Read koho Broă 5 Bible Online

Broă 5 - koho bible

Broă 5

¹Mơya gơs dô nă cau sơnđan la Anania mơ bau ùr khai la Saphira, tac sre brê khai dê,

²Khai dô nùs mơ bau ùr, prap wơl dô pơnah jền tac sre hơ̆; ai pơnah jền gam, gen cèng ơn di jơng ală cau gơnoar bơto dờng.

³Pier đơs mơ khai lah: “Ơ Anania, ñchi bơh tài mê lòi cà Satan at bồ mê, tian gơs mê neh đơs blac mơ Yàng Hwềng Goh, mơ prap wơl dô pơnah jền mê tac sre hơ̆ taih?

⁴Tòm tŭ òhềt tac sre hơ̆ gen ò di la sre mê dê ò ơ? Tŭ neh tac rau, gen jền tac hơ̆ ò di ơm tòm gơnoar mê dê ò ơ? Ñchi bơh tài mê neh lơh nền jơnau hơ̆ tòm nùs mê dê taih? Jơnau hơ̆ ò di mê đơs blac mơ kòn mơnus, mơya mê đơs blac mơ Yàng Tom Trồ.”

⁵Dơ̆ Anania kơno ală jơnau đơs hơ̆, gen gơplơ̆ chơt; jơh tơl nă cau kơno jơnau hơ̆ gen rngòt oă ngan.

⁶Behơ̆ ală cau pơnu ntào pò ƀồc khai mơ cèng tơp.

⁷Pơgap pe jơ tơnơ̆ mơ hơ̆ gen bau ùr khai tus mơ òhềt git bơh broă pa gơlik hơ̆.

⁸Pier lùp khai lah: “Yal tĕ song mơ añ, ai neh tac sre gơs jền mìng kàr hơ̆, ngan sơl?” Khai đơs lah: “Ơi ngan, gơs jền mìng kàr hơ̆.”

⁹Pier đơs mơ khai lah: “Ñchi bơh tài bol ai dô nùs bal nàng lòng Hwềng Goh Yàng dê behơ̆ taih? Ne, jơng cau lòt tơp bau klau ai neh rê tus di bơr mpồng, bol khai rơp cèng ai sơl.”

¹⁰Tŭ hơ̆ mo khai gơplơ̆ chơt di jơng Pier. Ală cau pơnu mut mơ gŏ khai neh chơt, gen tùng cèng tơp di gah bau klau khai.

¹¹Jơh Hìu Jum Goh, mơ jơh ală cau kơno yal bơh broă hơ̆ kung rngòt rngơt ngan.

¹²Oă bơta krơi tềl is geh lơh gơs digùl làng bol bơh tê ală cau gơnoar bơto dờng. Jơh ală cau dòn dô nùs bal pơjum di mpồng rơng Salômôn.

¹³Ò gơs dô nă cau ndai lơi khin mut bal tòm mpồl bol khai, mơya làng bol gen sền dờng màng ngan di bol khai.

¹⁴Ntum cau dòn Yàng sơlo ngai sơlo gơbơtơl oă tai, cau ùr cau klau gal ngan,

¹⁵tian gơs cau cèng ală cau kòp jê ơn di gùng, tơmbic hơđang cơnòng hala bềl, nàng tòm tŭ Pier lòt gan tềng hơ̆ gen mƀur khai dê kung rgơi jơm hơđang bàr pe nă cau.

¹⁶Mpồl làng bol ơm tòm ală ƀòn dờng gùt dar Jerusalem kung lòt tus, cèng ală cau kòp jê, cau cà lơh, mơ jơh ală cau geh sơmbòi lơm.

¹⁷Tŭ hơ̆ cau gơnoar dờng lam bồ ơn phan duh khoai mơ ală cau jat khai, hơ̆ la bơnòr cau Saduse, ñă ntào bềng nùs ƀoah gơjrañ di cau gơnoar bơto dờng,

¹⁸gen lơh nền kup ală cau gơnoar bơto dờng mơ krơ̆ tòm hìu jàm.

¹⁹Mơya tòm mang hơ̆ gơs dô nă cau gơnrơh Yàng dê pò mpồng hìu jàm tơlik ală cau gơnoar bơto dờng mơ nting lah:

²⁰“Lòt tĕ, mơ ntào tòm hìu duh khoai nàng bơto yal làng bol in jơh ală jơnau bơta kis do dê.”

²¹Ală cau gơnoar bơto dờng kơno ală jơnau hơ̆, gơ rơp rìng àng bol khai mut tòm hìu duh khoai mơ bơto sồr. Ai cau gơnoar dờng lam bồ ơn phan duh khoai mơ ală cau jat khai tus, pơjum Mpồl Kwang Tơrña mơ jơh ală cau kwang kra làng bol Israel dê, sồr cau mut tòm hìu jàm nàng lam ală cau gơnoar bơto dờng lòt tus hơ bol khai.

²²Mơya ală cau ling geh sồr lòt tus hơ hìu jàm, sền ò gŏ tai ală cau gơnoar bơto dờng tềng hơ̆ gen rê yal wơl lah:

²³“Bol hi gŏ hìu jàm til kơ̆ nền ngan, cau ling ơm kơp di bơr mpồng, mơya dơ̆ hi pò gen ò gŏ dô nă cau lơi tòm hơ̆.”

²⁴Cau kwang sền gàr hìu duh khoai mơ ală cau gơnoar lam bồ ơn phan duh khoai kơno behơ̆, gen bol khai kơlôi ñchi bơta neh gơlik gơs mơ ală cau gơnoar bơto dờng.

²⁵Mơya gơs cau tus yal mơ bol khai lah: Iat tĕ “Ne, ală cau mơ ală ồng neh kup jàm, gen tŭ do bol khai ơm tòm hìu duh khoai bơto sồr làng bol!”

²⁶Gen cau kwang sền gàr hìu duh khoai bal mơ ală cau ling geh sồr lòt lam ală cau gơnoar bơto dờng tus, mơ ò khin lơh iơh, bơh rngòt di làng bol cơm lŭ.

²⁷Bol khai lam ală cau gơnoar bơto dờng tus ntào di đap Mpồl Kwang Tơrña. Cau gơnoar dờng lam bồ ơn phan duh khoai khào lùp bol khai lah:

²⁸“Bol hi neh bơkơ̆u nền ngan bol mê bañ ai sơnđan hơ̆ nàng bơto sồr, mơya bol mê lơh Jerusalem in bềng lìu bơta bơto sồr bol mê dê, mơ kòñ lơh bol hi in pal kong bơh bơta chơt cau hơ̆ dê.”

²⁹Pier bal mơ ală cau gơnoar bơto dờng ho wơl lah: “Chan bol hi pal lơh jat jơnau Yàng Tom Trồ dê rlau mơ lơh jat jơnau cau dê.

³⁰Yàng Tom Trồ ồng pàng bol he dê neh lơh Yàng Jesu in kis wơl, la Bơtau mơ ală ồng neh yồng hơđang chi pơng mơ tơnchơt tơn.

³¹Yàng Tom Trồ neh yò tơngguh Kơnràñ hơ̆ hơ đah ma Yàng Tom Trồ, lơh gơs Bơtau mơ Yàng Dong Klàs nàng ai làng bol Israel in tŭ gơjrañ sang glài mơ geh toh glài.

³²Ai bol hi do la cau lơh cơng bơh ală broă hơ̆ bal mơ Yàng Hwềng Goh, mơ Yàng Tom Trồ neh ai cau lơi in lơh jat jơnau Kơnràñ dê.”

³³Tŭ bol khai kơno ală jơnau hơ̆ gen tơk òl gơhào nùs, mơ bơyai kòñ tơnchơt ală cau gơnoar bơto dờng.

³⁴Mơya gơs dô nă cau Pharisi sơnđan la Gamaliel, la cau bơto bơta boh lam la cau jơh làng bol sền dờng màng, ntào digùl Mpồl Kwang Tơrña, mơ sồr cèng ală cau gơnoar bơto dờng hơ̆ lik di tiah dô êt.

³⁵Chòp khai đơs lah: “Ơ cau Israel, kơrhia tĕ bơh bơta bol mê rơp lơh di ală cau do.

³⁶Lài òr gơs Theuda bơtào tơngguh, sơnđan is să khai la cau dờng màng, gơs pơgap poan rhiang nă cau jat khai; mơya khai kong cau tơnchơt, mơ jơh ală cau jat khai gen gơprah gơpring jơh, mơ gơlik gơs roh lơm.

³⁷Tơnơ̆ khai gen gơs Juda cau Galile, bơtào tơngguh is să khai tòm sơnam cih sơnđan làng bol, gơs oă cau jat khai, mơya lồi tơnơ̆ khai kong tơnroh, jơh ală cau jat khai gơlik gơs nrah nring jơh.

³⁸Do añ đơs mơ bol mê, pleh tĕ ngài di ală cau hơ̆, lòi tĕ, dò bol khai dê. Bơh dilah bơta bơyai hala broă do gơlik bơh kòn mơnus gen rơp roh is gơ dê;

³⁹mơya dilah gơlik bơh Yàng Tom Trồ gen bol mê ò rgơi tơnroh ală cau hơ̆ ò, rngòt bol mê kung be tòmlơh mơ Yàng Tom Trồ mòn.” Behơ̆ bol hơ̆ iat jơnau bơto tơngkah Gamaliel dê.

⁴⁰Bol khai hòi wơl ală cau gơnoar bơto dờng mơ sồr cau pù lơh, lồc behơ̆ bơkơ̆u bañ ai sơnđan Yàng Jesu nàng bơto yal tai, gen hồ tơlik bol khai.

⁴¹Behơ̆ ală cau gơnoar bơto dờng lik rê bơh di Mpồl Kwang Tơrña, hòn chò bơh geh kòp la di pal neh kong bơtat bơtròh bơh sơnđan Yàng Jesu.

⁴²Kòp ngai tòm hìu duh khoai hala bơh hìu do tus hìu ne, bol khai kư̆ bơto mơ bơto yal sùm bơh Yàng Jesu la Bơtau Krist.