Read koho I Kôrintô 2 Bible Online

I Kôrintô 2 - koho bible

I Kôrintô 2

¹Ơ oh mi, tòm tŭ añ tus hơ oh mi añ ò bơto yal bơta ndơp ndơr bơh Yàng Tom Trồ oh mi in tòm jơnau đơs jòng jơnhoa hala jơnau jak chài.

²Bơh añ neh lơh nền lah ơm digùl oh mi añ ò git bơta lơi rlau mơ Yàng Jesu Krist, mơ Kơnràñ kong pơng di chi pơng.

³Mơ añ neh tus hơ oh mi tòm bơta lơbơn lơño, mơ tòm bơta rngòt rngơt mơ rơm să ngan.

⁴Jơnau đơs mơ bơta bơto yal añ jê ò di bơh jơnau gơlơh be di pal bơta jak chài dê, mơya bơh bơta yal tơlik tòm gơnap gơnoar Yàng Hwềng dê,

⁵nàng bơta dòn oh mi dê ò bơtào hơđang bơta jak chài kòn mơnus dê, mơya bơtào hơđang gơnap gơnoar Yàng Tom Trồ dê.

⁶Bulah behơ̆, digùl ală cau neh dong bol hi kung bơto yal bơh bơta jak chài, mơya ò di bơh bơta jak chài rài do dê, hala bơh cau at bồ rài do, la cau rơp roh rui;

⁷mơya bol hi bơto yal bơta jak chài, ndơp ndơr neh geh Yàng Tom Trồ pồn ndơp, hơ̆ la bơta neh geh Yàng Tom Trồ lơh nền lài ală rài in nàng ai bơta gơklŏ bol he in.

⁸Tòm ală cau at bồ rài do ò gơs dô nă cau lơi git bơta jak chài hơ̆, bơh dilah bol khai neh git gen bol khai ò pơng Yàng gơklŏ hơđang chi pơng.

⁹Mơya kung be Jơnau neh cih lah: “Ală bơta mat òhềt gŏ, tồr òhềt kơno, Mơ nùs kòn mơnus òhềt kơlôi, Gen Yàng Tom Trồ neh rcang lài ală bơta hơ̆ ală cau in kòñ gơboh di Kơnràñ.”

¹⁰Ală bơta hơ̆ Yàng Tom Trồ neh yal tơlik gan di Yàng Hwềng Goh; bơh Yàng Hwềng sền sơwì jơh ală bơta, bulah bơta jrô ndơp Yàng Tom Trồ dê.

¹¹Bơh digùl ală cau, ñcau rgơi git bơta kơlôi tòm nùs cau ndai dê taih? Mìng hwềng nùs ơm tòm hơ̆; kung behơ̆ sơl ò gơs cau lơi git ală bơta Yàng Tom Trồ dê, mìng Hwềng Yàng Tom Trồ dê lơm.

¹²Tŭ do, bol he neh dòp ò di hwềng dunnia dê, mơya Hwềng tus bơh Yàng Tom Trồ, nàng bol he in git ală bơta Yàng Tom Trồ neh ai gòi bol he in.

¹³Bol he kung bơto yal ală bơta hơ̆, ò di bơh jơnau bơta jak chài kòn mơnus bơto sồr, mơya bơh jơnau Yàng Hwềng bơto sồr; ngui jơnau đah hwềng nàng yal tơlik ală bơta đah hwềng.

¹⁴Mơ tai, ală cau ò gơs Yàng Hwềng ò rgơi dòp bơta ai gòi tus bơh Hwềng Yàng Tom Trồ dê; bơh bol khai gơwèt mơ bơta hơ̆ la tùl gơla, mơ bol khai ò rgơi git wă, tài bơh pal sền sơwì jat đah hwềng.

¹⁵Mơya cau đah hwềng rgơi sền sơwì jơh ală bơta, mơ să tòm bol khai ò gơs cau lơi rgơi sền sơwì.

¹⁶“Bơh ñcau neh git nùs kơlôi Yàng dê, nàng bơto Kơnràñ in taih?” Mơya bol he gơs nùs kơlôi Bơtau Krist dê.