Read koho I Kôrintô 5 Bible Online

I Kôrintô 5 - koho bible

I Kôrintô 5

¹Neh kơno lah tòm mpồl oh mi gơs glài rềs àr bơrnàn, mơ bơta rềs àr bơrnàn hơ̆ kung ò di gơs digùl cau làng bol bơdìh, hơ̆ la dô nă cau tìs glài mơ bau ùr bèp khai dê.

²Mơ oh mi gam jòng să he taih? Chan oh mi moat jrùng la niam rlau, mơ cau neh tìs glài hơ̆ pal tă tơlik bơh digùl oh mi.

³Bơh bulah să añ ơm ngài, mơya hwềng nùs añ gam ơm bal mơ oh mi. Tòm sơnđan Yàng Jesu Krist bol he dê, añ neh cahrña cau neh lơh broă iơh rmơh hơ̆ rau, kung be añ gơs tềng hơ̆.

⁴Behơ̆, tòm tŭ oh mi pơjum bal, gen hwềng nùs añ kung gơs tềng hơ̆ bal mơ gơnap gơnoar Yàng Jesu bol he dê,

⁵oh mi jào tĕ cau hơ̆ cà Satan in nàng tơnroh poac să, tồ hwềng soàn khai geh dong klàs tòm ngai Yàng Jesu dê.

⁶Bơta jòng să oh mi dê ò niam dô êt lơi. Oh mi ò git lah dô êt kañ lơh gơprồ jơh dô kơnac kơmbuh ò ơ?

⁷Lơh goh tĕ kañ yau, nàng oh mi in gơlik gơs dô kơnac kơmbuh pa. Be oh mi ngan la kơnac kơmbuh ò gơs kañ, ngan be añ git oh mi la behơ̆. Bơh Bơtau Krist la Belàt Kòn bơta Pơjum Sa Lòt Gan bol he dê neh kong chơt rau.

⁸Behơ̆, bol he prap gàr tĕ bơta Pơjum Sa Lòt Gan mơ bañ ngui kañ yau, kung bañ ngui kañ bih khih mơ bơta iơh bơsak, mơya ngui piang lă ò gơs kañ, hơ̆ la piang lă song ngan mơ jơnau song.

⁹Añ neh cih tòm sră pơyoa oh mi in, bañ lơh yô bal mơ cau rềs àr bơrnàn.

¹⁰Tŭ do añ ò đơs bơh cau rài do la cau rềs àr bơrnàn, hala cau hàm hà mơ cau ntung kơñau, hala cau duh rùp ràk; dilah behơ̆ gen oh mi pal lik bơh dunnia.

¹¹Mơya añ neh cih oh mi in lah bañ lơh yô mơ cau lơi sơnđan is să he la cau dòn mơ cau hơ̆ la rềs àr bơrnàn, hàm hà, duh rùp ràk, lah sơrpah, bơñul lơmbè, ntung kơñau, gen kung bañ nggui sa bal mơ cau behơ̆.

¹²Tơnơ̆ wơl, añ ò gơs broă lơi pal cahrña cau bơdìh. Oh mi ò di cahrña ală cau tòm dơlam Hìu Jum Goh ò ơ?

¹³Be Sră Goh cih lah: “Tă sang tĕ cau iơh bơsak bơh digùl oh mi.”