Read koho Jôsue 18 Bible Online

Jôsue 18 - koho bible

Jôsue 18

¹Gen jơh mpồl jơnum làng bol Israel pơjum bal tòm Silô mơ bơtào Sàl Tòm Mat tềng hơ̆. Jơh lơgar neh ơm hơđơm gơnoar at bồ bol khai dê.

²Mơya gam poh jơi bơtiàn digùl Israel òhềt dòp geh pơnah sre brê bol khai dê.

³Behơ̆ Jôsue đơs mơ làng bol Israel lah: “Nđò jŏ bol mê gam òbat bơh bơta mut tòmpìt ai sre brê tòm lơgar mơ Jehôwa Yàng Tom Trồ ală ồng pàng bol mê dê neh ai bol mê in taih?

⁴Rcang tĕ pe nă cau klau bơh tòm kòp jơi bơtiàn, gen añ rơp sồr bol khai lòt làm lơgar cih rùp lơgar gơ dê mơ sền sơwì sre brê bol khai; gen rê wơl hơ añ.

⁵Bol khai rơp tòmpà lơgar tòm poh pơnah. Juda rơp ơm tòm ù tiah bol khai dê tòm đah đơm, mơ hìu Jôsep rơp ơm tòm ù tiah bol khai dê tòm đah đang.

⁶Tơnơ̆ mơ tŭ bol mê neh cih rùp yal loh bơh poh pơnah lơgar rau, gen cèng tĕ añ in tềng do; añ rơp tă khà bol mê in di đap Jehôwa Yàng Tom Trồ bol mê dê tềng do.

⁷Cau Lebi ò geh dô pơnah digùl bol mê, bơh gơnoar broă ơn phan duh khoai Yàng Jehôwa in la sre brê bol khai dê; mơ jơi bơtiàn Gat, Ruben, mơ nggùl jơi bơtiàn Manase neh dòp geh sre brê đah mattơngai lik hiòng Jordan mơ Môise cau duh broă Yàng Jehôwa dê neh ai bol khai in.”

⁸Behơ̆ ală cau klau hơ̆ sơntòm lòt gùng, gen Jôsue ai gơnoar sồr bol khai la cau lik lòt nàng cih rùp ù tiah, mơ đơs lah: “Lòt tĕ sền sơwì làm lơgar mơ cih rùp gơ, gen rê wơl hơ añ; añ rơp tă khà bol mê in di đap Yàng Jehôwa tềng do tòm Silô.”

⁹Behơ̆ ală cau hơ̆ ñă lòt làm lơgar mơ cih rùp gơtòm dô pồt sră, cih bơh kòp ƀòn tòm poh pơnah; gen bol khai rê wơl hơ Jôsue tòm sàl ơm tòm Silô,

¹⁰gen Jôsue tă khà bol khai in tòm Silô di đap Yàng Jehôwa, mơ tềng hơ̆ khai tòmpà ù tiah làng bol Israel in jat kòp jơi bơtiàn bol khai dê.

¹¹Pơnah tă khà di dê jơi bơtiàn Benjamin jat kòp mpồl bol khai dê neh guh, mơ ù tiah jào bol khai in gơ ơm digùl jơi bơtiàn Juda mơ jơi bơtiàn Jôsep.

¹²Nhàr ù tiah bol khai đah đang gơ rơp sơntòm bơh hiòng Jordan; gen lòt guh đah hơđang kơh mơnơm Jerikô, gen guh hơ lơgar kơh mơnơm đah mattơngai mut; mơ lồi dut tòm ƀlàng ngềt ngơt Bet Aben.

¹³Bơh tềng hơ̆ nhàr gơ lòt gan đah đơm kơh mơnơm Lus dê (hơ̆ la Betel), mơ mù tus hơ Atarôt Adar hơđang mơnơm đah đơm tiah liah Bet Hôrôn.

¹⁴Bơh mơnơm di đap Bet Hôrôn đah mattơngai mut, nhàr lơgar gơwèt wơl đah đơm, gơ lòt jat đah mattơngai mut mơ tus di Kiriat Baal (hơ̆ la Kiriat Jearim), la dô nơm ƀòn dờng gơrê bal mơ làng bol Juda. Hơ̆ la nhàr đah mattơngai mut.

¹⁵Nhàr đah đơm gơ rơp sơntòm bơh tiah bơdìh Kiriat Jearim đah mattơngai mut mơ gơ lòt tus hơ Ephrôn, tus hơ croh dà Neptôah;

¹⁶Gen nhàr gơ mù tus hơ jơng mơnơm di đap thòng Ben Hinnôm ơm đah đang thòng Rephaim dê. Gơ lòt pơnjat tai mơ mù tus hơ thòng kòn klau Hinôm, jat rò gah đah đơm kơh mơnơm ƀòn dờng cau Jebusit dê mơ mù tus hơ En Rôgel.

¹⁷Gen nhàr gơ lòt wơl hơ đah đang tus hơ En Semes, kư̆ lòt tus hơ Gelilot ơm hơđap kơh Adummim; lồc behơ̆ gơ mù tus hơ Lŭ Bôhan, kòn klau Ruben dê.

¹⁸Gơ kư̆ pơnjat lòt tus hơ kơh mơnơm đah đang Bet Arabah mơ gơ mù tus hơ Arabah.

¹⁹Gen gơ lòt tai tus di kơh mơnơm Bet Hôglah; mơ gơ lồi di đah đang gah Dàlềng Chơt, di bơr đah đơm hiòng Jordan. Do la nhàr đah đơm.

²⁰Hiòng Jordan lơh gơs nhàr lơgar đah mattơngai lik. Do la sre brê jơi bơtiàn Benjamin, jat kòp hìu nhă, bơh nhàr do tus hơ nhàr ne làm jơh gùt dar.

²¹Ală ƀòn dờng gơrê mơ jơi bơtiàn Benjamin dê jat kòp mpồl hìu nhă la: Jerikô, Bet Hôglah, Emek Kesis,

²²Bet Arabah, Jemaraim, Betel,

²³Abim, Parah, Ôprah,

²⁴Kephar Amôni, Ôpni, mơ Geba jơt bàr nơm ƀòn dờng bal mơ ală ƀòn dềt bol gơ dê.

²⁵Gabaôn, Ramah, Beerôt,

²⁶Mispa, Kephirah, Môsah,

²⁷Rekem, Irpeel, Taralah,

²⁸Jelah, Haelep, ƀòn dờng cau Jebusit dê (hơ̆ la Jerusalem), Gibeah, mơ Kiriat Jearim jơt poan nơm ƀòn dờng bal mơ ală ƀòn dềt bol gơ dê. Hơ̆ la ù tiah sre brê jơi bơtiàn Benjamin dê jat ală mpồl hìu nhă bol khai dê.