Read koho Rôma 5 Bible Online

Rôma 5 - koho bible

Rôma 5

¹Behơ̆, bol he neh geh kòp la song ring bơh bơta dòn, gen geh gơtòmsòr bal mơ Yàng Tom Trồ, kơnòm di Yàng Jesu Krist bol he dê.

²Kung kơnòm di bơta dòn Kơnràñ lơh bol he in geh mut tòm bơta nđàc Yàng Tom Trồ dê, bol he gam ơm ntào tòm bơta nđàc hơ̆, mơ hòn chò tòm bơta gơn kơnòm geh dòp bơta gơklŏ Yàng Tom Trồ dê.

³Ò di mìng behơ̆ lơm ò, mơya bol he kung jòng să tòm bơta jê sồt bòl glar sơl, bơh git lah bơta jê sồt bòl glar tơnggơs bơta kơ̆ nùs,

⁴bơta kơ̆ nùs tơnggơs nùs nhơm niam, nùs nhơm niam tơnggơs bơta gơn kơnòm.

⁵Mơ bơta gơn kơnòm ò lơh ƀàssìl, bơh bơta kòñ gơboh Yàng Tom Trồ dê neh tuh tòm nùs bol he la bơh Yàng Hwềng Goh la Bơtau mơ Yàng Tom Trồ neh ai gòi bol he in.

⁶Bơh tòm tŭ bol he gam lơbơn lơño, gen Bơtau Krist neh jat tơngai pơgon mơ kong chơt ala cau glài in.

⁷Mơ tai, ò hoan gơs cau kong chơt ala cau song ring in, digơlan gơs cau ƀà khin chơt ala cau lơbơn niam in.

⁸Mơya Yàng Tom Trồ yal tơlik nùs kòñ gơboh Kơnràñ dê gơwèt mơ bol he, la tòm tŭ bol he gam la cau glài, gen Bơtau Krist bơh bol he mơ kong chơt.

⁹Tŭ do bol he neh kơnòm di mhàm Kơnràñ nàng geh kòp la song ring, gen sơlo rlau tai bol he rơp kơnòm di Kơnràñ nàng geh dong klàs bơh bơta gơjrañ dờng Yàng Tom Trồ dê.

¹⁰Bơh dilah tòm tŭ bol he gam la cau sò tơm di Yàng Tom Trồ, mơ neh geh gơtòmsòr wơl mơ Kơnràñ la bơh bơta chơt Kòn Kơnràñ dê, ai tŭ do neh geh gơtòmsòr wơl rau, gen sơlo rlau tai bol he rơp kơnòm di bơta kis Kòn hơ̆ dê mơ geh dong klàs.

¹¹Ò di mìng behơ̆ lơm, mơya bol he kung hòn chò tòm Yàng Tom Trồ la bơh Yàng Jesu Krist bol he dê, bơh Kơnràñ mơ bol he gơlik gơs bơyô Yàng Tom Trồ dê.

¹²Gen tàng, tài bơh dô nă cau tàng tồi glài neh mut tòm dunnia, mơ tài bơh tồi glài tàng gơs bơta chơt, gen bơta chơt neh rsìh làm jơh hơđang tơl nă cau, bơh jơh tơl nă cau neh tìs glài.

¹³Lài mơ tŭ òhềt gơs bơta boh lam gen tồi glài neh gơs tòm dunnia rau, mơya tòm tŭ òhềt gơs bơta boh lam, gen glài kung ò kòp la glài.

¹⁴Bulah behơ̆, bơh Adam jơl tus di Môise, bơta chơt neh at bồ hơđang ală cau ò tìs glài tòm toh be glài Adam dê, tòm tŭ khai ò lơh jat bơta boh lam Yàng Tom Trồ dê, Adam la rùp sơnio bơh Bơtau rơp tus.

¹⁵Mơya tồi glài ò di be bơta ai gòi bơh đang jòng. Mơ dilah bơh dô nă cau tìs glài mơ gơs oă cau chơt, gen bơta nđàc Yàng Tom Trồ dê, mơ bơta ai gòi tòm bơta nđàc Kơnràñ dê bơh dô nă cau la Yàng Jesu Krist, sơlo geh tơngkah tơngkañ oă cau in.

¹⁶Mơ tai, bơta ai gòi do, ò di be broă gơlik tus bơh dô nă cau tìs glài ò: Bơta cahrña tài bơh dô nơm glài lam tus hơ bơta lơh nền glài, mơya bơta ai gòi bơh đang trồ tơnơ̆ mơ oă dơ̆ tìs glài, gen lam tus hơ bơta geh kòp la song ring.

¹⁷Dilah bơh tồi glài dô nă cau dê tàng bơta chơt neh at bồ, gen sơlo rlau tai ală cau dòp bơta nđàc mơ bơta ai gòi bơh bơta song ring dô bă lìu làc, bol khai rơp kơnòm di dô nă Yàng Jesu Krist nàng at bồ tòm bơta kis.

¹⁸Gen tàng, bơh mìng bơta tìs glài dô nă cau dê tàng jơh tơl nă cau kong lơh nền glài be lơi, gen kung behơ̆ sơl bơh mìng dô nơm broă song ring dô nă cau dê, gen tàng jơh tơl nă cau geh kòp la song ring tồ dòp geh bơta kis.

¹⁹Ngan behơ̆, bơh bơta ò dòn bơr dô nă cau dê, tàng oă cau in gơlik gơs cau glài be lơi, gen kung behơ̆ sơl, bơh bơta dòn bơr dô nă cau dê, tàng oă cau in geh Yàng Tom Trồ kòp la song ring.

²⁰Mơ tai, bơta boh lam neh mut tồ tồi glài bơtơl oă tai; mơya tiah lơi tồi glài bơtơl oă tai, gen bơta nđàc sơlo bơtơl lìu làc rlau tai,

²¹behơ̆, tồi glài neh at bồ lam tus hơ bơta chơt be lơi, gen bơta nđàc kung at bồ tòm bơta song ring behơ̆ sơl, nàng lam bol he tus hơ bơta kis gam sùm sùm bơh Yàng Jesu Krist, la Yàng bol he dê.