Read koho Ephesô 5 Bible Online

Ephesô 5 - koho bible

Ephesô 5

¹Behơ̆, bơh oh mi la kòn sau kòñ gơboh Yàng Tom Trồ dê, gen đòm jat tĕ Kơnràñ.

²Cơnđòa lòt tĕ tòm bơta kòñ gơboh, kung be Bơtau Krist neh kòñ gơboh di bol he mơ phi să tòm Kơnràñ dê bơh bol he, nàng lơh gơs phan ơn mơ phan ơn duh khoai gơs ƀô bơlhu Yàng Tom Trồ in.

³Digùl oh mi bañ đơs bơh bơta rềs àr bơrnàn, mơ jơh ală bơta ngkòr ngkàc, hala bơta hàm hà; behơ̆ gen sồng di pal la ală cau sàng goh.

⁴Kung bañ đơs jơnau pàp tràl, hala đơs lềng, hala đơs lèo, hơ̆ la ală bơta ò di pal, mơya chan ưnngài Yàng Tom Trồ la niam rlau.

⁵Bơh oh mi git loh làng bơta do: Cau rềs àr bơrnàn, cau ngkòr ngkàc, cau hàm hà la cau duh rùp ràk, bol khai ò gơs sre brê lơi tòm lơgar Bơtau Krist mơ Yàng Tom Trồ dê.

⁶Bañ lòi cau lơi ai jơnau roh lơm mơ pơrlồm oh mi, tài bơh ală bơta hơ̆ mơ bơta gơjrañ dờng Yàng Tom Trồ dê dùh hơđang ală cau ò dòn bơr Yàng.

⁷Behơ̆ bañ gơs pơnah bal mơ bol khai.

⁸Bơh lài òr oh mi la klam jơngo, mơya tŭ do oh mi la àng tòm Yàng; lơh lòt tĕ be cau ơm tòm bơta àng,

⁹(bơh plai bơta àng dê ơm tòm jơh ală bơta lơbơn niam, song ring, mơ song ngan),

¹⁰mơ sền sơwì tĕ bơta lơi niam nùs Yàng.

¹¹Bañ gơs bơta gơtòmklac bal tòm broă ò kwơ bơta klam jơngo dê, chan lah pơrhơng bol khai la niam rlau,

¹²bơh ală bơta bol khai lơh tòm tiah ndơp ndơr, đơs bơh bơta hơ̆ gen neh ƀàssìl rau.

¹³Mơya jơh ală bơta tòm tŭ kòl ràng tơlik bơh bơta àng, gen cau rgơi gŏ gơ loh làng.

¹⁴Gen tàng neh đơs lah: “Ơ cau lơhă bic ne, kah tĕ, Guh tĕ bơh digùl ală cau chơt, Gen Bơtau Krist rơp sòl pơnđàng hơđang mê.”

¹⁵Behơ̆ kơrhia tĕ bơh bơta lơh lòt oh mi dê, bañ lơh be cau ò jak chài, mơya lơh be cau jak chài.

¹⁶Pơlai tĕ tŭ tơngai, tài bơh ală ngai la iơh.

¹⁷Gen tàng bañ tùl gơla, mơya pal git wă nùs kòñ Yàng dê la mbe lơi.

¹⁸Bañ bơñul ñô, bơh bơta hơ̆ la bung jang, mơya bềng lìu tĕ Yàng Hwềng.

¹⁹Ngui ală bơta đơs crih, bơta đơs chò, mơ sèng đơs chò đah hwềng mơ đơs chò bal, bơr đơs chò mơ nùs jòng ro Yàng.

²⁰Bơh jơh ală bơta oh mi pal ai sơnđan Yàng Jesu Krist bol he dê mơ sùm sùm ưnngài Yàng Tom Trồ la Bèp.

²¹Duh rngòt tĕ di Bơtau Krist mơ dòn duh bal mơ gơp.

²²Ơ cau la bau ùr, dòn duh tĕ bau klau ai dê, kung be gơwèt mơ Yàng.

²³Bơh bau klau la bồ bau ùr dê, kung be Bơtau Krist la bồ Hìu Jum Goh dê, Hìu Jum Goh la să jan Bơtau Krist, mơ Kơnràñ kung la Yàng Dong Klàs Hìu Jum Goh dê.

²⁴Behơ̆ tàng be Hìu Jum Goh dòn duh Bơtau Krist gen bau ùr kung pal dòn duh bau klau he tòm jơh ală bơta sơl.

²⁵Ơ cau la bau klau, kòñ gơboh tĕ di bau ùr mê dê, kung be Bơtau Krist neh kòñ gơboh di Hìu Jum Goh, mơ phi să tòm Kơnràñ bơh Hìu Jum Goh,

²⁶nàng tơnơ̆ mơ tŭ neh ngui dà mơ Jơnau Yàng nàng rào goh rau, gen lơh Hìu Jum Goh gơlik gơs sàng goh,

²⁷nàng Kơnràñ ràng tơlik di đap Kơnràñ Hìu Jum Goh la gơklŏ, ò gơs tềl ƀơ̆, ò gơkrồn, ò gơs phan lơi tòm toh behơ̆, mơya sàng goh, ò gơs tiah geh lah pơrhơng.

²⁸Kung behơ̆ sơl bau klau pal kòñ gơboh di bau ùr he be să jan he. Cau lơi kòñ gơboh di bau ùr he la kòñ gơboh di să tòm he sơl.

²⁹Bơh ò gơs cau lơi gơjrañ kơuềng di poac să he, mơya ròng siam sền gàr gơ be Bơtau Krist gơwèt mơ Hìu Jum Goh sơl,

³⁰tài bơh bol he la pơnah tòm să jan Kơnràñ dê.

³¹Be jơnau Sră Goh đơs lah: “Tài bơh hơ̆ cau klau pal lik bơh mè bèp he mơ đềt mềr mơ bau ùr he; bàr nă gơlik gơs dô nơm poac bal.”

³²Bơta ndơp ndơr do la dờng, mơya añ đơs bơh Bơtau Krist mơ Hìu Jum Goh.

³³Bulah behơ̆, kòp nă tòm oh mi pal kòñ gơboh di bau ùr he be să tòm he, ai bau ùr gen pal duh rngòt di bau klau.