Read koho Jôsue 17 Bible Online

Jôsue 17 - koho bible

Jôsue 17

¹Do la sre brê tòmpà jơi bơtiàn Manase in, bơh khai la kòn tơnhoa Jôsep dê, ai Makir kòn tơnhoa Manase dê, la bèp Galaat dê, la cau neh dòp geh Galaat mơ Basan; tài bơh cau Makir la ală cau ling jak tòmlơh.

²Behơ̆ bơta tòmpà do ai cau gam wơl tòm jơi bơtiàn Manase, jat ală mpồl hìu nhă bol khai dê la Abiejer, Helek, Ariel, Sicem, Hepher mơ Semida; hơ̆ la ală cau klau tòm jơi bơtiàn Manase kòn Jôsep dê, jat ală mpồl hìu nhă bol khai dê.

³Tŭ hơ̆ Jelôphehat kòn klau Hepher, sau Galaat, se Makir, set Manase dê, khai ò gơs kòn klau, mìng gơs kòn ùr lơm; sơnđan bol khai la Malah, Nôah, Hôglah, Milkah mơ Tirjah.

⁴Bol khai lòt tus hơ Eleajar cau gơnoar ơn phan duh khoai, hơ Jôsue kòn klau Nun, hơ ală cau kwang at bồ mơ đơs lah: “Yàng Jehôwa neh sồr Môise ai bol hi in dô pơnah sre brê digùl ală cau klau oh mi bol hi dê.” Behơ̆, jat jơnau gơnoar sồr Yàng Jehôwa dê mơ Jôsue ai bol khai in dô pơnah sre brê digùl ală cau klau oh mi bèp bol khai dê.

⁵Sre brê gơrê mơ Manase jơt pơnah, ò kòp Galaat mơ Basan ơm đah mattơngai lik hiòng Jordan;

⁶tài bơh ală kòn ùr Manase dê dòp geh sre brê gơrê mơ ală kòn klau khai dê. Ù tiah Galaat gơrê bal mơ ală cau gam wơl jơi bơtiàn Manase dê.

⁷Ù tiah Manase dê gơ lòt bơh Aser tus hơ Mikmethat ơm đah mattơngai lik Sicem dê. Nhàr gơ mù tơn hơ đah đang hơ làng bol ơm tòm En Tappuah.

⁸Ù tiah Tappuah gơrê hơ cau Manase, mơya ƀòn Tappuah ơm di nhàr ù tiah Manase, gen gơrê bal mơ kòn sau Epraim dê.

⁹Bơh tềng hơ̆, nhàr do mù đah đơm tus hơ thòng Kanah. Ală ƀòn dờng tềng do tus hơ đah đang croh digùl ală ƀòn dờng cau Manase dê gơrê bal mơ Epraim, gen nhàr Manase gơ lòt tơn hơ đah đang croh mơ gơ lồi di dàlềng.

¹⁰Ù tiah đah đơm gơrê bal mơ Epraim mơ ù đah đang gơrê bal mơ Manase. Ù tiah Manase dê gơ lòt tus hơ gah dàlềng mơ rò gah đah đang ù tiah Aser dê, mơ đah mattơngai lik ù tiah Isakar dê.

¹¹Tòm ù tiah Isakar mơ Aser, Manase kung gơs ƀòn dờng Bet San, Ipleam mơ ală làng bol Dôr, Endôr, Thaanat mơ Megidô bal mơ ală tiah jơnum làng bol gùt dar bol gơ dê (ƀòn dờng dơ̆ pe la Naphôt).

¹²Mơya ală cau Manase ò rgơi tòmpìt ai ală ƀòn dờng hơ̆; tài bơh làng bol Kanaan lơh nền kư̆ ơm tòm ù tiah hơ̆.

¹³Mơya tòm tŭ làng bol Israel neh gơlik pràn kơldang gen bol khai kup cau Kanaan duh broă bòl glar, mơya ò ting bơtrơh jơh bol khai.

¹⁴Kòn sau Jôsep đơs mơ Jôsue lah: “Ñchi bơh tài ồng neh ai bol hi in mìng dô pơnah ù tiah nàng lơh gơs sre brê taih? Ntum khà bol hi la gal ngan mơ Yàng Jehôwa neh ai lơngai bol hi in dô bă lìu làc.”

¹⁵Jôsue ho lah: “Dilah ntum khà bol mê la gal ngan behơ̆, gen guh tĕ hơ tiah dơr brê, mơ lơh goh ù tềng hơ̆ bol mê in tòm ù tiah cau Pherijit cau Rephaim mơ dilah lơgar mơnơm Epraim la hat hal bol mê in.”

¹⁶Kòn sau Jôsep ho lah: “Tiah mơnơm la ò tơl bol hi in, tài bơh jơh ală cau Kanaan ơm tòm ƀlàng gơs ală rơndeh tòmlơh mơ lòs, jơh mơ cau ơm tòm Betsean mơ ală ƀòn dềt gơ dê, bal mơ ală cau ơm tòm thòng Jejreel.”

¹⁷Mơya Jôsue đơs mơ hìu Jôsep hơ̆ la Epraim mơ Manase lah: “Ntum khà bol mê la oă mơ gơs pràn ngan; bol mê ò di mìng dòp geh dô pơnah lơm,

¹⁸mơya ù tiah mơnơm kung rơp la bal mơ bol mê tai sơl; bulah gơ la brê dơr, bol mê mus wàs tĕ mơ lơh tĕ jơh ù tiah hơ̆ gơlik gơs phan tòm bol mê dê, bulah cau Kanaan gơs rơndeh lòs tòmlơh mơ bulah bol khai gơs pràn, bol mê rơp ting bơtrơh bol khai bơh hơ̆ sơl.”