Read koho II Kôrintô 1 Bible Online

II Kôrintô 1 - koho bible

II Kôrintô 1

¹Pol, jat nùs kòñ Yàng Tom Trồ dê, lơh gơs cau gơnoar bơto dờng bơh Yàng Krist Jesu, bal mơ oh mi he la Timôthe, pơyoa Hìu Jum Goh Yàng Tom Trồ in tòm Kôrintô, mơ jơh ală cau sàng goh in ơm làm jơh lơgar Acai.

²Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp bol he dê, mơ bơh Yàng Jesu Krist.

³Jòng ro ưnngài Yàng Tom Trồ, Bèp Yàng Jesu Krist bol he dê, la Bèp gơs nùs kòñ nđàc, la Yàng Tom Trồ ai jơh ală bơta pơndòm pơniang.

⁴Kơnràñ pơndòm pơniang bol hi tòm jơh ală bơta bòl glar bol hi dê, tồ bơh bơta pơndòm pơniang mơ Yàng Tom Trồ neh pơndòm pơniang bol hi, gen bol hi kung rgơi pơndòm pơniang cau ndai tòm bơta bòl glar lơi bol khai tìp sơl.

⁵Bơh be ală bơta jê sồt Bơtau Krist dê bềng lìu tòm bol hi be lơi, gen bơta pơndòm pơniang bol hi dê bơh Bơtau Krist kung bềng lìu behơ̆ sơl.

⁶Mơya dilah bol hi tìp bơta bòl glar, hơ̆ la tồ oh mi in geh pơndòm pơniang mơ geh dong klàs; dilah bol hi geh pơndòm pơniang, hơ̆ la tồ oh mi in geh pơndòm pơniang, mơ bơta pơndòm pơniang hơ̆ dong oh mi in kong jai tòm ală bơta bòl glar mơ bol hi kung neh kong behơ̆ sơl.

⁷Bơta gơn kơnòm bol hi dê bơh oh mi la kơ̆ cê ngan, bơh git lah be oh mi gơs pơnah tòm bơta bòl glar, gen tàng kung gơs pơnah tòm bơta pơndòm pơniang sơl.

⁸Ơ oh mi, bol hi kòñ oh mi git bơta bòl glar neh gơlik tus di bol hi tòm lơgar Asia, mbe bol hi neh kong àñ kơnjơ̆ oă ir, rlau mơ pràn he dê, tian gơs bol hi ò gơn kơnòm gam kis tai.

⁹Bol hi ngan neh kơlôi be la bol hi pal dòp bơta lơh nền glài chơt, tồ bol hi in ò kơnòm di să tòm he, mơya kơnòm di Yàng Tom Trồ la Bơtau lơh cau chơt in geh kis wơl.

¹⁰Kơnràñ neh dong tă bol hi klàs bơh bơta chơt dờng behơ̆, gam dong tă bol hi, mơ bol hi gam gơn kơnòm di Kơnràñ rơp dong tă bol hi tai sơl.

¹¹Ală oh mi kung ai jơnau hòi dan nàng dong kòl bol hi bal, tồ kơnòm di oă jơnau hòi dan gen bol hi dòp geh bơta lơngai lơngò mơ gơs oă cau bơh bol hi mơ ưnngài Yàng sơl.

¹²Bơh bơta hừh nùs bol hi dê la be do: Nùs tồr bol hi lơh cơng lah bol hi ai bơta sàng goh mơ bơta song ngan Yàng Tom Trồ dê mơ lơh lòt tòm dunnia do, sơnròp ngan la gơwèt mơ oh mi, ò kơnòm di bơta jak chài jat poac să dê, mơya kơnòm di bơta nđàc Yàng Tom Trồ dê.

¹³Bơh bol hi ò cih oh mi in bơta lơi rlau mơ bơta oh mi sền mơ git wă, mơ añ kơp kòñ oh mi rơp git wă jơh loh làng,

¹⁴kung be oh mi neh git wă dô êt bơh bol hi lah bol hi la bơta hòn chò oh mi dê, ò gơkrơi be oh mi kung la bơta hừh nùs bol hi dê tòm ngai Yàng Jesu bol he dê.

¹⁵Bơh bơta dòn nền cê hơ̆, añ neh lơh nền lài lòt còp oh mi, tồ oh mi in geh bơta nđàc rlau tai;

¹⁶kung bơh di oh mi mơ lòt hơ Masedoan, mơ bơh Masedoan rê wơl hơ oh mi, lồc behơ̆ kơnòm di oh mi jun añ lòt tus hơ Jude.

¹⁷Tòm tŭ añ lơh nền behơ̆ gen añ mhar tòmgơl nùs ơ? Hala bơta añ lơh nền hơ̆ la añ jat poac să mơ lơh nền, tian gơs tòm añ gơs bơta ƀà di ƀà ò sơl ơ?

¹⁸Ngan be Yàng Tom Trồ la Bơtau dòn song, gen jơnau bol hi đơs mơ oh mi kung ò di đơs ƀà di ƀà ò.

¹⁹Bơh Kòn Yàng Tom Trồ la Yàng Jesu Krist mơ bol hi, hơ̆ la añ mơ Silwan mơ Timôthe, neh bơto yal digùl oh mi, ò di đơs ƀà di ƀà ò; mơya tòm Kơnràñ mìng gơs bơta di lơm.

²⁰Bơh jơh ală jơnau ho pơgon Yàng Tom Trồ dê, bulah oă kung la di lơm tòm Kơnràñ, gen tàng bơh Kơnràñ mơ bol he đơs “Amen” nàng bơh bol he mơ Yàng Tom Trồ geh gơklŏ.

²¹Hơ̆ la Yàng Tom Trồ la Bơtau lơh kơ̆ nền bol hi mơ oh mi in tòm Bơtau Krist, mơ neh bong mơñà bol hi in;

²²Kơnràñ kung neh tap ƀang kì bol hi in mơ ai Yàng Hwềng tòm nùs bol hi nàng lơh gơs phan ai bồ.

²³Añ hòi dan mơ Yàng Tom Trồ lơh cơng hwềng soàn añ in lah: hơ̆ la tài bơh añ ò bài lơh pơnjê di oh mi tàng añ òhềt lòt tus hơ Kôrintô;

²⁴mơ ò di bol hi kòñ at bồ bơta dòn oh mi dê, mơya bol hi kòñ dong kòl bơta hòn chò oh mi dê, bơh oh mi geh ntào kơ̆ tòm bơta dòn.