Read koho Broă 6 Bible Online

Broă 6 - koho bible

Broă 6

¹Tòm tŭ hơ̆, khà cau bơtê sơlo gơbơtơl oă tai, ală cau Juda đơs jơnau Grek yoam cau Juda đơs jơnau Aram, bơh ală cau ùr bơnrau bol khai dê neh kòl cau sang lòi tòm bơta pà phan kòp ngai.

²Jơt bàr nă cau gơnoar bơto dờng hòi jơh ală cau bơtê pơjum bal mơ đơs lah: “Sang broă bơto jơnau Yàng Tom Trồ dê nàng rcang bơh phan sa, ngan la ò di pal.

³Behơ̆, dan oh mi sac tĕ tòm bơnòr he poh nă cau geh pơnro niam, bềng lìu Yàng Hwềng Goh mơ bơta jak chài, nàng bol hi rơp jào broă do bol khai in.

⁴Ai bol hi rơp mìng ơn nùs hòi dan mơ bơto yal jơnau Yàng.”

⁵Jơh ală cau niam nùs bơh ală jơnau hơ̆, gen sac rwah Etien la cau gơs bềng bơta dòn mơ Yàng Hwềng Goh, Philip, Prôkôr, Nikanor, Timôn, Parmenas, mơ Nikôlaus la cau Antiôt pa jat gùng duh khoai cau Juda dê;

⁶Bol khai tơlik mat poh nă cau hơ̆ di đap ală cau gơnoar bơto dờng, gen ală cau gơnoar bơto dờng hòi dan mơ ơn tê hơđang ală cau hơ̆.

⁷Jơnau Yàng Tom Trồ dê sơlo ngai sơlo gơ lòt ơnàng, khà cau bơtê tòm Jerusalem sơlo gơbơtơl oă ngan; kung gơs oă cau gơnoar ơn phan duh khoai dòn dòp Yàng sơl.

⁸Etien bềng bơta nđàc mơ gơnap gơnoar bơh Yàng Tom Trồ lơh gơs bơta krơi mơ tềl is dờng ngan tòm làng bol.

⁹Tŭ hơ̆ gơs mpồl cau tòm hìu jum sơnđan la hìu jum bơnòr khat gơboh dê, bal mơ cau Siren mơ cau Aleksandria dê, mơ ală cau Juda ơm tòm lơgar Silisi mơ lơgar Asi, ntào pơndang mơ Etien.

¹⁰Mơya bol hơ̆ ò rgơi tòmdră mơ bơta jak chài khai dê bal mơ Yàng Hwềng Goh sơl la Bơtau ai khai in ală jơnau đơs hơ̆,

¹¹gen bol hơ̆ chồl bơchồt òm dô êt cau yă blac đơs lah: “Bol hi neh kơno khai đơs ală jơnau tràl sơrbil di Môise mơ di Yàng Tom Trồ sơl.”

¹²Bol hơ̆ chồl bơtrut làng bol, ală cau kwang kra mơ ală cau bơto bơta boh lam, lồc behơ̆ brồ kup khai mơ lam lòt tus hơ Mpồl Kwang Tơrña.

¹³Bol hơ̆ bơtào is ală cau lơh cơng blac, đơs lah: “Cau do òs đơs ală jơnau tràl sơrbil di tiah sàng goh mơ di bơta boh lam sơl,

¹⁴bơh bol hi neh kơno khai đơs lah Jesu Cau Nasaret ne rơp tơnroh tiah do mơ tòmgơl ală bơta òs mòng mơ Môise neh lòi wơl bol he in.”

¹⁵Jơh ală cau nggui tòm Mpồl Kwang Tơrña sền trol di Etien, gŏ muh mat khai be muh mat dô nă cau gơnrơh dê.