Read koho Galati 1 Bible Online

Galati 1 - koho bible

Galati 1

¹Pol, geh hòi sac lơh gơs cau gơnoar bơto dờng, ò di bơh jơi kòn mơnus, kung ò bơh dô nă cau lơi, mơya bơh Yàng Jesu Krist mơ Yàng Tom Trồ la Bèp, hơ̆ la Bơtau neh lơh Kơnràñ in kis wơl bơh bơta chơt.

²Añ bal mơ jơh ală oh mi ơm bal mơ añ, pơyoa ală Hìu Jum Goh in tòm Galati:

³Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp, mơ bơh Yàng Jesu Krist la Yàng bol he dê,

⁴la Bơtau neh phi să bơh tồi glài bol he dê, nàng dong tă bol he klàs bơh rài iơh do, jat be nùs kòñ Yàng Tom Trồ la Bèp bol he dê.

⁵Dan Yàng Tom Trồ in geh gơklŏ sùm sùm ò lồi. Amen.

⁶Añ ai lơh krơi bơh oh mi neh sơrbac sơrbang sang Bơtau neh hòi sac oh mi bơh bơta nđàc Bơtau Krist dê, nàng jat jơnau niam ndai.

⁷Ngan, ò gơs jơnau niam ndai ò, mơya mìng gơs ală cau lơh dơrcul oh mi gơ dê, mơ kòñ oh mi sang lòi Jơnau Niam Bơtau Krist dê.

⁸Mơya bulah bol hi hala cau gơnrơh bơh đang trồ bơto yal oh mi in dô nơm jơnau niam lơi ndai, krơi is mơ Jơnau Niam bol hi neh bơto yal oh mi in, gen cau hơ̆ pal gơkòl srat rma!

⁹Bol hi neh đơs rau, do añ đơs dô dơ̆ tai: Dilah cau lơi bơto yal oh mi in dô nơm jơnau niam lơi ndai, krơi is mơ Jơnau Niam oh mi neh dòp hơ̆, gen cau hơ̆ pal gơkòl srat rma.

¹⁰Ai tŭ do, añ jòi bơta nàng lơh niam nùs kòn mơnus hala lơh niam nùs Yàng Tom Trồ taih? Añ kòñ lơh niam nùs kòn mơnus ơ? Dilah añ gam kòñ lơh niam nùs kòn mơnus, gen añ ò di la dĭ gơna Bơtau Krist dê ò.

¹¹Ơ oh mi, añ kòñ oh mi in git lah: Jơnau Niam añ neh bơto yal do, ò di tus bơh kòn mơnus;

¹²bơh añ ò dòp mơ kung ò bơtê Jơnau Niam hơ̆ bơh dô nă cau lơi, mơya neh dòp geh bơh jơnau yal tơlik Yàng Jesu Krist dê.

¹³Oh mi ngan neh kơno bơh bơta ngac ngar lài òr añ jê tòm gùng duh khoai cau Juda dê, be añ neh kup kơryan mơ lơh gơprah gơpring Hìu Jum Goh Yàng Tom Trồ dê ò git lơh;

¹⁴añ ntoat tơngguh tòm gùng duh khoai cau Juda dê rlau jơh mơ ală cau dô rơh dô rài bal mơ añ: Añ la cau ngac ngar rlau jơh bơh jơnau òs yau ồng pàng añ jê.

¹⁵Mơya dơ̆ Yàng Tom Trồ, la Bơtau neh ơn is añ bơh tòm kơndul mè, mơ ai bơta nđàc hòi sac añ nàng duh broă Kơnràñ,

¹⁶mơ niam nùs yal tơlik Kòn Kơnràñ dê tòm añ, tồ añ in bơto yal bơh Kòn hơ̆ digùl làng bol bơdìh, gen añ ò càng bơyai mơ cau lơi.

¹⁷Añ kung ò guh hơ Jerusalem nàng tìp ală cau neh gơs gơnoar bơto dờng lài mơ añ, mơya añ lòt hơ lơgar Arabi; gen añ rê wơl hơ Damas.

¹⁸Tơnơ̆ mơ pe nam, gen añ guh hơ Jerusalem, nàng lơh yô mơ Sepha, mơ añ ơm mơ khai tòm jơt pram ngai;

¹⁹mơya añ ò tìp dô nă cau gơnoar bơto dờng lơi ndai, mìng dô nă Jakơ la oh Yàng dê.

²⁰Bơta añ cih oh mi in do la ngan, di đap Yàng Tom Trồ añ ò đơs blac.

²¹Tơnơ̆ tai añ lòt tơn tòm ală kơnhwàl lơgar Siri mơ Silisi.

²²Tŭ hơ̆ añ gam la cau crih mat tòm ală Hìu Jum Goh Bơtau Krist dê tòm lơgar Jude.

²³Bol khai mìng kơno lah: “Cau neh kup kơryan bol he lài òr, tŭ do bơto yal jơnau niam la jơnau lài òr khai neh jơh nùs tơnroh.”

²⁴Behơ̆, tài bơh añ gen tàng bol khai jòng ro Yàng Tom Trồ.