Read koho Ephesô 6 Bible Online

Ephesô 6 - koho bible

Ephesô 6

¹Ơ cau la kòn, dòn bơr tĕ mè bèp mê dê tòm Yàng, bơh bơta hơ̆ la di ngan.

²“Dòn duh tĕ mè bèp mê dê,” (hơ̆ la bơta sồr lam sơnròp mơ gơs jơnau ho pơgon pơnjat tai sơl).

³“Tồ mê in geh lơngai mơ kis jŏ hơđang ù.”

⁴Ơ cau la bèp, bañ lơh kòn he in gơjrañ, mơya ngui tĕ bơta lơh glài tơmàl mơ jơnau bơto tơngkah Yàng dê nàng ròng siam bol khai.

⁵Ơ cau la dĭ gơna, pal rngòt rơm să tĕ, ai nùs song ngan mơ dòn bơr cau tòm he dê jat đah poac să, be gơwèt mơ Bơtau Krist,

⁶ò di jat bơta duh broă tòm mat, be cau jòi bơta lơh niam nùs cau, mơya be cau dĭ gơna Bơtau Krist dê, jơh nùs lơh jat nùs kòñ Yàng Tom Trồ dê.

⁷Lơh broă tĕ ngac ngar be lơh Yàng in, ò di be lơh cau in ò,

⁸Kah tĕ lah Yàng rơp ai phan ƀàn kòp nă cau in, bulah cau dĭ gơna hala cau khat gơboh kung behơ̆ sơl, jat be broă niam lơi bol khai lơh.

⁹Ơ cau la cau tòm, gơwèt tĕ mơ bol khai dô bă behơ̆ sơl, bañ pơhìn bol khai, bơh git lah bol khai mơ oh mi gơs bal dô nă Cau tòm ơm hơđang trồ; Kơnràñ ò sền òsơp di cau lơi.

¹⁰Lồi tơnơ̆ wơl, oh mi gơs tĕ pràn kơldang tòm Yàng, mơ tòm gơnap gơnoar pràn kơldang Kơnràñ dê.

¹¹Mă àñ tĕ jơh ală phan tòmlơh Yàng Tom Trồ dê, tồ oh mi in rgơi ntào jai nàng tòmdră mơ ală kai gơrmơ̆i cà ràk dê.

¹²Bơh bol he ò di tòmlơh mơ poac mơ mhàm ò, mơya tòmlơh mơ ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi.

¹³Gen tàng ai tĕ jơh ală phan tòmlơh Yàng Tom Trồ dê, tồ tòm ngai rung rài oh mi rgơi tòmdră jai, mơ tơnơ̆ mơ tŭ neh lơh sir jơh ală bơta gen gam ntào kơ̆ sơl.

¹⁴Behơ̆ gen ntào kơ̆ tĕ, kơt but mơ jơnau song, soh ào lòs la bơta song ring,

¹⁵jơng jă khŏ rcang sir bơto yal Jơnau Niam ring lơngai.

¹⁶Ai tĕ khèl la bơta dòn, nàng kơnòm di gơ oh mi rgơi đơp chơt jơh ală kam ồs cau iơh bơsak dê.

¹⁷Kung ndau tĕ sơgơn la bơta dong klàs, mơ at đào Yàng Hwềng dê, la jơnau Yàng Tom Trồ dê.

¹⁸Jơh nùs tĕ hòi dan mơ rac dan; tŭ lơi kung hòi dan tĕ kơnòm di Yàng Hwềng; bơh bơta hơ̆ drơng kơp tĕ, kơ̆ nùs wền dơngoh tòm jơh ală bơta mơ hòi dan jơh ală cau sàng goh in.

¹⁹Kung hòi dan tĕ añ in, nàng añ in gơs bơta chài đơs, khin cha pò bơr nàng yal tơlik bơta ndơp ndơr Jơnau Niam dê.

²⁰Bơh Jơnau Niam hơ̆ mơ añ la cau gơnoar ala mat kòl kơt tòm che sreng, nàng ơm tòm hơ̆ añ gơs khin cha bơto Jơnau Niam hơ̆ be añ pal bơto.

²¹Bơh kòñ oh mi in git ală bơta añ tìp mơ ală broă añ lơh, gen Ticikơ, la oh mi đềt mềr mơ la cau gơnoar duh broă dòn song tòm Yàng, rơp yal oh mi in git jơh ală bơta.

²²Ngan tài bơh bơta hơ̆ mơ añ neh sồr khai tus hơ oh mi, nàng oh mi in git ală bơta bol hi tìp la be lơi, mơ nàng khai pơndòm pơniang nùs oh mi dê.

²³Dan oh mi in geh bơta lơngap lơngai, bơta kòñ gơboh bal mơ bơta dòn bơh Yàng Tom Trồ la Bèp mơ bơh Yàng Jesu Krist.

²⁴Dan bơta nđàc ơm bal mơ jơh ală cau ai bơta kòñ gơboh gam sùm mơ kòñ gơboh di Yàng Jesu Krist bol he dê.