Read koho II Kôrintô 8 Bible Online

II Kôrintô 8 - koho bible

II Kôrintô 8

¹Ơ oh mi, bol hi kòñ oh mi git bơh bơta nđàc Yàng Tom Trồ dê neh ai ală Hìu Jum Goh tòm Masedoan in:

²Tòm tŭ bol khai ơm tòm bơta gơlòng bòl glar dờng, mơya bềng bơta hòn chò. Tòm bơta siơ̆u siar rlau jơh, gen nùs dờng ơnàng bol khai gơlik gơs lìu làc.

³Bơh añ lơh cơng lah bol khai neh rì is jền jat pràn bol khai dê, mơ kung rlau mơ pràn bol khai dê sơl,

⁴mơ bol khai rac dan bol hi lòi bol khai in geh pơnah tòm bơta nđàc duh broă ală cau sàng goh in tòm Jude.

⁵Bol khai neh lơh rlau be bol hi neh kơp kòñ, mơya bol khai lơh neh jat nùs kòñ Yàng Tom Trồ dê: Sơnròp ngan bol khai ơn să Yàng in, tơnơ̆ tai kung ơn bol hi in sơl.

⁶Behơ̆ tàng bol hi neh chồl bơtrut Tit, kung lơh tĕ sir broă niam do digùl oh mi, be khai neh sơntòm lơh. Kư̆ lơh sùm mơ dong kòl oh mi lơh wil tơl bơta duh broă do bơh nùs kòñ gơboh.

⁷Behơ̆ gen, be oh mi neh geh lin rlau tòm jơh ală broă: Bơta dòn, jơnau đơs, git jak, ngac ngar, mơ nùs kòñ gơboh gơwèt mơ bol hi, gen bol hi kung kòñ oh mi dờng ơnàng tĕ tòm broă kòñ gơboh do.

⁸Añ đơs bơta hơ̆ ò di be gơnoar sồr, mơya bơh krơh ngac ngar cau ndai dê, nàng lòng bơta song ngan nùs kòñ gơboh oh mi dê la be lơi.

⁹Bơh oh mi git bơta nđàc Yàng Jesu Krist bol he dê: Kơnràñ la pas gơs mơya tài bơh oh mi tàng gơlik gơs rƀah, tồ oh mi in kơnòm bơh bơta rƀah Kơnràñ dê mơ gơlik pas gơs.

¹⁰Tòm broă do añ yal nùs kơlôi añ jê, broă hơ̆ gơs kwơ oh mi in, la cau ò di mìng pa sơntòm lơh, mơ kung neh gơs nùs kòñ lơh bơh nam lài rau.

¹¹Behơ̆ tŭ do, lơh wil tơl tĕ broă hơ̆, tồ be oh mi neh gơs nùs kòñ lơh gen kung jat pràn he mơ lơh wil tơl.

¹²Bơh dilah cau lơi gơs nùs kòñ ơn, gen phan ơn geh Yàng Tom Trồ dòp jat bơta he gơs, ò di jat bơta he ò gơs.

¹³Añ ò kòñ cau ndai in nggòc mơ oh mi kong kơnjơ̆ rlau, mơya lòi tơl nă geh ndròm bal.

¹⁴Tŭ do oh mi tơngkah tơngkañ, gen pal pà gòi cau siơ̆u siar in, tồ hìng nau bơta tơngkah tơngkañ bol khai dê kung rơp pà gòi tòm bơta siơ̆u siar oh mi dê, behơ̆ la ring bal.

¹⁵Kung be Sră Goh neh cih lah: “Cau neh khòm oă kung ò tơngkah, Cau khòm dô êt kung ò siơ̆u.”

¹⁶Ưnngài Yàng Tom Trồ, Kơnràñ neh ơn tòm nùs Tit gơs bơta kơlôi ngac ngar gơwèt mơ oh mi kung be añ sơl.

¹⁷Ò di khai mìng neh dòp jơnau hòi jà añ jê, mơya tài bơh să tòm khai kung ngac ngar gơs nùs kòñ lơh nền lòt tus hơ oh mi.

¹⁸Bol hi neh sồr dô nă oh mi lòt bal mơ Tit, la cau bơto yal Jơnau Niam, geh ală Hìu Jum Goh jòng ro.

¹⁹Ò di mìng behơ̆ ò, cau hơ̆ kung geh ală Hìu Jum Goh sac rwah, nàng lòt bal mơ bol hi tòm broă niam mơ bol hi rcang lơh do, nàng lơh gơklŏ Yàng in mơ ràng tơlik nùs duh hul bol hi dê;

²⁰Bol hi kơrhia ngan, tồ ò gơs cau lah pơrhơng bol hi tòm bơta ngui jền priă dờng geh ơn do.

²¹Bơh bol hi rcang kơlôi bơta niam ò di mìng di đap Yàng mơ kung di đap ală cau sơl.

²²Bol hi sồr tai dô nă oh mi lòt mơ bol khai, la cau mơ bol hi neh lòng oă dơ̆, mơ tŭ do khai ngac ngar rlau, tài bơh khai dòn kơnòm ngan di oh mi.

²³Đah mơ Tit, gen khai la bơyô lơh broă bal mơ añ nàng dong kòl oh mi; ai bàr nă oh mi ne la cau kong sồr ală Hìu Jum Goh dê, la bơta gơklŏ Bơtau Krist dê.

²⁴Behơ̆, ơm di đap ală Hìu Jum Goh, ală oh mi yal tĕ bol khai in nùs kòñ gơboh oh mi dê, mơ bơta jòng să bol hi dê bơh oh mi la di ngan.