Read koho Jôsue 19 Bible Online

Jôsue 19 - koho bible

Jôsue 19

¹Pơnah ù tiah tă khà dơ̆ bàr di di jơi bơtiàn Simeôn, jat kòp mpồl hìu nhă bol khai dê. Ù tiah bol khai dê ơm tòm dơlam sre brê jơi bơtiàn Juda dê.

²Sre brê jơi bơtiàn Simeôn dê la: Beerseba, Seba, Moladah,

³Hajar Sual, Balah, Ejem,

⁴Elthôlat, Bethul, Hôrmah,

⁵Jiklak, Bet Markabôt, Hajar Susah,

⁶Bet Lebaôt mơ Saruhen jơt pe nơm ƀòn dờng bal mơ ală ƀòn dềt bol gơ dê.

⁷Ain, Rimmôn, Ether mơ Asan — poan nơm ƀòn dờng bal mơ ală ƀòn dềt bol gơ dê,

⁸mơ jơh ală ƀòn dềt ơm gùt dar ală ƀòn dờng hơ̆ jơl tus di Baalat Beer la Ramah tòm Negep. Hơ̆ la sre brê jơi bơtiàn Simeôn dê jat kòp mpồl hìu nhă bol khai dê.

⁹Sre brê jơi bơtiàn Simeôn dê ơm tòm pơnah ù tiah cau Juda dê; tài bơh pơnah jơi bơtiàn cau Juda dê la dờng ơnàng rlau ir bol khai in; behơ̆ cau Simeôn dòp geh sre brê bol khai dê tòm gùl ù tiah cau Juda dê.

¹⁰Pơnah ù tiah tă khà dơ̆ pe di dê jơi bơtiàn Jebulun jat kòp mpồl hìu nhă bol khai dê. Nhàr ù tiah bol khai dê ngài tus hơ Sarit;

¹¹Gen gơ lòt hơ đah mattơngai lik tus hơ Maralah, tìp Dabeset mơ pò ơnàng tus hơ thòng rềp Jôkneam.

¹²Bơh Sarit gơ lòt song hơ đah mattơngai lik tus hơ nhàr Kislôt Thabôr, kư̆ pơnjat tus hơ Daberat mơ guh hơ Japhia.

¹³Bơh tềng hơ̆ gơ lòt tơn hơ đah mattơngai lik tus hơ Gat Hepher mơ Et Kajin; gen gơlik bơh Rimmôn mơ wèt hơ Neah.

¹⁴Nhàr gơ lòt wơl bơh đah đang tus hơ Hanathôn mơ gơ lồi di thòng Ipthah El;

¹⁵mơ Kattat, Nahalal, Simrôn, Idalah, mơ Betlehem; gơs jơt bàr nơm ƀòn dờng bal mơ ală ƀòn dềt bol gơ dê.

¹⁶Do la sre brê jơi bơtiàn Jebulun dê jat kòp mpồl hìu nhă bol khai dê, bal mơ ală ƀòn dờng mơ ală ƀòn dềt gơ dê.

¹⁷Pơnah ù tiah tă khà dơ̆ poan di di Isakar jat kòp mpồl hìu nhă bol khai dê.

¹⁸Ù tiah bol khai dê tơrgòm jơh Jejreel, Kesulôt, Sunem,

¹⁹Hapharaim, Siôn, Anaharat,

²⁰Rabit, Kisiôn, Ebes,

²¹Remet, En Gannim, En Hadah, mơ Betpasses.

²²Nhàr gơ tus di Thabôr, Sahasumah mơ Bet Semet, mơ nhàr gơ lồi di hiòng Jordan. Gơs jơt prau nơm ƀòn dờng bal mơ ală ƀòn dềt bol gơ dê.

²³Hơ̆ la sre brê jơi bơtiàn Isakar dê jat kòp mpồl bol khai dê.

²⁴Pơnah ù tiah tă khà dơ̆ pram di dê jơi bơtiàn Aser jat kòp mpồl hìu nhă bol khai dê.

²⁵Pơnah ù hơ̆ tơrgòm Hekat, Hali, Beten, Aksap,

²⁶Alhammelek, Amad, mơ Misal. Tòm đah mattơngai mut nhàr gơ tus di Karmel mơ Sihor Lipnat.

²⁷Gen gơwèt hơ đah mattơngai lik mơ lòt hơ Bet Dagôn, tus di Jebulun mơ thòng Iptha El, gen gơ lòt đah đang tus Bet Emek mơ Neiel; lòt gan Kabul ơm đah kiau.

²⁸Gơ lòt tus hơ Ebrôn, Rehôp, Hammôn mơ Kanah, jơl tus hơ ƀòn Sidôn Dờng.

²⁹Nhàr gơ wơl hơ Ramah, lòt tus hơ ƀòn dờng kơ̆ cê Tirơ, gen nhàr gơwèt hơ Hôsah, mơ gơ tus hơ dàlềng tòm kơnhwàl Akjip.

³⁰Ummah, Aphek, mơ Rehôp. Gơs bàr jơt bàr nơm ƀòn dờng bal mơ ală ƀòn dềt bol gơ dê.

³¹Ală ƀòn dờng do bal mơ ală ƀòn dềt bol gơ dê la sre brê jơi bơtiàn Aser, jat kòp mpồl hìu nhă bol khai dê.

³²Pơnah ù tiah tă khà dơ̆ prau di dê jơi bơtiàn Neptali, jat kòp mpồl hìu nhă bol khai dê.

³³Nhàr gơ lòt bơh Helep, bơh tòm chi dờng ơm tòm Jaanannim, lòt gan Adami Nekep mơ Japneel tus hơ Lakkum, mơ gơ lồi di hiòng Jordan.

³⁴Nhàr gơ lòt hơ đah mattơngai mut gan Asnô Thabôr, mơ tus hơ Hukkôk. Gơ lòt tus hơ Jebulun tòm đah đơm, Aser đah mattơngai mut, mơ Juda đah mattơngai lik hiòng Jordan.

³⁵Ală ƀòn dờng kơ̆ cê la Jidim, Jer, Hamat, Rakkat, Kineret.

³⁶Adamah, Ramah, Hajor,

³⁷Kedes, Edrei, En Hajor,

³⁸Irôn, Mikdal El, Hôrem, Bet Anak mơ Bet Semes, gơs jơt sin ƀòn dờng bal mơ ală ƀòn dềt bol gơ dê.

³⁹Ală ƀòn dờng bal mơ ală ƀòn dềt do la sre brê Neptali dê jat kòp mpồl hìu nhă bol khai dê.

⁴⁰Pơnah ù tiah tă khà dơ̆ poh di di jơi bơtiàn Dan jat kòp mpồl hìu nhă bol khai dê.

⁴¹Ù tiah sre brê bol khai dê tơrgòm: Jôrah, Estaôl, Ir Semes,

⁴²Saalabbin, Aijalôn, Ithlah,

⁴³Elôn, Thimna, Ekrôn,

⁴⁴Elthekeh, Gipbethôn, Baalak,

⁴⁵Jehut, Bene Berat, Gat Rimmôn,

⁴⁶Me Jarkôn mơ Rakkôn, bal mơ kơnhwàl di đap Jôppa.

⁴⁷Tòm tŭ ù tiah làng bol Dan neh gơkòl roh, gen bol khai guh tòmlơh mơ Lesem, tơnơ̆ mơ tŭ tòmpìt ai gơ bol khai ngui đào tơnchơt làng bol gơ dê mơ ai gơlơh gơs sre brê bol khai dê. Bol khai ơm tềng hơ̆ mơ sơnđan tiah hơ̆ la Lesem, Dan jat sơnđan ồng pàng bol khai dê.

⁴⁸Ală ƀòn dờng hơ̆ bal mơ ală ƀòn dềt bol gơ dê lơh gơs sre brê jơi bơtiàn Dan dê jat kòp mpồl hìu nhă bol khai dê.

⁴⁹Tòm tŭ bol khai neh sir tòmpà lơgar jat ală pơnah be neh tă khà, làng bol Israel ai Jôsue kòn klau Nun in dô pơnah sre brê digùl bol khai,

⁵⁰jat jơnau gơnoar sồr Yàng Jehôwa dê. Bol khai tòmpà Jôsue in ƀòn dờng mơ khai neh dan, hơ̆ la Thimnat Serah ơm tòm tiah mơnơm Epraim. Khai bơt bơtào ƀòn hơ̆ mơ ơm tềng hơ̆.

⁵¹Hơ̆ la ală pơnah ù tiah mơ Eleajar cau gơnoar ơn phan duh khoai, Jôsue kòn klau Nun mơ ală cau kwang at bồ ală mpồl Israel dê neh tă khà mơ tòmpà di Sàl Tòm Mat di đap Yàng Jehôwa tòm Silô. Behơ̆ bol khai lơh sir bơta tòmpà lơgar.