Read koho I Kôrintô 9 Bible Online

I Kôrintô 9 - koho bible

I Kôrintô 9

¹Añ ò di geh khat gơboh ò ơ? Añ ò di la cau gơnoar bơto dờng ò ơ? Añ ò di neh gŏ Yàng Jesu la Yàng bol he dê ò ơ? Oh mi ò di la broă añ jê tòm Yàng ò ơ?

²Dilah añ ò di la cau gơnoar bơto dờng ală cau ndai in, mơya añ kung la cau gơnoar bơto dờng oh mi in; bơh să tòm oh mi la ƀang kì gơnoar bơto dờng añ jê tòm Yàng.

³Do la bơta tò să añ jê nàng tòmdră wơl mơ cau sơwì lùp añ.

⁴Bol hi ò geh gơnoar sa mơ ñô sơl ơ?

⁵Bol hi ò geh gơnoar lam bau ùr lòt bal, kung be ală cau gơnoar bơto dờng ndai, ală oh mi Yàng dê mơ Sepha sơl ơ?

⁶Hala mìng dô nă añ mơ Banaba pal lơh broă nàng kis sơl ơ?

⁷Gơs cau ling lơi lòt tòmlơh mơ sa jền tòm ơ? Gơs cau lơi tam suơn ño mơ ò sa plai suơn hơ̆ ơ? Gơs cau lơi ròng mpồl phan mơ ò hùc dà toh gơ dê ơ?

⁸Añ ò pal kơryan să tòm añ bơh ală broă kòp ngai. Bơh bơta boh lam kung đơs behơ̆ sơl.

⁹Bơh neh cih tòm bơta boh lam Môise dê lah: “Mê bañ gla bơr kơnrồ tòm tŭ pơrjòt kòi.” Yàng Tom Trồ kơlôi rcang bơh kơnrồ sơl?

¹⁰Hala Kơnràñ ò di bơh bol he mơ đơs behơ̆ ơ? Ngan, tài bơh bol he mơ neh cih. Bơh cau lơòr pal gơn kơnòm di bơta lơòr, mơ cau jă kòi pal gơn kơnòm geh pơnah tòm kòi he jă.

¹¹Dilah bol hi neh sih gar đah hwềng oh mi in, mơ toès wơl đah poac să oh mi dê, gen bơta hơ̆ la oă ir sơl?

¹²Dilah cau ndai geh gơnoar hơ̆ hơđang oh mi, tơ ài lah bol hi taih? Bulah behơ̆ bol hi ò òs ngui gơnoar hơ̆, mơ pơrlơ̆ wơl, bol hi kong ơt tòm jơh ală bơta nàng klàs bơta kơryan Jơnau Niam Bơtau Krist dê.

¹³Ală oh mi ò git lah cau duh broă sàng goh gen sa phan tòm hìu duh khoai, mơ cau duh broă hơ cơnòng duh khoai gen geh pơnah bơh cơnòng duh khoai ò ơ?

¹⁴Yàng kung neh sồr nền lah cau lơi bơto yal Jơnau Niam gen kơnòm bơh Jơnau Niam mơ kis.

¹⁵Pơnah đah añ, añ ò ngui gơnoar hơ̆ ò, kung ò cih sră do nàng ai wơl gơnoar hơ̆; chan añ kong chơt la niam rlau mơ kong cau lơh bơta jòng să añ jê gơlik gơs ò kwơ.

¹⁶Bơh dilah añ bơto yal Jơnau Niam gen añ ò gơs bơta lơi nàng jòng să, bơh añ ơm hơđơm gơnoar sồr; mơya dilah añ ò bơto yal Jơnau Niam gen sơbơng rơng añ in.

¹⁷Dilah añ gơs nùs kòñ lơh broă hơ̆ gen geh phan ƀàn; mơya dilah ò gơs nùs kòñ lơh, gen gơnoar broă kung neh geh Yàng Tom Trồ jào añ in.

¹⁸Behơ̆ gen, phan ƀàn añ jê la ñchi taih? Hơ̆ la tòm tŭ bơto yal Jơnau Niam, gen bơto yal ò gơs jền tơngai, mơ ò ngui gơnoar añ neh gơs tòm Jơnau Niam.

¹⁹Bơh bulah añ neh geh khat gơboh gơwèt mơ jơh ală cau, gen añ kung kong lơh gơs dĭ gơna jơh ală cau in nàng añ in geh oă cau rlau.

²⁰Gơwèt mơ cau Juda, añ gơlik gơs be cau Juda tồ geh cau Juda. Gơwèt mơ cau ơm hơđơm bơta boh lam, bulah să tòm añ ò ơm hơđơm bơta boh lam, gen añ kung be cau ơm hơđơm bơta boh lam tồ geh cau ơm hơđơm bơta boh lam.

²¹Gơwèt mơ làng bol bơdìh añ kung be cau làng bol bơdìh, (bulah behơ̆, gơwèt mơ Yàng Tom Trồ, añ ò di la ò gơs bơta boh lam, mơya añ ơm hơđơm bơta boh lam Bơtau Krist dê), tồ geh cau làng bol bơdìh ơm bơdìh bơta boh lam cau Juda dê.

²²Gơwèt mơ cau lơbơn lơño, añ gơlik gơs be cau lơbơn lơño tồ geh cau lơbơn lơño; añ gơlik gơs jơh ală bơta tơl nă cau in nàng dong klàs dô êt cau, ò kòp la tòm ală bơta lơi.

²³Jơh ală broă añ lơh gen lơh tài bơh Jơnau Niam, tồ añ in kung geh tòmpà bơta lơngai lơngò Jơnau niam dê.

²⁴Oh mi ò git lah ală cau ntoat pơrlòng tòm tiah pơrlòng, gen jơh tơl nă ntoat bal, mơya mìng gơs dô nă dòp geh phan ƀàn ơ? Behơ̆, oh mi pal ntoat mbe lơi sồng geh phan ƀàn.

²⁵Jơh ală cau pơrlòng pràn tòm bơta pơrlòng, bơtê git kơrmap bơta boh lam kràñ cê tòm jơh ală bơta. Bol khai lơh behơ̆ mìng dòp sơgơn ồm lề, mơya bol he lơh behơ̆ nàng dòp sơgơn ò ồm lề.

²⁶Behơ̆ añ ntoat, ò di ntoat ò geh tơnggu; añ tòmlơh, ò di tòmlơh mơ càl:

²⁷Mơya añ bơklơn să jan añ jê mơ sồr gơ pal kong; rngòt tơnơ̆ mơ tŭ añ neh bơto yal ală cau ndai in, gen să tòm añ rơp ò di pal mòn.