Read koho Broă 7 Bible Online

Broă 7 - koho bible

Broă 7

¹Cau gơnoar dờng lam bồ ơn phan duh khoai lùp Etien lah: “Ală bơta hơ̆ gơs ngan behơ̆ sơl?”

²Etien ho lah: “Ơ ală bèp, ală bi, iat tĕ añ! Yàng Tom Trồ gơklŏ neh tơlik să mơ ồng pàng bol he la Abraham tòm tŭ khai gam ơm tòm Mesôpôtami, lài mơ tŭ tus ơm tòm Caran,

³mơ đơs lah: ‘Lik tĕ bơh lơgar tòm mơ gơp bơtiàn mê nàng lòt tus hơ dô bă tiah Añ rơp sơnio mê in.’

⁴Behơ̆ khai lik bơh lơgar Kalde, mơ tus ơm tòm Caran. Tơnơ̆ mơ tŭ bèp khai neh chơt rau, Yàng Tom Trồ chồl khai bơh tềng hơ̆ lòt tus hơ lơgar mơ ală ồng gam ơm do.

⁵Kơnràñ ò ai khai in dô êt lơi sre brê tòm tiah do, dô pet ù ơn jơng kung ò gơs sơl, mơya Kơnràñ ho ai tiah do lơh gơs sre brê tòm khai in mơ jơi bơtiàn khai in sơl, bulah tòm tŭ hơ̆ khai òhềt gơs kòn.

⁶Yàng Tom Trồ đơs be do: ‘Jơi bơtiàn mê rơp ơm ing tòm lơgar ndai, cau rơp kup bol khai lơh gơs dĭ mơ rồn bơklơn bol khai tòm poan rhiang nam.’

⁷Yàng Tom Trồ đơs tai lah: ‘Añ rơp cahrña làng bol neh kup bol khai lơh gơs dĭ, tơnơ̆ mơ hơ̆ bol khai rơp lik klàs, mơ duh broă Añ tòm tiah do.’

⁸Yàng Tom Trồ ai khai in bơta ho bal bơh bơta siat gơltau. Behơ̆ Abraham tơnggơs Isak mơ siat gơltau khai in tòm ngai phàm; Isak tơnggơs Jakôp, mơ Jakôp kung lơh behơ̆ mơ jơt bàr nă ồng pàng.

⁹Ală ồng pàng hơ̆ ƀoah gơjrañ di Jôsep, behơ̆ tàng tac khai hơ lơgar Ejiptơ; mơya Yàng Tom Trồ ơm bal mơ khai,

¹⁰Kơnràñ dong tă khai lik klàs bơh jơh ală bơta bòl glar, mơ ai khai in bơta nđàc mơ bơta jak chài di đap Pharaôn, bơtau Ejiptơ; cau bơtau hơ̆ pồ bơtào khai lơh gơs kwang dờng lơgar Ejiptơ, mơ jơh hìu nhă cau bơtau dê sơl.

¹¹Tŭ hơ̆ gơlik bơta jơgloh rung tòm làm jơh lơgar Ejiptơ mơ lơgar Kanaan sơl, la bơta rung rài dờng ngan; ồng pàng bol he ò tang tiah nàng jòi phan sa.

¹²Tòm tŭ Jakôp kơno tòm Ejiptơ gơs kòi phe, gen sồr ồng pàng bol he lòt tus tềng hơ̆ dơ̆ sơnròp.

¹³Tus di dơ̆ bàr gen sồng Jôsep yal loh oh mi in git bơh să tòm khai, mơ bơh hơ̆ Pharaôn kung git hìu nhă khai dê sơl.

¹⁴Jôsep sồr lòt rò Jakôp la bèp khai dê mơ jơh hìu nhă la poh jơt pram nă.

¹⁵Behơ̆ Jakôp mù hơ Ejiptơ mơ chơt tềng hơ̆, mơ ồng pàng bol he dê kung behơ̆ sơl;

¹⁶ntìng ƀồc bol khai geh cèng brê wơl hơ Sicem tơp tòm bơtô mơ Abraham neh ai priă rwat bơh kòn sau Hamor dê tòm Sicem.

¹⁷Tòm tŭ mòr tus di tŭ tơngai Yàng Tom Trồ lơh gơlik gơs di ngan jơnau ho pơgon mơ Abraham, khà làng bol kư̆ tơnggơs bơtơl rơ̆sơmpài ràipơjềng tòm lơgar Ejiptơ,

¹⁸jơl tus di tŭ tòm lơgar hơ̆ gơs dô bơtau ndai guh at bồ, ò git Jôsep tai.

¹⁹Cau bơtau hơ̆ ai kai lac lèo nàng lơh iơh di jơi bơtiàn bol he dê mơ rồn bơklơn ồng pàng bol he pal sang ală kòn oh nga, tồ bañ ai bol khai in kis.

²⁰Tòm tŭ hơ̆ deh Môise, khai hàng mơnĕ krơi is ngan, geh ròng tòm pe kơnhai tòm hìu khai dê.

²¹Tòm tŭ Môise kòl sang, gen kòn ùr Pharaôn dòp ròng lơh gơs kòn tòm he.

²²Môise bơtê jơh ală bơta jak chài cau Ejiptơ dê; khai gơs gơnoar pràn tòm jơnau đơs mơ broă lơh khai dê.

²³Tòm tŭ khai gơs poan jơt nam rau, gen tòm nùs lơh nền, kòñ lòt còp oh mi khai la kòn sau Israel dê.

²⁴Tòm tŭ Môise gŏ dô nă cau kong cau lơh iơh, gen dong tò khai, mơ pòng chơt cau Ejiptơ nàng sal tê.

²⁵Khai tồnlah oh mi khai git wă lah Yàng Tom Trồ ngui tê khai nàng dong tă bol khai; mơya bol khai ò git wă dô êt lơi.

²⁶Ngai tơnơ̆, khai lòt tus gŏ bol khai ơm tòmlơh bal, gen khai kòñ dong bol khai gơtòmsòr bal, mơ đơs lah: ‘Ơ ală ồng, ală ồng la oh mi bal; ñchi bơh tài lơh iơh di gơp behơ̆ taih?’

²⁷Cau ơm lơh iơh di gơp he hơ̆ tơlo Môise mơ đơs lah: ‘Ñcau neh bơtào mê lơh gơs kwang at bồ mơ kwang cahrña bol hi taih?

²⁸Mê kòñ tơnchơt añ be neh tơnchơt cau Ejiptơ ngai òr ơ?’

²⁹Dơ̆ Môise kơno jơnau hơ̆ gen dô pleh ơm ing tòm lơgar Midian, tềng hơ̆ khai tơnggơs bàr nă kòn klau.

³⁰Poan jơt nam tơnơ̆, gơs dô nă cau gơnrơh tơlik să mơ khai tòm ƀlàng ngềt ngơt mơnơm Sinai, tòm lơmpiat ồs di rlau lò.

³¹Môise gŏ bơta gơtơnggŏ hơ̆ gen ai lơh krơi ngan; khai lòt tus rềp tồ sền loh làng, gen kơno jơnau Yàng đơs lah:

³²‘Añ la Yàng Tom Trồ ồng pàng mê dê, Yàng Tom Trồ Abraham dê, Isak mơ Jakôp dê.’ Môise rơm să rngòt, ò khin tơnggòr sền.

³³Yàng đơs tai lah: ‘Hồ tĕ khŏ bơh di jơng mê dê, bơh tiah mê ơm ntào la tiah sàng goh.

³⁴Ngan Añ neh sền gŏ bơta bòl glar làng bol Añ jê tòm lơgar Ejiptơ, Añ neh kơno jơnau rac ròc bol khai dê, gen Añ mù nàng dong tă bol khai. Tŭ do mê lòt tus tĕ, Añ rơp sồr mê lòt hơ lơgar Ejiptơ.’

³⁵Môise do la cau neh bol khai sang mơ đơs lah: ‘Ñcau neh bơtào mê lơh gơs kwang at bồ mơ kwang cahrña taih?’ Hơ̆ la cau mơ Yàng Tom Trồ neh sồr lơh gơs kwang at bồ mơ bơtau dong tă, kơnòm di tê cau gơnrơh neh tơlik să mơ khai tòm rlau lò.

³⁶Khai la cau neh lam bol khai lik bơh lơgar Ejiptơ mơ lơh ală bơta krơi tềl is tòm lơgar Ejiptơ, tòm Dàlềng Pơrhê, mơ tòm ƀlàng bràs ngềt ngơt tòm poan jơt nam.

³⁷Să tòm Môise do neh đơs mơ kòn sau Israel lah: ‘Yàng Tom Trồ rơp bơh digùl bol mê mơ bơtào tơngguh dô nă Cau gơnoar hwơr be añ.’

³⁸Să tòm khai la cau neh ơm tòm mpồl jơnum tòm ƀlàng bràs ngềt ngơt bal mơ cau gơnrơh neh đơs mơ khai hơđang mơnơm Sinai mơ bal mơ ồng pàng bol he dê, mơ khai dòp leng ală jơnau kis nàng ai bol he in.

³⁹Mơya ală ồng pàng bol he ò bài lơh jat jơnau khai, sang khai mơ wèt nùs wơl hơ lơgar Ejiptơ.

⁴⁰Bol khai đơs mơ Arôn lah: ‘Lơh gơs tĕ bol he in ală yàng nàng lòt lài mơ bol he; bơh pơnah đah Môise do la cau neh lam bol he lik bơh lơgar Ejiptơ, bol he ò git bơta lơi neh gơlik tus di khai rau.’

⁴¹Behơ̆ tòm ală ngai hơ̆ bol khai tŏ dô nơm rùp kơnrồ kòn, mơ ơn phan duh khoai rùp hơ̆ in mơ hòn chò bơh broă tê bol khai neh lơh gơs.

⁴²Yàng Tom Trồ đìu ngkòi di bol khai mơ phi bol khai duh khoai ală mpồl ling hơđang trồ, be neh cih tòm sră ală cau gơnoar hwơr lah: ‘Ơ hìu Israel, bol mê neh ơn phan pơdơng mơ phan ơn duh khoai Añ in, Tòm poan jơt nam tòm ƀlàng bràs sơl?

⁴³Bol mê tùng wơl sàl duh khoai Molok dê, Mơ sơmañ yàng Remphan dê, Hơ̆ la ală rùp ràk mơ bol mê neh lơh gơs nàng duh khoai. Tài behơ̆, Añ kung rơp cèng bol mê hơ đah ne lơgar Babilôn sơl.’

⁴⁴Ồng pàng bol he dê neh gơs sàl cơng tàng dê tòm ƀlàng bràs ngềt ngơt, jat be Yàng neh sồr Môise lơh tòm toh, jat be sơnoa rnoas khai neh gŏ.

⁴⁵Ồng pàng bol he dê neh dòp Hìu Ing Duh Khoai hơ̆, lồc behơ̆ lòt bal mơ Jôsue cèng tus hơ lơgar bol khai neh tòmpìt bơh di ală làng bol bơdìh mơ Yàng Tom Trồ neh bơtrơh tơlik bơh di đap bol khai; Hìu Ing Duh Khoai hơ̆ kư̆ gam gơs sùm jơl tus di rài Dabit,

⁴⁶la cau neh geh bơta nđàc di đap Yàng Tom Trồ, mơ khai dan gơs dô bă tiah ơm Yàng Tom Trồ Jakôp in.

⁴⁷Tơnơ̆ hơ̆ Salômôn lơh gơs dô nơm hìu Yàng in.

⁴⁸Mơya Bơtau Hơđang Rlau Jơh ò ơm tòm hìu bơh tê cau lơh gơs ò, be jơnau cau gơnoar hwơr neh đơs:

⁴⁹‘Yàng đơs lah: Trồ la sơbàn Añ, Ù tiah la kơrnòl jơng Añ, Bol mê rơp lơh hìu lơi Añ in taih? Ntềng đah la tiah ơm rlô Añ jê taih?

⁵⁰Ò di la tê Añ neh crơng gơs ală phan hơ̆ ò ơ?’

⁵¹Ơ ală cau kơldang bồ, nùs mơ tồr ò siat gơltau ne! Ală ồng tòmdră sùm mơ Yàng Hwềng Goh; ồng pàng ală ồng dê be lơi gen ală ồng kung behơ̆ sơl!

⁵²Gơs cau gơnoar hwơr lơi mơ ồng pàng ală ồng ò kup kơryan ơ? Bol khai kung neh tơnchơt ală cau yal lài bơh bơta lòt tus Bơtau Song ring dê, mơ ală ồng kung neh pơrlơ̆ dră mơ tơnchơt tơn;

⁵³ală ồng la cau neh dòp bơta boh lam bơh ală cau gơnrơh bơto yal, mơya ală ồng ò prap gàr.”

⁵⁴Ală bol hơ̆ kơno jơnau hơ̆, gen tơk òl gơhào nùs, mơ rkiat sề di Etien.

⁵⁵Mơya Etien gơs bềng lìu Yàng Hwềng Goh, tơnggòr sền hơđang trồ, gŏ bơta gơklŏ Yàng Tom Trồ dê, mơ Yàng Jesu ntào đah ma Yàng Tom Trồ;

⁵⁶gen đơs lah: “Ne añ gŏ ală tap trồ gơ pò mơ Kòn Mơnus ntào đah ma Yàng Tom Trồ.”

⁵⁷Tŭ hơ̆ bol hơ̆ hòi driau lềt tồr mơ brồ tus kup Etien,

⁵⁸hwài tơlik hơ bơdìh ƀòn dờng, gen cơm lŭ di khai. Ală cau lơh cơng ơn ồi ào bol khai di jơng dô nă cau pơnu sơnđan la Sol.

⁵⁹Tòm tŭ bol hơ̆ cơm lŭ, gen Etien hòi dan lah: “Khoai Yàng la Yàng Jesu, dan wă rò hwềng añ.”

⁶⁰Gen khai cùn gơltang, hòi dờng lah: “Khoai Yàng, dan bañ tuh glài do hơđang bol khai!” Lồc khai đơs jơnau hơ̆ gen bic tơn.