Read koho I Kôrintô 4 Bible Online

I Kôrintô 4 - koho bible

I Kôrintô 4

¹Behơ̆, kòp nă sền tĕ di bol hi kung be cau duh broă Bơtau Krist dê, mơ kung be cau at bồ hìu sền gàr ală bơta ndơp ndơr Yàng Tom Trồ dê.

²Mơ tai, cau at bồ hìu pal gơs dô bơta, hơ̆ la pal dòn song.

³Mơya đah mơ añ, kòl oh mi cahrña hala cau ndai cahrña, añ sền bơta hơ̆ la dềt ngan; ngan añ kung ò cahrña să tòm añ sơl.

⁴Bơh añ ò gŏ bơta lơi tìs mơ să tòm añ, mơya añ ò kơnòm di bơta hơ̆ nàng geh kòp la song ring. Bơtau cahrña añ hơ̆ la Yàng.

⁵Behơ̆ bañ cahrña gòñ ir, pal gơn tus di tŭ Yàng tus. Kơnràñ rơp ràng tơlik hơ bơta àng ală bơta pồn ndơp tòm tiah klam jơngo, mơ yal tơlik ală bơta lơh nền tòm nùs cau; mơ tŭ hơ̆ kòp nă cau rơp dòp bơta jòng ro bơh Yàng Tom Trồ.

⁶Ơ oh mi, tài bơh oh mi tàng añ neh ngui ală bơta do nàng sơnio bơh añ mơ Apôlôs, nàng oh mi bơtê bơh bol hi gơtha jơnau đơs lah: “Bañ sơrlèt rlau mơ jơnau neh cih;” nàng ò gơs dô nă cau lơi tòm oh mi jòng să bơh cau do mơ tòmdră mơ cau ne.

⁷Bơh ñcau ai mê in lin rlau mơ cau ndai taih? Ò di Yàng Tom Trồ neh ai jơh bơta hơ̆ oh mi in ò ơ? Gen ñchi bơh tài mê jòng să kung be ò dòp taih?

⁸Oh mi neh hòm tơl rau, oh mi neh pas gơs rau, oh mi neh at bồ rau ai bol hi gen ò, ngan oh mi neh gơlik gơs bơtau nàng bol hi kung at bồ bal mơ oh mi sơl.

⁹Bơh añ kơlôi lah Yàng Tom Trồ neh ràng tơlik bol hi la ală cau gơnoar bơto dờng gơlik gơs cau lồi dut, kung be cau glài pal kong chơt; bơh bol hi gơlik gơs phan dơñŏ tơnhial di đap dunnia, cau gơnrơh mơ kòn mơnus sơl.

¹⁰Bol hi la cau tùl gơla bơh Bơtau Krist, mơya oh mi geh jak chài tòm Bơtau Krist; bol hi lơbơn lơño, mơya oh mi pràn kơldang; oh mi geh sền dờng màng, mơya bol hi kong sền òsơp.

¹¹Bol hi kong jơgloh mơ tơhìr, ơm sut sèt, kong pù lơh, mơ lòt ngai do tềng do, ngai hìng tềng hơ̆.

¹²Bol hi ngui tê tòm mơ kong bòl glar lơh broă; tŭ gơtìp lah sơrpah, gen bol hi ai lơngai; tŭ gơtìp kup kơryan, gen bol hi kong;

¹³tŭ gơtìp joh lah, gen bol hi đơs niam. Tus dê tŭ do, cau sền bol hi be phan thul ơmul dunnia dê, mơ phan ƀơ̆ ƀơl jơh ală phan dê.

¹⁴Añ cih ală jơnau do ò di nàng lơh ală oh mi in ƀàssìl, mơya nàng bơto tơngkah ală oh mi be ală kòn kòñ gơboh añ jê.

¹⁵Bulah oh mi gơs jơt rbô nă cau bơto tòm Bơtau Krist, mơya oh mi ò gơs oă bèp; bơh tòm Yàng Krist Jesu añ neh tơnggơs oh mi bơh Jơnau Niam.

¹⁶Behơ̆, añ bơto tơngkah oh mi, pal đòm krơh añ.

¹⁷Tài behơ̆, añ neh sồr Timôthe lòt tus hơ oh mi, khai la kòn kòñ gơboh mơ dòn song añ jê tòm Yàng. Khai rơp tơngkah oh mi in bơh ală gùng dà rài kis pa añ jê tòm Yàng Krist Jesu, kung be añ bơto sồr tòm kòp nơm Hìu Jum Goh làm bă tiah.

¹⁸Mơ tai, gơs dô êt cau tòm oh mi jòng să he, tồnlah añ ò lòt tus hơ oh mi tai.

¹⁹Mơya dilah Yàng kòñ añ lòt, gen añ rơp tus mhar hơ oh mi; mơ añ rơp sơwì nàng git ală cau jòng is să he hơ̆, ò di bơh jơnau đơs bol khai dê, mơya bơh gơnap gơnoar bol khai dê.

²⁰Bơh lơgar Yàng Tom Trồ ò di bơh jơnau đơs mơya bơh gơnap gơnoar.

²¹Ñchi ală oh mi kòñ taih? Kòñ añ ai gai mơ tus, hala ai bơta kòñ gơboh mơ nùs niam lơnhơn mơ tus hơ oh mi taih?