Read koho Jôsue 10 Bible Online

Jôsue 10 - koho bible

Jôsue 10

¹Tòm tŭ Adônijedek la bơtau Jerusalem dê, kơno lah Jôsue neh tòmpìt ai ƀòn Ahi, mơ neh tơnroh gơ jơh hir, lơh di ƀòn Ahi mơ bơtau gơ dê kung be khai neh lơh di ƀòn Jerikô mơ bơtau gơ dê; mơ mbe làng bol Gabaôn neh lơh dô bơta tòmho bal mơ làng bol Israel mơ ơm bal mơ bol khai,

²gen bơtau mơ làng bol khai dê gơlik rngòt rngơt dờng ngan, tài bơh Gabaôn la dô nơm ƀòn dờng, kung be dô nơm tòm ală ƀòn dờng bơtau dê, dờng rlau mơ ƀòn Ahi, mơ jơh ală cau klau gơ dê la cau ling jak tòmlơh.

³Gen tàng Adônijedek la bơtau Jerusalem sồr cau lòt tus hơ Hôham la bơtau Hebrôn, Phiram la bơtau Jarmut, Japhia la bơtau Lakis, mơ Debir la bơtau Eglôn mơ đơs lah:

⁴“Guh tĕ tus hơ do dong añ nàng tòmlơh mơ Gabaôn; tài bơh gơ neh lơh bơta tòmho bal mơ Jôsue mơ làng bol Israel.”

⁵Gen pram nă cau bơtau làng bol Amôr dê, hơ̆ la ală bơtau Jerusalem, Hebrôn, Jarmut, Lakis mơ Eglôn pơjum jơh ală mpồl ling bol khai dê. Bol khai guh bal mơ jơh ală mpồl ling bol khai dê mơ bơtào sàl nàng tòmdră mơ brồ lơh cau Gabaôn.

⁶Cau Gabaôn sồr cau lòt yal mơ Jôsue ơm tòm tiah sàl tòm Gilgal mơ đơs lah: “Dan bañ sang ală cau duh broă ồng dê, mhar guh tus hơ bol hi mơ dong tă bol hi, tài bơh jơh ală bơtau làng bol Amôr bơh di lơgar kơh mơnơm neh pơjum bal tòmsò mơ bol hi.”

⁷Behơ̆ Jôsue guh bơh Gilgal bal mơ jơh mpồl ling khai dê, bal mơ jơh ală cau ling tòmlơh jak.

⁸Yàng Jehôwa đơs mơ Jôsue lah: “Bañ rngòt di bol khai, Añ neh jào bol khai tòm tê mê; ò gơs cau lơi tòm bol khai rgơi ntào jai di đap mê.”

⁹Behơ̆ Jôsue bơh Gilgal lòt mang àng mơ nisơna brồ lơh bol hơ̆.

¹⁰Yàng Jehôwa lơh bol hơ̆ in gơnsràng rngòt mơ kong alah di đap Israel. Cau Israel geh pha dờng ngan tòm Gabaôn mơ ting jat bol hơ̆ tòm gùng kơh Bet Hôrôn mơ tơnchơt bol khai rò gùng jơl tus di Ajekah mơ Makedah.

¹¹Tòm tŭ bol hơ̆ ntoat dô bơh di đap Israel tòm gùng mù kơh bơh Bet Hôrôn tus hơ Ajekah, gen Yàng Jehôwa tơndùh hơđang bol khai mìu lŭ dờng bơh đang trồ, mơ khà cau chơt bơh mìu lŭ la oă rlau mơ khà cau kòl Israel tơnchơt mơ đào.

¹²Tòm ngai Yàng Jehôwa jào phi làng bol Amôr cau Israel in, gen Jôsue đơs mơ Yàng Jehôwa di đap Israel lah: “Ơ mattơngai, ơm dơh wơl tĕ hơđang Gabaôn; Ơ mat kơnhai, ơm dơh wơl tĕ hơđang thòng Aijalôn.”

¹³Mattơngai ơm wơl, mơ mat kơnhai ơm dơh wơl, jơl tus di tŭ làng bol neh sal wơl di cau sò tơm bol khai dê, Bơta do ò di neh geh cih tòm sră Jasar ơ? Mattơngai ơm dơh wơl digùl trồ mơ ò ñơp pơgap jơh dô ngai.

¹⁴Bơh yau òr jơl tus di ngai do ò gŏ tŭ lơi gơs dô ngai lơi be ngai hơ̆, la ngai mơ Yàng Jehôwa neh dòp jơnau hòi dan dô nă kòn mơnus dê. Ngan la Yàng Jehôwa neh tòmlơh làng bol Israel in.

¹⁵Lồc behơ̆ Jôsue mơ jơh Israel rê wơl hơ tiah lơh sàl tòm Gilgal.

¹⁶Mơ tai, pram nă cau bơtau neh dô mơ pồn să bol khai tòm rgồng lŭ tòm Makedah.

¹⁷Gơs cau yal Jôsue in lah: “Cau neh bàn pram nă cau bơtau hơ̆ pồn să tòm rgồng lŭ tòm Makedah,”

¹⁸gen khai sồr lah: “Pơrlă tĕ ală lŭ dờng lềt bơr rgồng lŭ mơ ơn dô êt nă cau kơp gàr gơ.

¹⁹Mơya bol mê bañ ơm wơl! Ting jat tĕ cau sò tơm, brồ lơh bơh tơnơ̆ bol khai, mơ bañ lòi bol khai mut tòm ală ƀòn dờng bol khai dê; bơh Jehôwa Yàng Tom Trồ bol mê dê neh jào phi bol khai tòm tê bol mê.”

²⁰Tòm tŭ Jôsue mơ ală cau Israel neh sir tơnchơt oă ngan cau tòm bol khai, jơl tus neh tơnchơt goh jơh, mơ tòm tŭ ală cau gam kis neh mut tòm ală ƀòn kơ̆ cê,

²¹jơh mpồl làng bol rê wơl lơngap lơngai hơ Jôsue tòm tiah lơh sàl tòm Makedah, ò gơs dô nă cau lơi khin đơs dô jơnau tòmdră mơ cau Israel.

²²Jôsue đơs lah: “Pò tĕ bơr rgồng lŭ mơ lam pram nă cau bơtau hơ̆ lòt tus hơ añ.”

²³Gen bol khai lam pram nă cau bơtau hơ̆ lik lòt tus hơ Jôsue, hơ̆ la ală bơtau Jerusalem, Hebrôn, Jarmut, Lakis mơ Eglôn.

²⁴Tòm tŭ cau lam pram nă bơtau hơ̆ tus hơ Jôsue, gen Jôsue hòi pơjum jơh ală cau Israel mơ đơs mơ ală cau kwang at bồ ling neh lòt bal mơ khai lah: “Tus tĕ hơ do mơ jă jơng bol mê dê di ngko ală cau bơtau do.” Gen bol khai tus hơđap mơ jă jơng di ngko ală cau bơtau hơ̆.

²⁵Jôsue đơs mơ bol khai lah: “Bañ rngòt, bañ gơplơ̆ nùs. Gơs tĕ pràn kơldang mơ khin cha. Do la bơta mơ Yàng Jehôwa rơp lơh di jơh ală cau sò tơm mơ bol mê rơp tòmlơh.”

²⁶Lồc behơ̆ Jôsue tơnchơt ală bơtau hơ̆ mơ yồng bol khai hơđang pram nơm chi, mơ pram nă bơtau hơ̆ kong yồng tềng hơ̆ tus di mho.

²⁷Tòm tŭ mattơngai mut, Jôsue ai gơnoar sồr cau tơmù ală ƀồc hơ̆ bơh di ală chi mơ sơrbì bol khai tòm rgồng lŭ la tiah bol khai neh pồn să bơh lài. Bol khai dap ală lŭ dờng gam jơl tus di ngai do.

²⁸Tòm ngai hơ̆, Jôsue tòmpìt ai Makedah. Khai ai đào tơnroh ƀòn bal mơ bơtau gơ dê. Khai tơnroh jơh ală cau tòm hơ̆, ò lòi dô nă cau lơi gam kis. Khai lơh di cau bơtau Makedah kung be khai neh lơh di cau bơtau Jerikô.

²⁹Gen Jôsue bal mơ jơh Israel lòt bơh Makedah tus hơ Lipna mơ tòmlơh mơ gơ.

³⁰Yàng Jehôwa kung jào phi ƀòn dờng hơ̆ bal mơ bơtau gơ dê tòm tê Israel. Jôsue ai đào tơnroh ƀòn dờng hơ̆ bal mơ jơh ală cau ơm tòm gơ; ò lòi dô nă cau lơi gam kis. Khai lơh di bơtau gơ dê kung be khai neh lơh di bơtau Jerikô.

³¹Tơnơ̆ hơ̆ Jôsue bal mơ jơh Israel lòt bơh Lipna tus hơ Lakis, khai rơndap mpồl ling mơ brồ lơh gơ.

³²Yàng Jehôwa jào phi Lakis tòm tê Israel mơ Jôsue ai ƀòn hơ̆ tơnơ̆ mơ bàr ngai tòmlơh. Khai ai đào tơnroh ƀòn dờng hơ̆ bal mơ jơh ală cau tòm gơ kung be khai neh lơh di Lipna.

³³Tòm tŭ hơ̆ Hôram la cau bơtau Gejer neh guh nàng dong kòl Lakis, mơya Jôsue lơh alah khai bal mơ mpồl ling khai dê tian gơs ò gam dô nă cau lơi kis.

³⁴Gen Jôsue bal mơ jơh Israel lòt bơh Lakis tus hơ Eglôn. Bol khai rơndap mpồl ling mơ brồ lơh gơ.

³⁵Tòm dô ngai hơ̆ bol khai tòmpìt ai ƀòn mơ ai đào tơnroh jơh tơl nă cau tòm gơ kung be khai neh lơh di Lakis.

³⁶Gen Jôsue bal mơ jơh Israel guh bơh Eglôn tus hơ Hebrôn mơ brồ lơh gơ.

³⁷Bol khai tòmpìt ai ƀòn mơ ai đào tơnroh gơ bal mơ bơtau gơ dê mơ ală ƀòn gơ dê bal mơ jơh tơl nă cau tòm gơ, ò lòi dô nă cau lơi gam kis. Khai tơnroh jơh ƀòn bal mơ ală cau tòm hơ̆ kung be khai neh lơh di Eglôn.

³⁸Lồc behơ̆, Jôsue bal mơ jơh Israel rê wơl mơ brồ lơh Debir.

³⁹Khai tòmpìt ai ƀòn dờng, bơtau gơ dê mơ ală ƀòn gơ dê, mơ ai đào tơnroh jơh; bol khai tơnchơt jơh ală cau ơm tòm gơ, ò lòi dô nă cau lơi gam kis. Be khai neh lơh di Hebrôn mơ kung be khai neh lơh di Lipna mơ bơtau gơ dê, kung behơ̆ khai neh lơh di Debir mơ bơtau gơ dê sơl.

⁴⁰Behơ̆ Jôsue tòmpìt ai jơh dô kơnhwàl hơ̆, la hơđang mơnơm, tiah Negep, ală tiah jơng mơnơm đah mattơngai mut mơ ală kơh mơnơm, bal mơ jơh ală bơtau bol gơ dê, khai ò lòi dô nă cau lơi gam kis. Khai tơnroh jơh ală phan tă nhơm jat be jơnau gơnoar sồr Jehôwa Yàng Tom Trồ Israel dê.

⁴¹Jôsue neh tòmlơh pha rlau mơ bol khai bơh Kades Barnea tus Gaja mơ bơh jơh dô kơnhwàl lơgar Gôsen tus hơ Gabaôn.

⁴²Jôsue tòmlơh pha rlau mơ jơh ală cau bơtau do mơ tòmpìt ai jơh ală lơgar bol khai dê tòm dô dơ̆ lòt tòmlơh, tài bơh Jehôwa Yàng Tom Trồ Israel dê neh tòmlơh Israel in.

⁴³Gen Jôsue bal mơ jơh Israel rê wơl hơ tiah lơh sàl tòm Gilgal.