Read koho II Kôrintô 2 Bible Online

II Kôrintô 2 - koho bible

II Kôrintô 2

¹Behơ̆, añ neh lơh nền ò cèng bơta moat jrùng nàng tus wơl hơ oh mi.

²Bơh dilah añ lơh oh mi in moat jrùng, gen ñcau lơh añ in chò hòp rlau mơ cau mơ añ neh lơh moat jrùng hơ̆ taih?

³Añ neh cih bơta do oh mi in, rngòt tòm tŭ añ lòt tus, cau pal lơh añ in hòn chò rơp lơh añ in moat jrùng; añ kung dòn nền lah jơh ală oh mi ai bơta hòn chò añ jê mơ lơh gơs bơta hòn chò oh mi dê sơl.

⁴Mơ añ neh cih sră pơyoa oh mi in, tòm bơta bòl glar dờng mơ nùs jê sồt, dà mat hòr lik, ò di nàng lơh oh mi in moat jrùng, mơya nàng lơh oh mi in git bơta kòñ gơboh oă ngan añ jê gơwèt mơ ală oh mi.

⁵Mơya dilah gơs cau neh lơh gơs bơta moat jrùng, gen cau hơ̆ ò di mìng lơh añ in moat jrùng lơm, mơya kung lơh oh mi in moat jrùng dô êt; añ đơs dô êt do la tài bơh añ ò kòñ đơs rlau ir.

⁶Cau hơ̆ neh gơtìp oă cau lah pơrhơng, gen neh tơl rau;

⁷gơpơrlơ̆ wơl chan toh glài khai mơ pơndòm pơniang khai, rngòt khai gơplơ̆ nùs bơh bơta moat jrùng dờng ngan mòn.

⁸Behơ̆ añ dan oh mi ràng tơlik tĕ nùs kòñ gơboh gơwèt mơ cau hơ̆.

⁹Tài bơh hơ̆ mơ añ neh cih oh mi in, nàng lòng sền tồ git oh mi dòn bơr tòm ală bơta hala ò.

¹⁰Mơya oh mi toh glài cau lơi in, gen añ kung toh glài sơl. Bơh dilah añ neh toh glài, hơ̆ la tài bơh oh mi mơ toh glài di đap Bơtau Krist,

¹¹tồ cà Satan in ò geh pha lin mơ bol he, bơh bol he git kai lac lèo gơ dê.

¹²Tòm tŭ añ neh tus hơ Trôas nàng bơto yal Jơnau Niam bơh Bơtau Krist, dô nơm mpồng neh pò añ in tòm Yàng,

¹³mơya bơh añ ò tìp oh mi añ jê la Tit, gen hwềng nùs añ ò suk ơm, gen añ tơngac bol khai mơ lòt tơn hơ Masedoan.

¹⁴Mơya ưnngài Yàng Tom Trồ, Kơnràñ lam bồ bol hi dô bă pha lin tòm Bơtau Krist sùm sùm, mơ bơh bol hi Kơnràñ rsìh ƀô bơlhu bơh bơta dòp git Kơnràñ làm bă tiah.

¹⁵Bơh bol hi la ƀô bơlhu Bơtau Krist dê neh ơn Yàng Tom Trồ in, ơm digùl cau geh dong klàs mơ ơm digùl cau kòl roh rui;

¹⁶gơwèt mơ cau roh rui, ƀô bơta chơt dê lơh gơs chơt; gơwèt mơ cau geh dong klàs, ƀô bơta kis dê lơh gơs kis. Ñcau di pal lơh ală bơta do taih?

¹⁷Bol hi ò di ai jơnau Yàng Tom Trồ mơ lơh cồng nha is he in be oă cau ndai, mơya bol hi ai nùs song ngan bơh Yàng Tom Trồ mơ bơto yal jơnau hơ̆ di đap Yàng Tom Trồ tòm Bơtau Krist.