Read koho II Kôrintô 13 Bible Online

II Kôrintô 13 - koho bible

II Kôrintô 13

¹Do la dơ̆ pe mơ añ lòt tus hơ oh mi. “Jơh ală broă geh lơh nền jat be jơnau bàr pe nă cau lơh cơng.” Jat jơnau Sră Goh đơs.

²Bơta hơ̆ añ neh đơs rau, tŭ do añ đơs dô dơ̆ tai, bulah ngai do añ neh ngkòi mat mơya ò gơkrơi be tŭ añ ơm mơ oh mi tòm dơ̆ bàr: Añ yal mơ cau lài òr neh tìs glài, mơ jơh ală cau ndai in lah dilah añ tus tai, gen ngan ò kong ơt tai,

³bơh oh mi jòi cơng tàng lah Bơtau Krist đơs tòm añ, la Bơtau gơwèt mơ oh mi ò di la lơbơn lơño, mơya bềng gơnoar pràn digùl oh mi.

⁴Bơh bulah tòm bơta lơbơn lơño Kơnràñ neh kong pơng đìn di chi pơng, mơya Kơnràñ kơnòm di gơnap gơnoar Yàng Tom Trồ dê mơ kis. Bol hi kung lơbơn lơño tòm Kơnràñ, mơya gơwèt mơ oh mi bol hi kơnòm di gơnap gơnoar Yàng Tom Trồ dê gen kung kis tòm Kơnràñ.

⁵Să tòm oh mi sơwì is tĕ, mơ lòng sền oh mi ơm tòm bơta dòn hala ò. Oh mi ò git lah gơs Yàng Jesu Krist ơm tòm oh mi sơl ơ? Mìng dilah ngan, oh mi kong alah tòm tŭ tìp bơta gơlòng.

⁶Nùs añ kơp kòñ oh mi rơp git lah bol hi ò di ò kong alah.

⁷Mơya bol hi hòi dan mơ Yàng Tom Trồ oh mi in bañ lơh broă iơh lơi, ò di nàng yal tơlik lah bol hi geh tơl rnoas, mơya tồ oh mi in lơh bơta niam, bulah bol hi gơlơh be neh kong alah rau.

⁸Bơh bol hi ò rgơi lơh bơta lơi tòmdră mơ jơnau song, mìng duh broă jơnau song lơm.

⁹Bulah bol hi lơbơn lơño mơ oh mi geh pràn kơldang, gen bol hi kung hòn chò; ai bơta bol hi hòi dan do hơ̆ la tồ oh mi in geh wil tơl.

¹⁰Tài bơh hơ̆, tŭ añ neh ngkòi mat añ neh cih ală bơta do, nàng dơ̆ añ tòm mat ò càng lơh kràñ cê, jat be gơnoar Yàng ai añ in nàng bơt bơtào, ò di nàng sòr tơrlah.

¹¹Tơnơ̆ wơl, ơ oh mi, hòn chò tĕ, gơs wil tơl tĕ; chồl pơndòm tĕ, gơs dô nùs kơlôi bal, gơtòmsòr bal tĕ, gen Yàng Tom Trồ la Bơtau ai bơta kòñ gơboh mơ bơta lơngap lơngai rơp ơm bal mơ oh mi. Ngac yơ!

¹²Ai tĕ bơta còp să sàng goh mơ còp să bal. Jơh ală cau sàng goh còp să oh mi.

¹³Dan bơta nđàc Yàng Jesu Krist dê, bơta kòñ gơboh Yàng Tom Trồ dê, mơ bơta gơtòmklac bal Yàng Hwềng Goh dê ơm bal mơ jơh tơl nă oh mi. Amen.