Read koho Kôlôse 2 Bible Online

Kôlôse 2 - koho bible

Kôlôse 2

¹Ngan behơ̆, añ kòñ oh mi git añ jơh pràn lơh broă bơh oh mi, mơ bơh ală cau ơm tòm Laodise in, mơ bơh jơh ală cau òhềt gŏ mat añ đah poac să,

²tồ kơnòm di bơta geh gơtòmklac bal tòm bơta kòñ gơboh mơ bol khai geh kơ̆ nùs, tian gơs tus hơ bơta lìu làc tòm bơta git wă nền cê, mơ tòm bơta dòp git bơta ndơp ndơr Yàng Tom Trồ dê, hơ̆ la Bơtau Krist,

³Kơnràñ la kai mpồng nàng pò jơh ală bơta dờng màng neh pồn ndơp bơh bơta jak chài mơ bơta git jak Yàng Tom Trồ dê.

⁴Añ đơs behơ̆ tồ klàs cau lơi ai jơnau lac lèo mơ pơrlồm oh mi.

⁵Bơh bulah să jan añ ơm ngài, mơya hwềng nùs añ kư̆ ơm bal mơ oh mi, hòn chò gŏ oh mi gơs bơta rơndap tap sèng niam mơ bơta dòn kơ̆ nền tòm Bơtau Krist.

⁶Behơ̆ oh mi neh dòp Krist Jesu la Yàng, gen lơh lòt tĕ tòm Kơnràñ behơ̆ sơl.

⁷Ơm kơ̆ tĕ be chi sro ryas mơ bơt bơtào tĕ tòm Kơnràñ, kơ̆ nền tòm bơta dòn, jat be oh mi neh geh bơto, kung tơngkah tơngkañ tĕ tòm bơta ưnngài.

⁸Kơrhia tĕ, rngòt gơs cau lơi ai bơta jak chài dunnia dê mơ jơnau pơrlồm roh lơm, jat jơnau òs yau kòn mơnus dê, jat bơta ƀă liă dunnia dê, ò di jat Bơtau Krist.

⁹Bơh bơta bềng tơl nùs nhơm Yàng Tom Trồ dê ơm jơh tòm să jan Yàng Jesu.

¹⁰Oh mi kung geh bềng tơl tòm Kơnràñ, la Bơtau lam bồ jơh ală gơnoar at bồ, mơ jơh ală gơnoar.

¹¹Tòm Kơnràñ oh mi kung neh kong siat gơltau, ò di siat gơltau bơh tê cau lơh, mơya siat gơltau bơh Bơtau Krist, hơ̆ la bơta klò sang să jan poac să.

¹²Bơh oh mi neh kơnòm di ƀaptem mơ geh tơp bal mơ Kơnràñ, kung bơh hơ̆ neh geh kis wơl bal mơ Kơnràñ bơh bơta dòn di broă lơh gơnap gơnoar Yàng Tom Trồ dê, la Bơtau neh lơh Kơnràñ in kis wơl bơh bơta chơt.

¹³Ai oh mi, tòm tŭ neh chơt bơh bơta tìs glài oh mi dê mơ bơh bơta ò siat gơltau poac să oh mi dê, gen Kơnràñ neh lơh oh mi in kis bal mơ Bơtau Krist, bơh Kơnràñ neh toh jơh ală bơta tìs glài bol he dê.

¹⁴Kơnràñ jùt sang jơnau tòmho cih tòm ală bơta sồr lam, gơlơh nền glài tòmsò mơ bol he; Kơnràñ kung tă gơ mơ pơng gơ di chi pơng.

¹⁵Kơnràñ sang ală gơnoar at bồ mơ ală gơnoar, mơ ràng tơlik bol khai dô bă loh làng, mơ geh pha lin rlau mơ bol khai di chi pơng.

¹⁶Behơ̆ gen bañ lòi cau lơi cahrña oh mi bơh phan sa phan ñô, hala bơh ngai pơjum sa, hala ngai kơnhai dùl lik, hala ngai Saƀat.

¹⁷Hơ̆ la rùp ală bơta rơp tus dê, ai să la bal mơ Bơtau Krist.

¹⁸Bañ lòi cau lơi ngui bơta pơndêt să is mơ bơta duh khoai cau gơnrơh nàng kơñau phan ƀàn oh mi dê, bơh cau hơ̆ lơh jat ală bơta gơtơnggŏ khai dê, jat nùs kơlôi poac să dê mơ pơnhừ să ò bồ,

¹⁹ò sơmbat kơ̆ di Bồ. Kơnòm di Bồ hơ̆ jơh să jan geh ròng siam mơ gơtòmklĕ bal bơh ală tiah tơrbŏ mơ ală ară, mơ geh dờng jat bơta lơh nền Yàng Tom Trồ dê.

²⁰Dilah oh mi neh chơt bal mơ Bơtau Krist gơwèt mơ ală bơta ƀa liă dunnia dê, gen mbe lơh oh mi kis kung be gam gơrê bal mơ dunnia taih? Ñchi bơh tài oh mi dòn duh ală bơta òs mòng jat ală bơta sồr lam mơ ală bơta bơto sồr jơi kòn mơnus dê taih? Kung be:

²¹“Bañ at, bañ liap, bañ ƀư,”

²²hơ̆ la gơwèt mơ ală phan dilah ngui gen gơ rơp roh rui lơm.

²³Ală bơta hơ̆ gơlơh be jak chài tòm bơta duh khoai jat nùs is, bơta pơndêt să, bơta bơklơn să jan, mơya ngan ò gơs kwơ dô êt lơi nàng tòmdră mơ bơta hàm kòñ poac să dê.