Read koho Philip 2 Bible Online

Philip 2 - koho bible

Philip 2

¹Behơ̆, dilah tòm Bơtau Krist gơs bơta pơndòm pơniang lơi, dilah gơs bơta chồl pơndòm lơi tòm bơta kòñ gơboh, dilah gơs bơta gơtòmklac bal lơi tòm Yàng Hwềng, dilah gơs nùs gơboh mơ nđàc sơngit lơi,

²gen ală oh mi gơs tĕ dô nùs bal, dô bơta kòñ gơboh bal, dô bă bal tòm nùs nhơm mơ bơta kơlôi sơnơng, nàng lơh bơta hòn chò añ jê geh wil tơl.

³Bañ lơh bơta lơi bơh nùs sềt pơniă hala bơh bơta gơklŏ ò kwơ, mơya pìn pơndêt tĕ să, kòp nă sền cau ndai la dờng màng rlau mơ he.

⁴Kòp nă tòm ală oh mi bañ mìng kơlôi rcang broă tòm he dê, mơya kung pal kơlôi rcang broă cau ndai in sơl.

⁵Oh mi gơs tĕ nùs kơlôi be Yàng Krist Jesu neh gơs.

⁶Kơnràñ neh gơs rùp să be Yàng Tom Trồ, mơya Kơnràñ ò sền bơta ring bal mơ Yàng Tom Trồ la bơta pal sơmbat prap;

⁷Kơnràñ neh sang lòi is să he, ai rùp să be cau dĭ gơna, mơ gơlik gơs be kòn mơnus.

⁸Kơnràñ neh gơs rùp să be dô nă cau, gen pìn pơndêt is să he, dòn bơr jơl chơt, tian gơs chơt hơđang chi pơng.

⁹Tài bơh hơ̆ tàng Yàng Tom Trồ neh yò tơngguh Kơnràñ hơđang jòng rlau jơh mơ ală sơnđan;

¹⁰tồ bơh sơnđan Yàng Jesu mơ jơh ală gơltang hơđang trồ, tòm ù mơ hơđơm ù tai, rơp cùn lơm,

¹¹mơ kòp nơm lơmpiat rơp yal tơlik Jesu Krist la Yàng nàng lơh gơklŏ Yàng Tom Trồ la Bèp.

¹²Behơ̆ gen, ơ ală cau đềt mềr añ jê, be oh mi neh dòn bơr sùm sùm, ò di mìng tòm tŭ gơs añ lơm ò, mơya tòm tŭ do añ neh ngkòi, gen oh mi pal sơlo dòn bơr rlau tai, ai tĕ nùs rngòt rơm să nàng lơh gơs bơta dong klàs oh mi dê.

¹³Bơh Yàng Tom Trồ la Bơtau lơh broă tòm oh mi, nàng oh mi gơs nùs kòñ mơ lơh jat bơta niam nùs Kơnràñ dê.

¹⁴Bulah lơh broă lơi gen bañ yoam mơ tòm pơndang bal,

¹⁵tồ ală oh mi in ò gơs tiah geh lah pơrhơng mơya song ngan, lơh gơs kòn sau Yàng Tom Trồ dê ò sồt rmàñ ơm digùl jơi bơtiàn rkwet rkwe mơ jak tòmdră, digùl bol khai oh mi pal sòl pơnđàng kung be ală sơmañ àng tòm dunnia,

¹⁶be oh mi prap kơ̆ jơnau bơta kis, nàng tòm ngai Bơtau Krist dê gen añ geh jòng să bơh añ neh ntoat mơ kong bòl glar lơh broă ò di la ò kwơ.

¹⁷Bulah añ pal kong tuh tơlik be phan pơdơng ñô rsìh hơđang phan ơn duh khoai mơ phan ơn bơta dòn ală oh mi dê, gen añ kung hừh nùs mơ hòn chò bal mơ jơh ală oh mi sơl.

¹⁸Oh mi kung behơ̆ sơl, chò hòp tĕ mơ hòn chò tĕ bal mơ añ.

¹⁹Añ gơn kơnòm di Yàng Jesu, añ kơp kòñ sồr Timôthe mhar tus hơ oh mi tồ añ in geh iang tòm nùs tòm tŭ kơno ală bơta bơh oh mi.

²⁰Bơh mìng dô nă khai la cau dô nùs bal mơ añ, gơs nùs song ngan kơlôi rcang bơh broă oh mi dê,

²¹bơh cau lơi kung jòi cồng nha is he dê, mơ ò jòi cồng nha Yàng Jesu Krist in.

²²Mơya oh mi git nùs nhơm niam khai dê, tòm tŭ khai duh broă Jơnau Niam bal mơ añ, gen kung be kòn lơh broă bal mơ bèp.

²³Behơ̆ tàng, tòm tŭ añ git broă añ jê rơp gơlik be lơi, gen añ kơp kòñ sồr khai lòt tus mơ hơ oh mi;

²⁴mơya kơnòm di Yàng añ dòn nền lah să tòm añ kung rơp tus gòñ ò jŏ tai.

²⁵Añ neh kơlôi lah pal sồr Epaphrôdik lòt tus hơ oh mi, khai la oh mi bơyô añ jê lơh broă bal mơ añ, cau ling dô mpồl bal mơ añ; khai kung la cau kong sồr oh mi dê nàng rcang ală phan ngui sa añ in.

²⁶Bơh khai kòñ ngan gŏ jơh ală oh mi, mơ khai neh kơlôi moat tài bơh oh mi kơno khai kòp jê.

²⁷Ngan, khai kòp mòr chơt, mơya Yàng Tom Trồ neh kòñ nđàc di khai, ò di mìng dô nă khai lơm ò, mơya kung di añ sơl, tồ añ in klàs di bơta moat jrùng sơlo gơbơtơl moat jrùng tai.

²⁸Behơ̆ añ neh mhar mhar sồr khai lòt tồ oh mi in gŏ khai mơ hòn chò, mơ añ kung rài bơta moat jrùng sơl.

²⁹Gen, ai tĕ bơta hòn chò wil tơl mơ wă rò khai tòm Yàng, mơ sền ală cau behơ̆ la dờng màng,

³⁰tài bơh broă Bơtau Krist dê mơ khai neh mòr chơt, phi bơta kis khai dê nàng lơh wil tơl bơta duh broă mơ oh mi ò rgơi lơh añ in.