Read koho I Kôrintô 6 Bible Online

I Kôrintô 6 - koho bible

I Kôrintô 6

¹Tòm tŭ cau lơi tòm oh mi dilah gơs bơta tòmpìt tòmhà mơ cau ndai, gen mbe oh mi khin yă di đap cau bơdìh, mơ ò cèng tus di đap cau sàng goh taih?

²Oh mi ò git lah ală cau sàng goh rơp cahrña dunnia ò ơ? Mơ dilah dunnia kong oh mi cahrña, gen oh mi ò tơl bơta jak chài nàng cahrña ală broă dềt rhền rlau jơh ơ?

³Oh mi ò git lah bol he rơp cahrña cau gơnrơh ò ơ? Tơ ài lah ală broă bal mơ rài kis do.

⁴Behơ̆, dilah oh mi pal cahrña ală broă bal mơ rài kis do, gen mbe lơh oh mi cèng ală bơta hơ̆ ai ală cau ò gơrê bal mơ Hìu Jum Goh lơh gơs cau cahrña taih?

⁵Añ đơs behơ̆ tồ lơh bol mê in ƀàssìl. Behơ̆ ngan sơl la tòm oh mi ò gơs dô nă cau lơi tơl jak chài nàng rgơi cahrña digùl cau dòn sơl ơ?

⁶Mơya oh mi yă wơn cau dòn, mơ cèng di đap cau ò dòn dê.

⁷Mơ tai, oh mi neh yă wơn bal mơ gơp, hơ̆ la kong alah rau. Ñchi bơh tài ò kong cau bơklơn la niam rlau taih? Ñchi bơh tài ò kong cau pơrlồm la niam rlau taih?

⁸Mơya, să tòm oh mi neh cahrña bơklơn mơ lơh blac pơrlồm di cau ndai, mơ kung lơh bơta hơ̆ di oh mi he tai.

⁹Ngan oh mi ò git lah ală cau ò song ring ò geh pơrdòn lơgar Yàng Tom Trồ dê. Bañ pơrlồm să he, ală cau rềs àr, cau duh rùp ràk, cau bơrnàn, cau klau dri tơlàr,

¹⁰cau ntung kơñau, cau hàm hà, cau bơñul lơmbè, cau lah sơrpah, cau sa kwà, jơh ală cau hơ̆ ò geh pơrdòn lơgar Yàng Tom Trồ.

¹¹Mơ tòm oh mi neh gơs cau behơ̆ sơl. Mơya tòm sơnđan Yàng Jesu Krist mơ Hwềng Yàng Tom Trồ bol he dê, gen oh mi neh geh rào goh bơh tồi glài, mơ oh mi neh geh ơn Yàng Tom Trồ in, mơ neh geh kòp la song ring hơ Yàng Tom Trồ.

¹²Gơs cau đơs lah: “Añ geh gơnoar lơh jơh ală bơta,” mơya ò di jơh ală bơta gơs kwơ mê in; añ rgơi đơs lah añ geh gơnoar lơh jơh ală bơta, mơya añ ò bài lơh dĭ dô bơta lơi in.

¹³Gơs cau ndai tai đơs lah: “Phan sa lơh hòm kơndul, mơ kơndul nàng prap phan sa;” ngan behơ̆, mơ Yàng Tom Trồ rơp tơnroh kơndul bal mơ phan sa. Mơya să jan ò di lòi lơh bơta rềs àr bơrnàn, mơya lòi duh broă Yàng mơ Yàng la Bơtau at bồ să jan oh mi dê.

¹⁴Mơ Yàng Tom Trồ neh lơh Yàng in kis wơl, kung rơp ai gơnap gơnoar Kơnràñ dê mơ lơh bol he in kis wơl sơl.

¹⁵Oh mi ò git lah să jan oh mi dê la pơnah tòm să jan Bơtau Krist dê ò ơ? Behơ̆ añ rgơi ai pơnah tòm să jan Bơtau Krist dê mơ lơh gơlik gơs pơnah tòm să jan cau dri sơl ơ? Ò di behơ̆!

¹⁶Hala oh mi ò git lah cau lơi đềt mềr bal mơ cau ùr dri gen gơlik gơs kung be dô nơm să bal mơ khai ò ơ? Bơh Sră Goh cih lah: “Bàr nă rơp gơlik gơs dô nơm poac bal.”

¹⁷Mơya cau lơi đềt mềr bal mơ Yàng gen gơlik gơs dô nơm hwềng nùs bal mơ Kơnràñ.

¹⁸Pleh tĕ di bơta rềs àr bơrnàn. Kòp nơm glài cau lơh la bơdìh să jan, mơya cau lơi tìs glài rềs àr bơrnàn, hơ̆ la tìs glài tòmdră mơ să jan he.

¹⁹Oh mi ò git lah să jan oh mi la hìu duh khoai Yàng Hwềng Goh dê ơm tòm oh mi, mơ oh mi neh dòp bơh Yàng Tom Trồ ò ơ? Mơ oh mi ò di gơrê bal mơ să tòm oh mi dê ò, mơya gơrê bal mơ Yàng Tom Trồ,

²⁰bơh oh mi neh geh rwat dô bă kas ngan; gen tàng ai tĕ să jan he mơ lơh gơklŏ Yàng Tom Trồ in.