Read koho I Kôrintô 7 Bible Online

I Kôrintô 7 - koho bible

I Kôrintô 7

¹Do la jơnau lùp ală bơta oh mi neh cih añ in. Cau klau ò bau hơ̆ la niam.

²Mơya tài bơh rngòt di bơta rềs àr bơrnàn, gen kòp nă cau klau pal gơs bau ùr, mơ kòp nă cau ùr kung pal gơs bau klau.

³Bau klau pal lơh sir broă gơwèt mơ bau ùr, mơ bau ùr gơwèt mơ bau klau kung behơ̆ sơl.

⁴Bau ùr ò gơs gơnoar hơđang să he, mơya gơrê bal mơ bau klau; mơ kung behơ̆ sơl, bau klau ò gơs gơnoar hơđang să he, mơya gơrê bal mơ bau ùr.

⁵Bañ ò ròm bal, mìng dilah tòm bàr nă gơs bơta tòmbơyai bal, nàng lòi tŭ hòi dan mơ Yàng dô êt jŏ; gen rê wơl bal, rngòt cà Satan bơh bơta hơ̆ mơ ơniai oh mi mòn.

⁶Mơya añ đơs ală jơnau hơ̆ be jơnau ai gơnoar, ò di la gơnoar sồr.

⁷Bulah behơ̆ añ kòñ jơh tơl nă ơm tòm toh be añ; mơya kòp nă gơs bơta ai gòi is bơh Yàng Tom Trồ, cau do be do, cau ne be dă.

⁸Mơya añ đơs mơ ală cau òhềt bau, mơ ală cau ùr bơnrau lah dilah bol khai kư̆ ơm be añ, hơ̆ la niam.

⁹Mơya dilah bol khai ò rgơi gàr să he, gen bau tĕ, bơh bau la niam rlau mơ lòi gơkòl nùs hàm kòñ is chồl bơtrut.

¹⁰Gơwèt mơ ală cau neh tòmbau gen añ nting, mơ ngan ò di la añ mơya la Yàng sồr lah: Bau ùr bañ tòmlòi mơ bau klau,

¹¹(mơ dilah khai neh tòmlòi mơ bau klau rau, gen pal kư̆ ơm is dô nă, hala tòmsòr wơl mơ bau klau); mơ bau klau bañ lòi bau ùr.

¹²Gơwèt mơ ală cau ndai, gen ò di la Yàng đơs mơya añ đơs mơ bol khai lah: Dilah oh mi lơi gơs bau ùr ò dòn Yàng, mơ bau ùr kòñ ơm mơ he, gen bañ lòi khai.

¹³Dilah cau ùr lơi gơs bau klau ò dòn Yàng, mơ bau klau kòñ ơm mơ he, gen bañ lòi bau klau.

¹⁴Bơh bau klau ò dòn Yàng, gen kơnòm di bau ùr mơ geh sàng goh; mơ bau ùr ò dòn Yàng, gen kơnòm di bau klau mơ geh sàng goh; dilah ò behơ̆ gen kòn oh mi dê ò gơrê bal mơ Yàng, mơya tŭ do gơrê bal mơ Yàng.

¹⁵Mơya dilah cau ò dòn Yàng kòñ cah is, gen lòi khai cah is; gen oh mi, cau ùr hala cau klau, ò gơs bơta rồn bơklơn lơi, bơh Yàng Tom Trồ neh hòi sac bol he tòm bơta ring lơngai.

¹⁶Ơ cau la bau ùr, ai ò git lah digơlan ai rơp dong klàs bau klau ai sơl ơ? Ơ cau la bau klau, mê ò git lah digơlan mê rơp dong klàs bau ùr mê sơl ơ?

¹⁷Mìng kòp nă cau pal lơh lòt jat bơta nđàc Yàng neh pà he in, mơ jat be Yàng Tom Trồ neh hòi sac. Hơ̆ la jơnau sơnio lam añ neh bơto tòm ală Hìu Jum Goh.

¹⁸Gơs cau neh kong siat gơltau mơ geh Yàng Tom Trồ hòi sac sơl? Cau hơ̆ bañ sang cơng tàng bơta siat gơltau. Gơs cau òhềt kong siat gơltau mơ geh hòi sac sơl? Cau hơ̆ bañ kong siat gơltau.

¹⁹Bơta siat gơltau hala ò siat gơltau ò di la dờng màng; bơta dờng màng la prap gàr ală bơta sồr lam Yàng Tom Trồ dê.

²⁰Dilah cau lơi geh Yàng Tom Trồ hòi sac ơm tòm gơnoar broă lơi, gen kư̆ ơm tĕ tòm gơnoar broă hơ̆.

²¹Mê gam ơm dĭ mơ geh hòi sac sơl? Bañ lơh dơrcul bơh bơta hơ̆, mơya dilah mê rgơi geh khat gơboh, gen ngui tĕ tŭ lơmpah hơ̆ la niam rlau.

²²Bơh cau ơm dĭ mơ geh Yàng hòi sac, gen hơ̆ la cau Yàng neh hồ toh; kung behơ̆ sơl, cau ơm khat gơboh mơ geh hòi sac, gen hơ̆ la dĭ gơna Bơtau Krist dê.

²³Bơh Yàng Tom Trồ neh rwat oh mi dô bă kas ngan, behơ̆ bañ gơlik gơs dĭ gơna poac să in.

²⁴Ơ oh mi, kòp nă cau neh geh hòi sac tòm tŭ ơm tòm gơnoar broă lơi, gen kư̆ ơm tĕ tòm gơnoar broă hơ̆ bal mơ Yàng Tom Trồ.

²⁵Bơh đah cau gam ơruh añ ò gơs jơnau sồr bơh Yàng; mơya añ yal tơlik bơta kơlôi añ jê, be dô nă cau neh geh Yàng kòñ nđàc, nàng lơh gơs cau di pal dòn kơnòm.

²⁶Behơ̆ añ kơlôi lah, tài bơh bơta bòl glar tŭ do, gen khai ơm behơ̆ la niam.

²⁷Mê neh kòl mơ bau ùr sơl? Bañ jòi bơta nàng lik klàs. Mê òhềt kòl kơt mơ bau ùr sơl? Bañ jòi bau.

²⁸Mơya dilah mê bau gen ò gơs glài, mơ dilah cau ơruh bau, kung ò gơs glài. Mơya cau hơ̆ rơp gơs bơta bòl glar tòm rài kis, gen tàng añ kòñ oh mi klàs bơh bơta hơ̆.

²⁹Behơ̆, ơ oh mi, añ đơs be do: Tŭ tơngai neh liah, bơh do jơl hìng nau ală cau gơs bau pal lơh be ò gơs;

³⁰cau ñìm kung be ò ñìm; cau hòn chò kung be ò hòn chò; cau rwat kung be ò gơs phan lơi;

³¹Ală cau ngui phan mơna dunnia, kung be cau ò ngui; tài bơh dunnia gơs tŭ do rơp lòt gan rlau.

³²Mơya añ kòñ oh mi ò càng kơlôi rcang. Cau lơi ò gơs bau, gen kơlôi rcang bơh broă Yàng nàng niam nùs Yàng;

³³mơya cau lơi gơs bau, gen kơlôi rcang bơh broă rài do, nàng niam nùs bau ùr:

³⁴Gen cau hơ̆ kơlôi rcang bàr pơnah. Cau ùr gơs bau mơ cau ơruh gơs pơnah krơi is: Cau ùr ò gơs bau gen kơlôi rcang bơh broă Yàng, nàng lòi jơh să jan mơ hwềng nùs gơs sàng goh; mơya cau ùr gơs bau gen kơlôi rcang bơh broă rài do nàng niam nùs bau klau.

³⁵Añ đơs bơta hơ̆ nàng gơs kwơ oh mi in; ò di la pơt dă oh mi in, mơya la bơh jơnau di gùng, nàng oh mi ò wil wơl tòm bơta duh broă Yàng.

³⁶Dilah cau lơi kơlôi khai lơh bơta ò di pal gơwèt mơ cau ơruh neh ho bau mơ khai, dilah gơs bơta gơchồl tòm nùs khai, mơ gơs bơta lơi pal lơh, gen lòi tĕ bol khai tòmbau, bơta hơ̆ ò di la glài.

³⁷Mơya cau lơi kơ̆ nùs, mơ ò gơs bơta bơklơn lơi, mơ gơs gơnoar hơđang nùs kòñ he dê, mơ neh lơh nền tòm nùs lòi cau ho bau mơ khai ơm ơruh, gen la niam.

³⁸Behơ̆ cau lơi bau mơ cau ơruh neh ho mơ khai, hơ̆ la niam, mơ cau lơi ò bau behơ̆ la niam rlau.

³⁹Bau klau gam kis kàr lơi, gen bau ùr kòl kơt mơ khai kàr hơ̆ sơl; mơya dilah bau klau chơt, gen bau ùr geh khat gơboh nàng jòi bau jat nùs kòñ, mìng khai la cau dòn Yàng.

⁴⁰Mơya jat bơta kơlôi añ jê, dilah khai kư̆ ơm behơ̆ gen geh lơngai rlau, mơ añ kơlôi añ kung gơs Yàng Hwềng Yàng Tom Trồ dê.