Read koho I Kôrintô 3 Bible Online

I Kôrintô 3 - koho bible

I Kôrintô 3

¹Ơ oh mi, đah mơ añ, añ ò rgơi đơs mơ oh mi be cau đah hwềng, mơya be cau jat poac să, kung be oh nga tòm Bơtau Krist.

²Añ neh siam ròng oh mi in dà toh, ò di phan sa kră, bơh oh mi kong ò jai, mơ tus di tŭ do kung ò jai sơl,

³bơh oh mi gam la cau kis jat poac să; bơh tòm oh mi gơs bơta ƀoah mơ tòm pơndang, gen oh mi ò di cau jat poac să mơ lơh lòt kung be cau rài do ò ơ?

⁴Tòm tŭ gơs cau đơs: “Añ jat Pol,” mơ cau ndai đơs: “Añ jat Apôlôs,” behơ̆ oh mi ò di la cau jat rài do ò ơ?

⁵Behơ̆ gen, Apôlôs la ñcau? Pol la ñcau? Bol hi mìng la ală cau duh broă Yàng Tom Trồ dê, kơnòm dê bol hi tề lam mơ oh mi neh dòn, jat be bơta nđàc Yàng neh ai kòp nă cau hơ̆ in.

⁶Añ neh tam, Apôlôs neh tuh dà, mơya Yàng Tom Trồ neh lơh gơ in hòn dờng.

⁷Behơ̆ cau tam mơ cau tuh ò gơs bơta lơi, mìng Yàng Tom Trồ la Bơtau lơh gơ in hòn dờng.

⁸Cau tam mơ cau tuh la dô bă bal, mơya kòp nă rơp dòp phan ƀàn is he dê, jat be broă bòl glar khai neh lơh.

⁹Bơh bol hi la bơyô lơh broă bal mơ Yàng Tom Trồ; oh mi la sre Yàng Tom Trồ dê, mơ hìu Yàng Tom Trồ dê.

¹⁰Jat bơta nđàc Yàng Tom Trồ neh ai añ in, añ neh bơt mơnàng kung be cau chài rgơi bơt, mơ cau ndai bơt hơđang. Mơya cau lơi bơt hơđang mơnàng hơ̆ pal kơrhia tĕ mbe he bơt.

¹¹Bơh ò gơs cau lơi rgơi bơt dô nơm mơnàng ndai rlau mơ mơnàng neh bơt, hơ̆ la Yàng Jesu Krist.

¹²Mơya dilah cau lơi ai màh, priă, lŭ màng, chi, ñhơt ro, rhe nàng bơt hơđang mơnàng hơ̆,

¹³gen broă kòp nă cau dê rơp geh ràng tơlik; bơh tòm ngai Yàng dê rơp yal loh. Tài bơh gơ rơp geh ràng tơlik tòm ồs, mơ ồs rơp lòng broă kòp nă cau dê la mbe lơi.

¹⁴Dilah broă cau lơi bơt hơđang mơnàng hơ̆ gam wơl, gen cau hơ̆ rơp geh phan ƀàn.

¹⁵Dilah broă cau lơi gơkòl chu pơrguc jơh, gen cau hơ̆ rơp roh phan ƀàn, mơ să tòm cau hơ̆ rơp geh dong klàs, mơya kung be cau lik klàs bơh di ồs.

¹⁶Oh mi ò git he la hìu duh khoai Yàng Tom Trồ dê, mơ Hwềng Yàng Tom Trồ ơm tòm oh mi ò ơ?

¹⁷Dilah cau lơi tơnroh hìu duh khoai Yàng Tom Trồ dê, gen Yàng Tom Trồ rơp tơnroh cau hơ̆; bơh hìu duh khoai Yàng Tom Trồ dê la sàng goh, mơ oh mi la hìu hơ̆.

¹⁸Bañ gơs cau lơi pơrlồm să he. Dilah gơs cau lơi tòm oh mi kơlôi he la jak chài tòm rài do, gen lòi tĕ khai gơlik gơs tùl gơla nàng khai gơlik gơs jak chài ngan.

¹⁹Bơh bơta jak chài dunnia dê gơwèt mơ Yàng Tom Trồ la tùl gơla. Be Sră Goh neh cih lah: “Kơnràñ kup ală cau jak chài tòm bơta lac lèo bol khai dê.”

²⁰Mơ Sră Goh ndai cih: “Yàng git bơta kơlôi ală cau jak chài dê la ò kwơ lơm.”

²¹Behơ̆, bañ gơs cau lơi jòng să bơh ală broă jơi kòn mơnus rgơi lơh. Bơh jơh ală bơta la bal mơ oh mi.

²²Bulah Pol, hala Apôlôs, hala Sepha, hala dunnia, hala bơta kis, hala bơta chơt, hala broă tŭ do, hala broă rơp tus, jơh ală bơta la gơrê bal mơ oh mi;

²³mơ oh mi la gơrê bal mơ Bơtau Krist; mơ Bơtau Krist la gơrê bal mơ Yàng Tom Trồ.