Read koho Philip 1 Bible Online

Philip 1 - koho bible

Philip 1

¹Pol mơ Timôthe, dĭ gơna Yàng Jesu Krist dê, pơyoa jơh ală cau sàng goh in tòm Yàng Krist Jesu, la cau ơm tòm ƀòn Philip, bal mơ ală cau gơnoar bơto mơ ală cau dong gàr in:

²Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp bol he dê mơ bơh Yàng Jesu Krist!

³Kòp dơ̆ añ kah oh mi gen añ ưnngài Yàng Tom Trồ añ jê;

⁴kòp dơ̆ hòi dan mơ Yàng, gen añ òs hòi dan jơh ală oh mi in dô bă hòn chò,

⁵tài bơh ală oh mi neh gơs pơnah tòm broă bơto Jơnau Niam dê bơh ngai sơnròp jơl tus di tŭ do.

⁶Añ dòn nền ngan lah Bơtau neh sơntòm lơh broă niam tòm ală oh mi kung rơp lơh wil tơl jơl tus di ngai Yàng Krist Jesu dê.

⁷Añ kah jơh ală oh mi behơ̆ la di ngan, tài bơh añ jơh nùs kòñ gơboh di oh mi; bulah tòm tŭ añ ơm jàm, hala tòm tŭ tò să mơ lơh cơng bơh Jơnau Niam, gen jơh ală oh mi kung dòp geh bơta nđàc bơh Yàng Tom Trồ be añ sơl.

⁸Bơh Yàng Tom Trồ lơh cơng añ in lah ngan añ kòñ gơboh di jơh ală oh mi bơh nùs nhơm Yàng Krist Jesu.

⁹Bơta añ hòi dan hơ̆ la dan bơta kòñ gơboh oh mi dê sơlo ngai sơlo gơbơtơl lìu làc rlau tai, bal mơ bơta git wă jơnau song mơ bơta cahrña wil tơl,

¹⁰nàng git loh ală broă niam rlau, tồ oh mi in geh sàng goh mơ ò gơs tiah geh lah pơrhơng jơl tus di ngai Bơtau Krist dê,

¹¹oh mi geh bềng plai bơta song ring dê tus bơh Yàng Jesu Krist, tồ lơh àng sơnđan mơ jòng ro Yàng Tom Trồ.

¹²Ơ ală oh mi, añ kòñ oh mi git lah ală bơta neh gơtơntus di añ ngan neh dong tòm bơta bơtào tơngguh Jơnau Niam,

¹³tian gơs tòm ală hìu cau kwang mơ jơh ală cau ndai git jơh lơm lah tài bơh Bơtau Krist gen tàng añ kong kơt mơ che sreng.

¹⁴Gơs pơnah oă oh mi tòm Yàng, tài bơh añ kòl kơt mơ che sreng, gen bol khai gơs nùs dòn nền rlau, gơbơtơl nùs khin cha bơto jơnau Yàng Tom Trồ dê ò rngòt dô êt lơi.

¹⁵Ngan, gơs cau ƀà bơto yal bơh Bơtau Krist, la bơh nùs ƀoah gơjrañ mơ tòm pơndang, mơya kung gơs cau ƀà tai la bơh nùs niam mơ bơto yal.

¹⁶Ală cau do bơto la bơh nùs kòñ gơboh, git lah añ neh geh pồ bơtào nàng dong tò Jơnau Niam.

¹⁷Mơya ală cau ne bơto yal bơh Bơtau Krist dô bă ò kòñ gơboh, mơya bơh nùs hàm kòñ sềt pơniă mơ kơlôi lah gơbơtơl tai bơta bòl glar añ in tòm tŭ kong kơt mơ che sreng.

¹⁸Mơya dò gơ! Bulah be lơi, dilah lơh bơthĭ hala ngan, Bơtau Krist kung geh bơto yal sùm; tài bơh hơ̆ añ gơs nùs hòn chò mơ sơlo hòn chò tai.

¹⁹Bơh añ git lah kơnòm di bơta hòi dan oh mi dê mơ bơta dong kòl Yàng Hwềng Yàng Jesu Krist dê, añ rơp geh hồ toh.

²⁰Jat bơta kơp gơn nền cê mơ bơta gơn kơnòm añ jê, añ ò ƀàssìl tòm broă lơi ò, mơya lài be lơi, gen tòm tŭ do kung behơ̆ sơl, añ gơs nùs bềng bơta khin cha; behơ̆ bulah bơh bơta kis hala bơh bơta chơt añ jê, gen tòm să jan añ Bơtau Krist rơp geh jòng ro.

²¹Tài bơh gơwèt mơ añ, kis la Bơtau Krist, mơ chơt la kwơ rlau añ in.

²²Mơya dilah añ kư̆ kis tòm poac să nàng gơs cồng nha broă añ in, gen añ ò git bơta lơi añ pal sac rwah.

²³Añ kòl gơjơlềt bơh bàr đah, kòñ lòt ơm bal mơ Bơtau Krist la bơta niam rlau,

²⁴mơya añ kư̆ ơm tòm poac să, hơ̆ la bơta kwơ rlau oh mi in.

²⁵Añ gơs bơta dòn nền hơ̆ gen añ git lah añ kư̆ gam ơm bal mơ jơh ală oh mi, nàng dong oh mi geh ntoat tơngguh mơ hòn chò tòm bơta dòn;

²⁶tồ tŭ lơi añ rê wơl mơ ală oh mi, gen oh mi rơp gơs oă bơta nàng geh jòng să bơh añ tòm Yàng Krist Jesu.

²⁷Mìng ală oh mi pal kis dô bă di pal mơ Jơnau Niam Bơtau Krist dê, tồ bulah añ lòt tus còp ală oh mi hala añ neh ngkòi, añ kung geh kơno bơh oh mi lah oh mi dô nùs bal mơ kơ̆ wền, dô nùs nhơm bal bơh bơta dòn nàng tòmlơh bơh Jơnau Niam,

²⁸mơ tòm broă lơi ò lòi cau sò tơm lơh he in rngòt, mơya khin cha tĕ. Bơta hơ̆ la dô nơm cơng tàng loh làng lah bol khai pal roh rui, mơya ală oh mi gen geh dong klàs, mơ bơta hơ̆ tus bơh Yàng Tom Trồ la Bơtau ai oh mi in bơta pha lin rlau.

²⁹Tài bơh Yàng Tom Trồ neh ai bơta nđàc ală oh mi in ò di mìng dòn Kơnràñ lơm ò, mơya kung pal kong jê sồt bơh Kơnràñ sơl;

³⁰oh mi kong dô bơta tòmlơh be neh gŏ añ kong mơ tòm tŭ do kơno gam gơs tòm añ sơl.