Read koho Galati 4 Bible Online

Galati 4 - koho bible

Galati 4

¹Añ đơs lah cau pơrdòn bulah khai geh gơnoar hơđang jơh ală phan mơna, mơya tòm tŭ gam dềt gen kung ò gơkrơi be cau dĭ sơl;

²khai pal ơm tòm gơnoar cau dong kòl mơ cau at bồ hìu, jơl tus di ngai cau bèp neh lơh nền.

³Bol he kung behơ̆ sơl: Tòm tŭ gam dềt gen neh lơh gơs dĭ bơta ƀă liă dunnia dê.

⁴Mơya tòm tŭ tơngai neh tus rau, Yàng Tom Trồ sồr Kòn Kơnràñ lòt tus, lik lìng bơh dô nă cau ùr, lik lìng ơm tòm gơnoar bơta boh lam dê,

⁵nàng tơwài ală cau ơm tòm gơnoar bơta boh lam dê, tồ bol he in geh kòp la kòn klau kòn ùr Kơnràñ dê.

⁶Bơh oh mi la kòn klau kòn ùr Kơnràñ dê, gen tàng Yàng Tom Trồ neh ai Hwềng Kòn Kơnràñ dê mut tòm nùs bol he mơ đơs lah: “Aba! Bèp!”

⁷Behơ̆ gen mê ò di la dĭ gơna tai, mơya la kòn klau kòn ùr, gen kung la cau pơrdòn bơh Yàng Tom Trồ sơl.

⁸Mơya bơh yau òr oh mi ò git Yàng Tom Trồ, gen lơh gơs dĭ ală yàng dê mơya ngan ò di la Yàng.

⁹Mơya tŭ do oh mi neh git Yàng Tom Trồ, hala pal đơs lah geh Yàng Tom Trồ git oh mi, gen mbe oh mi rê wơl hơ bơta ƀă liă lơbơn lơño ò kwơ hơ̆? Mơ ñchi bơh tài kòñ lơh dĭ gơ in tai taih?

¹⁰Oh mi gam prap gàr ngai, kơnhai, prap kơnhai mìu mơ prang, prap nam.

¹¹Añ rngòt añ neh kong bòl glar lơh broă gen gơlik gơs ò kwơ digùl oh mi mòn.

¹²Ơ oh mi, añ dan oh mi gơlik gơs tĕ be añ; bơh añ kung be oh mi sơl. Oh mi ò lơh bơta lơi iơh di añ.

¹³Oh mi git lah tòm tŭ poac să añ kòp jê mơ añ neh bơto yal Jơnau Niam oh mi in dơ̆ sơnròp,

¹⁴bulah poac să añ jê lơh oh mi in tìp bơta ơniai, mơya oh mi ò sền òsơp di añ, kung ò sang lòi añ, mơya wă rò añ kung be dô nă cau gơnrơh Yàng Tom Trồ dê, be să tòm Yàng Krist Jesu.

¹⁵Oh mi hòn chò oă ngan! Ñchi bơta neh gơlik gơs taih? Bơh añ lơh cơng lah dilah rgơi gen oh mi kung klĕ gar mat oh mi dê mơ ai añ in sơl.

¹⁶Añ ai jơnau song đơs mơ oh mi, gen añ gơlik gơs cau sò tơm di oh mi sơl ơ?

¹⁷Ală cau hơ̆ ngac ngar bơh oh mi, ò di bơh nùs niam; mơya bol khai kòñ oh mi sang bol hi, tồ oh mi ngac ngar lòt jat bol khai.

¹⁸Gơs nùs ngac ngar bơh bơta niam la di ngan, tŭ lơi kung di lơm, ò di mìng tòm tŭ añ ơm digùl oh mi lơm ò.

¹⁹Ơ ală kòn dềt añ jê, bơh ală kòn tàng añ kong tai bơta jê sồt kung be cau jê deh, jơl tus di tŭ Bơtau Krist gơs rùp să tòm ală kòn;

²⁰añ kơp kòñ añ gơs mat ơm bal mơ ală kòn tŭ do, mơ añ rgơi tòmgơl jơnau đơs añ jê nàng di pal, bơh añ ò suk ơm ngan bơh ală kòn.

²¹Yal tĕ añ in git, ơ ală cau kòñ ơm tòm gơnoar bơta boh lam dê, oh mi ò kơno bơta boh lam sơl ơ?

²²Bơh neh cih lah Abraham gơs bàr nă kòn klau: Dô nă la kòn cau ùr dĭ dê, dô nă la kòn cau ùr tòm dê.

²³Mơya kòn cau ùr dĭ dê tơnggơs jat poac să, ai kòn cau ùr tòm dê tơnggơs jat jơnau ho pơgon.

²⁴Ală bơta hơ̆ lơh rùp sơnio be do: Bàr nă cau ùr hơ̆ la bàr nơm jơnau ho bal, dùl la jơnau ho bal di mơnơm Sinai, deh kòn nàng lơh gơs dĭ, hơ̆ la Agar.

²⁵Agar hơ̆ la mơnơm Sinai tòm lơgar Arabi, kung ò gơkrơi be Jerusalem tòm tŭ do, ƀòn hơ̆ bal mơ kòn sau gơ dê lơh gơs dĭ gơna.

²⁶Mơya Jerusalem ơm hơđang jòng la ƀòn khat gơboh, hơ̆ la mè bol he dê.

²⁷Bơh Sră Goh neh cih lah: “Ơ cau ùr kơnền la cau ò gơs tŭ lơi deh, hòn chò tĕ; Ơ cau ò gơs tŭ lơi kong jê deh, ai tĕ jơnau driau chò, Bơh cau ùr kòl cau sang lòi rơp gơs kòn sau oă rlau mơ kòn sau cau ùr gơs bau dê.”

²⁸Ơ oh mi, bol he la kòn bơh jơnau ho pơgon kung be Isak.

²⁹Mơya be tòm tŭ hơ̆, kòn deh jat poac să kup kơryan kòn deh jat Yàng Hwềng, gen tŭ do kung behơ̆ sơl.

³⁰Mơya ñchi Sră Goh đơs taih? “Bơtrơh tĕ cau ùr dĭ mơ kòn klau khai dê; bơh kòn klau cau ùr dĭ dê rơp ò geh pơrdòn bal mơ kòn klau cau ùr tòm dê.”

³¹Behơ̆, ơ oh mi, bol he ò di la kòn sau cau ùr dĭ dê, mơya la kòn sau cau ùr tòm dê.