guh hơđang ƀòng dà,

⁴⁴mơ sồr ală cau gam wơl tòm ơhò, cau ƀà hào mpàn, cau ƀà tai hào hơđang phan bơcah ơhò dê. Behơ̆ jơh tơl nă geh guh lơngap lơngai hơđang ƀòng dà.