Read koho II Kôrintô 5 Bible Online

II Kôrintô 5 - koho bible

II Kôrintô 5

¹Bơh bol he git lah dilah hìu mơ ù ơm ing bol he dê tơrlơm lề, gen bol he gơs hìu gam sùm sùm hơđang trồ, bơh Yàng Tom Trồ lơh gơs, ò di bơh tê kòn mơnus.

²Ngan bol he rac ròc tòm hìu ing do mơ jơh nùs kơp kòñ geh dòp soh hìu bol he dê bơh đang trồ,

³mìng la bol he geh dòp soh mơ ò ơm kuh.

⁴Bol he rac ròc mơ kơnjơ̆ kơnjut tòm tŭ gam ơm tòm hìu ing do, bơh bol he ò di kòñ hồ bơta do mơya kòñ soh bơta ne tai, nàng bơta lơi òs chơt gơkòl bơta kis sa loan.

⁵Yàng Tom Trồ la Bơtau neh rcang lài bol he in geh bơta hơ̆, kung neh ai Yàng Hwềng bol he in nàng lơh gơs phan ai bồ.

⁶Behơ̆ bol he kơ̆ nùs sùm sùm, bơh git lah tòm tŭ bol he gam ơm tòm să jan do gen ngài bơh hìu Yàng,

⁷bơh bol he cơnđòa lòt bơh bơta dòn, ò di bơh mat gŏ.

⁸Behơ̆ gen bol he kơ̆ nùs sùm, chan kòñ sang lòi să jan do nàng ơm mơ Yàng gen niam rlau.

⁹Gen tàng, bulah bol he gam ơm hala lik klàs, kung jơh nùs lơh broă tồ niam nùs Kơnràñ.

¹⁰Bơh bol he jơh tơl nă pal ntào di đap tiah cahrña Bơtau Krist dê, tồ kòp nă cau in dòp geh jat be broă niam hala iơh he neh lơh tòm tŭ gam ơm tòm poac să.

¹¹Behơ̆, bol hi git lah pal duh rngòt di Yàng, gen tàng bơto pơndòm cau in dòn Yàng; mơya Yàng Tom Trồ neh git loh bol hi rau, mơ añ kơp kòñ la tòm nùs tồr oh mi kung git añ behơ̆ sơl.

¹²Bol hi ò tai yal tơlik is să he dê oh mi in, mơya kòñ ai oh mi in gơs tŭ jòng să tài bơh bol hi, tồ oh mi in geh bơta ho wơl mơ ală cau mìng jòng să bơh đah bơdìh mơ ò di bơh đah dơlam.

¹³Mơ tai, dilah bol hi sơnrang, hơ̆ la tài bơh Yàng Tom Trồ; hala dilah bol hi ngac ngar, hơ̆ la tài bơh oh mi.

¹⁴Bơh bơta kòñ gơboh Bơtau Krist dê lơh rngoh rngac bol hi, bơh bol hi kơlôi lah dilah gơs dô nă Cau neh chơt bơh tơl nă cau, gen tơl nă cau neh chơt sơl.

¹⁵Mơ cau hơ̆ neh chơt bơh tơl nă cau, tồ ală cau gam kis ò di kis să tòm he in tai, mơya kis Yàng in la Bơtau neh kong chơt mơ kis wơl ala bol khai.

¹⁶Tài behơ̆ gen tàng bơh do bol hi ò git đal cau lơi jat poac să; bulah bol hi neh git đal Bơtau Krist jat poac să, mơya tŭ do ò tai git đal Kơnràñ jat bơta hơ̆.

¹⁷Behơ̆ dilah cau lơi ơm tòm Bơtau Krist, hơ̆ la cau neh crơng gơs pa; ală bơta yau neh roh rau, do ală bơta gơlik gơs pa lơm.

¹⁸Jơh ală bơta hơ̆ gơlik gơs bơh Yàng Tom Trồ; Kơnràñ neh kơnòm di Bơtau Krist mơ lơh bol he in gơtòmsòr wơl mơ Kơnràñ, mơ jào bol hi in gơnoar broă lơh cau in gơtòmsòr wơl.

¹⁹Bơh Yàng Tom Trồ neh ơm tòm Bơtau Krist, lơh dunnia in gơtòmsòr wơl mơ Kơnràñ, ò kòp bơta tìs glài bol khai dê bơh yau òr, mơ neh jào bol hi in gơnoar broă lơh cau in gơtòmsòr wơl.

²⁰Behơ̆ bol hi la cau gơnoar ala mat Bơtau Krist dê, kung be Yàng Tom Trồ bơh bol hi mơ bơto tơngkah; bol hi ai sơnđan Bơtau Krist dan oh mi gơtòmsòr wơl tĕ mơ Yàng Tom Trồ.

²¹Yàng Tom Trồ neh lơh Bơtau ò git tồi glài gơlik gơs tồi glài bơh bol he, tồ ơm tòm Kơnràñ bol he geh gơlik gơs bơta song ring Yàng Tom Trồ dê.