Read koho I Kôrintô 13 Bible Online

I Kôrintô 13 - koho bible

I Kôrintô 13

¹Bulah añ đơs ală jơnau đơs kòn mơnus mơ cau gơnrơh dê, mơ dilah ò gơs bơta kòñ gơboh, gen añ gơlik gơs kung be cing ntas hala mồng nggồr.

²Bulah añ geh bơta ai gòi đơs hwơr mơ git jơh ală bơta ndơp ndơr mơ jơh ală bơta git jak, bulah añ gơs bơta dòn dờng tian gơs sồr mơnơm ntruñ kung di sơl, mơ dilah ò gơs bơta kòñ gơboh gen añ gơlik ò kwơ.

³Bulah añ cèng jơh ală phan mơna añ jê nàng ròng siam cau rƀah lơòi, bulah añ phi să jan nàng kong chu, mơ dilah ò gơs bơta kòñ gơboh, gen bơta hơ̆ ò gơs kwơ añ in.

⁴Bơta kòñ gơboh gơs bơta kong ơt mơ kơ̆ dơn, bơta kòñ gơboh ò ƀoah gơjrañ, bơta kòñ gơboh ò jòng să mơ ò pơnhừ să,

⁵ò lơh tìs jơnau, ò jòi cồng nha is, ò mhar gơjrañ, ò kah prap bơta tìs;

⁶ò hòn chò bơh bơta ò song ring, mơya hòn chò bơh jơnau song.

⁷Bơta kòñ gơboh kong jơh ală bơta, dòn jơh ală bơta, gơn kơnòm jơh ală bơta, ơt ơl jơh ală bơta.

⁸Bơta kòñ gơboh ò gơs tŭ lơi jơh, bulah bơta ai gòi đơs hwơr rơp jơh, bulah ală jơnau đơs ndai rơp rlau, bulah bơta git jak rơp lồi.

⁹Bơh bơta git wă bol he dê ò wil tơl, mơ bơta đơs hwơr bol he dê kung ò wil tơl,

¹⁰mơya tòm tŭ bơta wil tơl neh tus, gen bơta ò wil tơl rơp kòl sang lòi.

¹¹Tòm tŭ añ gam kơnòm añ đơs kung be cau kơnòm, añ gơs nùs nhơm kung be cau kơnòm, añ kơlôi sơnơng be cau kơnòm; tòm tŭ añ neh dờng gen añ sang ală broă cau kơnòm dê.

¹²Tŭ do bol he sền ò loh be sền tòm krơh lu li, mơya tòm tŭ hơ̆ mat tòm toh mơ mat; tŭ do añ git ò wil tơl, mơya tòm tŭ hơ̆ añ rơp git jơh kung be Yàng neh git loh bơh añ.

¹³Tŭ do gam pe bơta do: Bơta dòn, bơta gơn kơnòm, mơ bơta kòñ gơboh; mơya bơta dờng màng rlau jơh la bơta kòñ gơboh.