Read koho Galati 6 Bible Online

Galati 6 - koho bible

Galati 6

¹Ơ oh mi, dilah gơs cau lơi nisơna gơtơntìs glài lơi, gen oh mi la cau gơs Yàng Hwềng, ai tĕ nùs niam lơnhơn nàng dong kòl bol khai; să tòm oh mi kơrmap gàr tĕ, rngòt kung gơkòl ơniai sơl.

²Àñ tĕ ơnòng kơnjơ̆ bal mơ gơp, behơ̆ sồng oh mi lơh jat wil tơl bơta boh lam Bơtau Krist dê.

³Bơh dilah gơs cau lơi kơlôi să tòm khai la cau kwơ màng, mơya ngan khai la cau ò kwơ dô êt lơi, gen khai pơrlồm is să khai dê.

⁴Kòp nă cau pal lòng sơwì is broă lơh he dê, gen bơta jòng să he la tài bơh he dê lơm, ò di tài bơh cau ndai.

⁵Bơh kòp nă pal àñ is ơnòng kơnjơ̆ he dê.

⁶Bulah behơ̆, cau lơi geh cau bơto jơnau niam he in, gen ai tĕ tòm jơh ală phan ngui sa he dê nàng pà bal cau bơto hơ̆ in.

⁷Bañ pơrlồm să he; Yàng Tom Trồ ò lòi cau sền òsơp di Yàng ò, bơh cau sih gar lơi, gen toès wơl gar hơ̆.

⁸Cau lơi sih jat poac să, gen bơh poac să rơp toès bơta ồm lề; mơya cau lơi sih jat Yàng Hwềng, gen rơp bơh Yàng Hwềng mơ toès bơta kis gam sùm sùm.

⁹Bol he bañ ruc wơl tòm bơta lơh broă niam, bơh dilah bol he ò gơplơ̆ nùs, gen tus di tŭ tơngai bol he rơp toès.

¹⁰Behơ̆ tòm tŭ gam gơs tơngai, gen bol he lơh tĕ broă niam jơh ală cau in, sơnròp ngan la ală cau tòm hìu nhă bơta dòn dê.

¹¹Sền tĕ tê tòm añ cih sră pơyoa do oh mi in, jơnau cih dờng ngan ò git lơh.

¹²Ală cau lơi kòñ ràng tơlik bơta niam poac să dê, gen bơklơn oh mi pal kong siat gơltau, tồ bol khai pleh klàs di bơta kup kơryan bơh chi pơng Bơtau Krist dê.

¹³Bơh să tòm ală cau hơ̆ neh kong siat gơltau, mơ bol khai kung ò prap gàr bơta boh lam ò; mơya bol khai kòñ oh mi kong siat gơltau, nàng bol khai rgơi jòng să tòm poac să oh mi dê.

¹⁴Đah mơ añ, ngan añ ò bài jòng să, mìng jòng să bơh chi pơng Yàng Jesu Krist bol he dê lơm; bơh chi pơng hơ̆, dunnia gơwèt mơ añ neh kòl pơng đìn, añ gơwèt mơ dunnia kung behơ̆ sơl!

¹⁵Bơh bơta dờng màng ò di la kong siat gơltau hala ò kong siat gơltau, mơya la gơlik gơs cau pa.

¹⁶Dan bơta lơngap lơngai mơ bơta kòñ nđàc mù hơđang jơh ală cau lơh jat bơta sơnoa rnoas do, mơ hơđang làng bol Israel Yàng Tom Trồ dê sơl.

¹⁷Bơh do jơl hìng nau bañ gơs cau lơi lơh bòl glar kalke añ in tai, bơh să jan añ neh gơs tềl sồt Yàng Jesu dê.

¹⁸Ơ oh mi, dan bơta nđàc Yàng Jesu Krist bol he dê ơm bal mơ hwềng nùs oh mi dê. Amen.