Read koho Rôma 14 Bible Online

Rôma 14 - koho bible

Rôma 14

¹Dòp rò tĕ cau lơbơn tòm bơta dòn, mơya bañ pơndang bal bơh nùs kơlôi is cau dê.

²Cau do dòn lah geh gơnoar sa jơh ală bơta di lơm; ai cau ne la cau lơbơn lơño, sa mìng biap lơm.

³Cau sa bañ sền òsơp di cau ò sa; mơ cau ò sa bañ cahrña di cau sa, bơh Yàng Tom Trồ neh dòp rò khai.

⁴Mê la ñcau mơ khin cahrña di dĭ gơna cau ndai dê taih? Khai ntào hala gơplơ̆, hơ̆ la broă cau tòm khai dê. Ngan khai rơp ntào, bơh Yàng gơs gơnoar ai khai in ntào kơ̆.

⁵Cau do sền ngai do lin rlau mơ ngai ndai, cau ne sền ală ngai la ndròm bal. Kòp nă lơh tĕ nền cê tòm nùs kơlôi he.

⁶Cau prap gàr ngai la bơh Yàng mơ prap gàr; cau sa la bơh Yàng mơ sa, bơh bol khai ưnngài Yàng Tom Trồ; cau ò sa kung bơh Yàng mơ ò sa, mơ bol khai kung ưnngài Yàng Tom Trồ sơl.

⁷Bơh ò gơs cau lơi bơh să tòm he mơ kis, kung ò gơs cau lơi bơh să tòm he mơ chơt;

⁸bơh dilah bol he kis la kis Yàng in, mơ dilah bol he chơt la chơt Yàng in. Behơ̆ tàng bol he kis hala chơt gen he gơrê mơ Yàng lơm.

⁹Bơtau Krist neh chơt mơ neh kis wơl, nàng lơh gơs Yàng cau chơt mơ cau kis in sơl.

¹⁰Mơya mbe mê cahrña di oh mi he dê taih? Ai mê, mbe mê sền òsơp di oh mi he taih? Bơh jơh tơl nă bol he rơp ntào di đap sơbàn cahrña Yàng Tom Trồ dê.

¹¹Bơh neh cih lah: “Yàng đơs lah: Ngan, Añ la Yàng Tom Trồ kis sùm, kòp nơm gơltang rơp cùn di đap Añ, Mơ kòp nơm lơmpiat rơp yal tơlik Añ la Yàng Tom Trồ.”

¹²Behơ̆ kòp nă tòm bol he rơp yal tơlik broă he dê Yàng Tom Trồ in.

¹³Behơ̆, bañ cahrña ndring gơp he tai, mơya chan lơh nền bañ gơs cau lơi lơh gơtup pừ hala kai gơtup tìs oh mi he in.

¹⁴Añ git mơ dòn nền ngan tòm Yàng Jesu la ò gơs phan lơi ƀơ̆ ƀơl is gơ dê ò, mìng gơs cau lơi kơlôi phan lơi la ƀơ̆ ƀơl, gen gơ la ƀơ̆ ƀơl cau hơ̆ in lơm.

¹⁵Dilah bơh phan sa mơ mê lơh oh mi he in moat jrùng, gen mê ò tai lơh lòt jat bơta kòñ gơboh ò. Bañ tài bơh phan sa mơ lơh roh rui cau mơ Bơtau Krist neh kong chơt ala.

¹⁶Behơ̆ bañ lòi cau đơs iơh bơh bơta niam oh mi dê.

¹⁷Bơh lơgar Yàng Tom Trồ dê ò di bơh bơta ñô sa, mơya bơh bơta song ring, lơngap lơngai, mơ hòn chò tòm Yàng Hwềng Goh.

¹⁸Cau lơi lơh jat behơ̆ mơ duh broă Bơtau Krist, gen geh niam nùs Yàng Tom Trồ mơ geh cau dô nùs bal.

¹⁹Behơ̆, bol he jòi jat tĕ bơta lơh cau in gơtòmsòr mơ bơt bơtào bal mơ gơp.

²⁰Bañ tài bơh phan sa mơ lơh gơprah broă Yàng Tom Trồ dê. Ngan kòp nơm phan la goh, mơya cau lơi bơh sa mơ lơh cau ndai in gơtup tìs, hơ̆ la iơh.

²¹Niam rlau hơ̆ la ò sa poac, ò ñô tơrnòm, mơ ò lơh bơta lơi gơs kai gơtup tìs oh mi he in.

²²Mê dòn be lơi, gen prap gàr tĕ behơ̆ digùl mê mơ Yàng Tom Trồ. Lơngai cau lơi in ò lơh nền glài să tòm khai in tòm bơta khai neh sơwì nền la di.

²³Mơya cau lơi gơs nùs pin wil wơl mơ sa, gen neh kòl lơh nền glài rau, bơh ò di bơh bơta dòn mơ sa; dilah lơh bơta lơi ò di bơh bơta dòn gen hơ̆ la glài rau.