Read koho I Tesalônika 2 Bible Online

I Tesalônika 2 - koho bible

I Tesalônika 2

¹Ơ oh mi, să tòm oh mi git lah bol hi neh lòt tus hơ oh mi ò di la ò kwơ.

²Mơya tơnơ̆ mơ tŭ neh kong jê sồt mơ dơñŏ tơnhial tòm Philip, be oh mi neh git, gen bol hi sơlo khin cha tòm Yàng Tom Trồ bol hi dê mơ bơto yal Jơnau Niam Yàng Tom Trồ dê oh mi in digùl oă bơta gơrơndul tòmdră.

³Bơh bơta bơto pơndòm bol hi dê ò di bơh bơta tìs, hala bơh bơta ngkòr ngkàc, kung ò di jat bơta lac lèo.

⁴Mơya jat be Yàng Tom Trồ neh dòp bol hi la di pal ngan nàng jào Jơnau Niam bol hi in, gen bol hi đơs, ò di tồ niam nùs cau, mơya nàng niam nùs Yàng Tom Trồ, la Bơtau sền sơwì nùs bol hi.

⁵Bơh oh mi neh git, bol hi ò tŭ lơi ai ală jơnau rơmhòc, kung ò di ai kai tồ jơm ndơp bơta hàm hà; gơs Yàng Tom Trồ lơh cơng bol hi in.

⁶Bulah bol hi la cau gơnoar bơto dờng Bơtau Krist dê, gơs gơnoar dan oh mi sền bol hi la dờng màng, mơya kung ò dan bơta gơklŏ bơh di kòn mơnus, hala bơh di oh mi, hala bơh di cau ndai.

⁷Mơya bol hi neh ơm digùl oh mi dô bă niam lơnhơn, be dô nă mè kơnđơt kơnđu kòn tòm khai dê.

⁸Bol hi neh gơs nùs đềt mềr di oh mi, gen tàng bol hi gơs nùs hòn chò ngan ò di mìng tòmpà Jơnau Niam Yàng Tom Trồ dê oh mi in lơm, mơya tus di să tòm bol hi sơl. Bơh oh mi la cau bol hi kòñ gơboh ngan.

⁹Ơ oh mi, oh mi gam kah bơta kong lơh broă mơ bơta bòl glar bol hi dê; tòm tŭ bol hi bơto yal Jơnau Niam Yàng Tom Trồ dê oh mi in, gen kung lơh broă ngai mơ mang, tồ ò lơh pơnjê di dô nă cau lơi tòm oh mi.

¹⁰Oh mi la cau lơh cơng, Yàng Tom Trồ kung lơh cơng sơl, mbe lơi bol hi lơh lòt dô bă sàng goh, song ring, ò gơs tiah geh lah pơrhơng gơwèt mơ oh mi la cau dòn jat.

¹¹Oh mi kung git mbe lơh bol hi gơwèt mơ kòp nă cau tòm oh mi be bèp mơ kòn.

¹²Bol hi bơto pơndòm, pơndòm pơniang, mơ lơh cơng oh mi in, tồ oh mi in lơh lòt dô bă di pal ngan mơ Yàng Tom Trồ, la Bơtau hòi oh mi tus hơ lơgar mơ bơta gơklŏ Kơnràñ dê.

¹³Tài bơh hơ̆ bol hi kung ưnngài Yàng Tom Trồ ò dơh, bơh oh mi dòp jơnau Yàng Tom Trồ dê mơ bol hi neh bơto yal, gen ò di dòp be jơnau kòn mơnus dê, mơya be jơnau Yàng Tom Trồ dê; jơnau hơ̆ ngan la jơnau Yàng Tom Trồ dê, mơ ơm lơh broă tòm oh mi la cau dòn jat.

¹⁴Ơ oh mi, oh mi ngan neh gơlik gơs cau đòm jat ală Hìu Jum Goh Yàng Tom Trồ dê tòm Yàng Krist Jesu, tòm Jude, bơh oh mi neh kong ală cau lơgar tòmlơh bòl glar, kung be ală Hìu Jum Goh hơ̆ neh kong cau Juda lơh bòl glar.

¹⁵Cau Juda la cau neh tơnchơt Yàng Jesu bal mơ ală cau gơnoar hwơr, ting bơtrơh bol hi, ò niam nùs Yàng Tom Trồ mơ sòdră di jơh ală cau.

¹⁶Bol khai bơkơŭ bol hi bơto cau làng bol bơdìh tồ bol hơ̆ geh dong klàs. Tòm broă do lơh tồi glài bol khai dê sơlo gơbơtơl bềng lìu. Mơ lồi dut bơta gơjrañ dờng neh dùh dô bă nền cê hơđang bol khai rau.

¹⁷Ơ oh mi, bol hi neh ngài mơ oh mi tòm dô êt jŏ, mơya mìng să ngài mơ nùs ò ngài, gen bol hi neh jơh nùs kơp kòñ mơ sơlo jơh nùs jòi bơta tìp wơl mơ oh mi.

¹⁸Bơh bol hi gơs nùs kòñ tus hơ oh mi, añ la Pol neh bàr pe dơ̆ kòñ behơ̆, mơya cà Satan neh kơryan bol hi,

¹⁹bơh bơta gơn kơnòm, bơta hòn chò mơ bơta jòng să be sơgơn bơtau di đap Yàng Jesu bol he dê tòm tŭ Kơnràñ tus wơl la ñchi taih? Ò di la oh mi ò ơ?

²⁰Ngan, oh mi la bơta gơklŏ mơ bơta hòn chò bol hi dê.