Read koho Jôsue 2 Bible Online

Jôsue 2 - koho bible

Jôsue 2

¹Gen Jôsue kòn klau Nun dê, sồr bàr nă cau bơh Sittim lòt sền òm lơgar, mơ đơs lah: “Lòt tĕ sền òm làm lơgar, oă rlau jơh la Jerikô.” Behơ̆, bol khai lòt mơ mut tòm hìu dô nă cau ùr dri, sơnđan la Rahap mơ ơm mang tềng hơ̆.

²Gơs cau yal mơ bơtau Jerikô lah: “Gơs cau Israel neh tus tềng do mang ti nàng sền òm lơgar.”

³Gen cau bơtau ƀòn Jerikô sồr đơs mơ Rahap lah: “Cèng tơlik tĕ ală cau neh tus mut ơm tòm hìu ai dê, bơh bol khai neh tus mìng nàng sền òm làm jơh lơgar.”

⁴Mơya cau ùr hơ̆ neh cèng pồn bàr nă bol khai, mơ khai đơs lah: “Ngan, gơs ală cau klau neh tus mơ añ, mơya añ ò git bol khai neh tus bơh tiah lơi.

⁵Tŭ trồ mho, tòm tŭ mòr til mpồng ƀòn, bol khai neh lik lòt mơ añ ò git ntềng đah bol khai lòt. Ting jat tĕ bol khai mhar, bơh bol mê rơp jat bàn bol khai.”

⁶Mơya, Rahap neh lam bàr nă bol hơ̆ guh hơđang rkàng hìu, mơ neh pồn bol hơ̆ hơđơm gơnru che dơmài mơ khai neh pràng hơđang hơ̆.

⁷Behơ̆ ală cau klau geh sồr ting jat bàr nă cau sền òm lơgar tòm gùng lòt hơ ală tiah thòl hiòng Jordan dê. Tòm tŭ ală cau ting jat neh lik bơh ƀòn gen mpồng ƀòn neh til.

⁸Lài mơ tŭ ală cau sền òm lơgar òhềt bic, Rahap guh hơ bol khai hơđang rkàng hìu,

⁹mơ đơs lah: “Añ git lah Yàng Jehôwa neh ai ală ồng in lơgar do, bơta rngòt ală ồng neh dùh hơđang bol hi, tian gơs jơh ală cau tòm lơgar do rngòt gơdô nùs di đap ală ồng.

¹⁰Bol hi neh kơno Yàng Jehôwa neh lơh Dàlềng Pơrhê gơlik rañ rsơh di đap ală ồng tòm tŭ ală ồng lik bơh lơgar Ejiptơ, mơ mbe ală ồng neh lơh mơ bàr nă bơtau làng bol Amôr ơm đah mattơngai lik hiòng Jordan la Sihôn mơ Ok, mơ ală ồng neh tơnroh jơh bol khai.

¹¹Dơ̆ bol hi kơno ală bơta hơ̆ gen nùs bol hi gơlề lac jơh, ò gơs cau lơi digùl bol hi gam khin cha tai di đap ală ồng, ngan behơ̆, Jehôwa Yàng Tom Trồ ală ồng dê la Yàng Tom Trồ ơm hơđang trồ ne mơ tòm ù do.

¹²Behơ̆ tŭ do, bơh añ neh gơwèt niam mơ bàr nă ồng gen dan bàr nă ồng ai sơnđan Yàng Jehôwa mơ srat să ho nền mơ añ lah ală ồng kung rơp gơwèt niam wơl mơ hìu nhă añ. Dan ai añ in dô nơm tềl bơh bơta dòn song

¹³la ală ồng rơp lòi wơl mè bèp ruh lŏ añ, bal mơ jơh ală cau gơrê bal mơ bol khai, mơ dong bol hi klàs bơh bơta chơt.”

¹⁴Bàr nă bol hơ̆ ho khai lah: “Bơta kis bol hi dê rơp ala bơta kis ai dê; dilah ai ò yal tơlik broă bol hi dê, gen bol hi rơp gơwèt niam mơ dòn song mơ ai tòm tŭ Yàng Jehôwa ai bol hi in lơgar.”

¹⁵Behơ̆ Rahap ai dô dang che mơ tơmù bol khai bơh di mpồng dềt, bơh hìu khai ơm rềp di dơrñang ƀòn mơ khai ơm đah dơlam gơ.

¹⁶Khai đơs mơ bol khai lah: “Lòt tĕ hơ lơgar kơh mơnơm tồ ală cau ting jat ò bàn ală ồng, ơm pồn tĕ tềng hơ̆ pe ngai jơl tus di tŭ ală cau ting jat neh rê wơl, tơnơ̆ hơ̆ ală ồng lòt tĕ gùng ală ồng dê.”

¹⁷Bàr nă bol khai đơs mơ Rahap lah: “Bol hi rơp prap gàr jơnau srat să mơ ai neh sồr bol hi ho nền.

¹⁸Dilah tòm tŭ bol hi mut tòmpìt lơgar mơ ai ò kơt che pơrhê do di mpồng dềt ai neh tơmù bol hi, mơ ai ò pơjum tơrgòm tòm hìu ai dê mè bèp ruh lŏ mơ jơh ală cau tòm hìu nhă ai dê.

¹⁹Dilah gơs cau lơi tòm bol ai lik bơh di mpồng hìu ai dê mơ lòt tòm gùng, gen bol khai rơp kong is bơh bơta chơt bol khai dê, mơ bol hi ò gơs glài; mơya dilah gơs cau lơi ai tê lơh iơh di cau lơi ơm tòm hìu ai, gen bol hi rơp kong bơh bơta chơt bol khai dê.

²⁰Mơya dilah ai yal bơh broă bol hi do mơ cau lơi in, gen bol hi rơp lik klàs bơh jơnau srat să ho nền mơ ai.”

²¹Gen Rahap đơs lah: “Lơh jat tĕ tòm toh be jơnau ală ồng neh đơs hơ̆.” Gen khai lòi bàr nă bol hơ̆ in lòt, mơ bol khai lik lòt. Gen cau ùr kơt che pơrhê di mpồng dềt.

²²Bàr nă bol khai lòt tus hơ lơgar kơh mơnơm, mơ ơm tềng hơ̆ pe ngai, jơl tus ală cau ting jat neh rê. Bol hơ̆ neh jòi bol khai làm ală gùng mơya ò bàn.

²³Gen bàr nă bol khai mù wơl bơh lơgar kơh mơnơm. Bol khai tiă hiòng Jordan mơ tus hơ Jôsue kòn klau Nun dê, mơ yal wơl Jôsue in jơh ală bơta neh gơlik gơs mơ bol khai.

²⁴Bol khai đơs mơ Jôsue lah: “Di ngan Yàng Jehôwa neh jào jơh lơgar tòm tê bol he dê; jơh làng bol tòm lơgar neh gơdô nùs rngòt di đap bol he.”