Read koho Ephesô 1 Bible Online

Ephesô 1 - koho bible

Ephesô 1

¹Pol la cau gơnoar bơto dờng bơh Yàng Krist Jesu jat nùs kòñ Yàng Tom Trồ dê, pơyoa ală cau sàng goh in tòm Ephesô mơ ală cau dòn song tòm Yàng Krist Jesu:

²Dan oh mi in geh bơta nđàc, mơ bơta lơngap lơngai, bơh Yàng Tom Trồ la Bèp bol he dê, mơ bơh Yàng Jesu Krist.

³Jòng ro Yàng Tom Trồ la Bèp Yàng Jesu Krist bol he dê. Kơnràñ neh ai lơngai bol he in tòm Bơtau Krist, tơl ală bơta lơngai đah hwềng bơh đang trồ.

⁴Lài mơ tŭ crơng gơs trồ tiah Kơnràñ neh sac rwah bol he tòm Bơtau Krist, nàng bol he in geh sàng goh, ò gơs tiah geh lah pơrhơng di đap Yàng Tom Trồ.

⁵Bơh bơta kòñ gơboh, Kơnràñ neh lơh nền lài bol he in kơnòm di Yàng Jesu Krist nàng geh kòp la kòn klau kòn ùr, jat be nùs kòñ niam Kơnràñ dê,

⁶nàng jòng ro bơta nđàc gơklŏ Kơnràñ dê, mơ Kơnràñ neh ai gòi bol he in tòm Kòn kòñ gơboh Kơnràñ dê.

⁷Tòm Kòn hơ̆ bol he geh bơta tơwài glài bơh mhàm Kơnràñ dê, geh toh ală bơta tìs glài bol he dê, jat bơta nđàc dờng ngan Yàng Tom Trồ dê,

⁸Mơ Kơnràñ neh tuh lìu làc hơđang bol he, hơ̆ la bơta jak chài mơ bơta àng loh wil tơl.

⁹Yàng Tom Trồ neh ai bol he in git bơta ndơp ndơr nùs kòñ Kơnràñ dê, jat be bơta niam nùs Kơnràñ dê mơ Kơnràñ neh lơh nền tòm Bơtau Krist,

¹⁰nàng lơh gơlik gơs di di tŭ tŭ tơngai geh wil tơl, hơ̆ la nàng pơjum bal jơh ală bơta tòm Bơtau Krist, bulah bơta hơđang trồ hala bơta tòm ù.

¹¹Hơ̆ la tòm Bơtau Krist mơ bol he neh dòp geh sre brê, jat be bơta lơh nền lài Yàng Tom Trồ dê, la Bơtau rgơi lơh wil tơl jơh ală bơta jat nùs kòñ Kơnràñ dê.

¹²Nùs kòñ hơ̆ la bol he, la cau sơnròp ngan neh kơnòm di Bơtau Krist, pal kis dô bă di pal nàng jòng ro bơta gơklŏ Kơnràñ dê.

¹³Mơ oh mi kung neh gơlik gơs cau sàng goh tơnơ̆ mơ tŭ oh mi neh kơno jơnau song, la Jơnau Niam bơta dong klàs oh mi dê, mơ neh dòn di Yàng Jesu, geh tap ƀang kì mơ Yàng Hwềng Goh mơ Yàng neh ho pơgon.

¹⁴Yàng Hwềng Goh la phan ai bồ sre brê bol he dê, jơl tus di tŭ Yàng Tom Trồ tơwài wơl làng bol Kơnràñ dê, nàng jòng ro bơta gơklŏ Kơnràñ dê.

¹⁵Tài behơ̆, tơnơ̆ mơ tŭ añ neh kơno bơh oh mi gơs bơta dòn di Yàng Jesu, mơ bơta kòñ gơboh oh mi dê gơwèt mơ jơh ală cau sàng goh,

¹⁶gen añ tài bơh oh mi mơ ưnngài Yàng Tom Trồ ò dơh. Añ òs kah oh mi tòm tŭ hòi dan.

¹⁷Mơ dan Yàng Tom Trồ Yàng Jesu Krist bol he dê, la Bèp gơklŏ, ai oh mi in hwềng nùs jak chài mơ bơta yal tơlik nàng dòp git Kơnràñ.

¹⁸Dan Yàng Tom Trồ sòl pơnđàng tòm nùs oh mi dê, tồ oh mi in rgơi git bơta gơn kơnòm bơh bơta hòi sac Kơnràñ dê la mbe lơi, sre brê gơklŏ crih crài Kơnràñ dê tòm ală cau sàng goh la mbe lơi,

¹⁹mơ git gơnap gơnoar Kơnràñ dê la dờng ngan ò git lơh gơwèt mơ bol he la cau dòn, jat be bơta yal tơlik bơh bơta pràn kơldang mơ gơnoar pràn Kơnràñ dê.

²⁰Yàng Tom Trồ neh ngui gơnap gơnoar nàng lơh broă tòm Bơtau Krist, tòm tŭ lơh Bơtau hơ̆ in kis wơl bơh bơta chơt, mơ lơh Bơtau hơ̆ in nggui đah ma Kơnràñ hơđang trồ,

²¹jòng rlau jơh ală gơnoar at bồ, gơnoar, gơnoar pràn, bơta at bồ, mơ jơh ală sơnđan, ò di mìng tòm rài do lơm, mơya kung tòm rài rơp tus sơl.

²²Yàng Tom Trồ lơh jơh ală bơta dòn duh hơđơm jơng Bơtau Krist dê, pồ bơtào Bơtau Krist lam bồ jơh ală bơta tòm Hìu Jum Goh.

²³Hìu Jum Goh la să jan Kơnràñ dê, tòm hơ̆ gơs bơta lìu làc Bơtau Krist dê, la Bơtau gơs bơta bềng tơl tòm jơh ală bơta.