Read koho Jôsue 21 Bible Online

Jôsue 21 - koho bible

Jôsue 21

¹Tŭ hơ̆ ală cau at bồ ală hìu nhă cau Lebi dê tus hơ Eleajar cau gơnoar ơn phan duh khoai, hơ Jôsue kòn klau Nun mơ tus hơ ală cau at bồ ală hìu nhă ală jơi bơtiàn Israel dê,

²bol khai tus hơ Silô tòm Kanaan mơ đơs mơ bol khai lah: “Yàng Jehôwa neh ai gơnoar sồr Môise hơ̆ la ai bol hi in ală ƀòn dờng nàng ơm, bal mơ ală ƀlàng ñhơt nàng ròng siam phan poan jơng bol hi dê.”

³Behơ̆, jat gơnoar sồr Yàng Jehôwa dê làng bol Israel ai ală ƀòn dờng be tơnơ̆ do bal mơ ală ƀlàng ñhơt tòmpà lơh gơs sre brê ală cau Lebi in.

⁴Bơta tă khà jat kòp hìu nhă ală cau Kôhat in. Bơh ală cau Lebi la kòn sau Arôn cau gơnoar ơn phan duh khoai tă khà dòp jơt pe ƀòn dờng bơh tòm ală jơi bơtiàn cau Juda, Simeôn, mơ Benjamin.

⁵Ai ală kòn sau gam wơl Kôhat dê tă khà dòp jơt nơm ƀòn dờng bơh di ală hìu nhă jơi bơtiàn Epraim, Dan mơ nggùl jơi bơtiàn Manase.

⁶Ală kòn sau Gersôn tă khà dòp jơt pe nơm ƀòn dờng bơh di ală hìu nhă ală jơi bơtiàn Isakar, Aser, Neptali mơ nggùl jơi bơtiàn Manase ơm tòm Basan.

⁷Ală kòn sau Merari jat ală hìu nhă bol khai dê dòp jơt bàr nơm ƀòn dờng bơh di ală jơi bơtiàn Ruben, Gat mơ Jebulun.

⁸Ală ƀòn dờng bal mơ ală ƀlàng ñhơt hơ̆ cau Israel neh tă khà tòmpà cau Lebi in, jat be Yàng Jehôwa neh ai gơnoar sồr Môise.

⁹Bơh ală jơi bơtiàn Juda mơ Simeôn, bol khai tòmpà ală ƀòn dờng gơs sơnđan be tơnơ̆ do bol khai in,

¹⁰ală ƀòn dờng do neh ai kòn sau Arôn in bơh tòm hìu nhă Kôhat gơrê mơ jơi bơtiàn Lebi dê, bơh di tŭ tă khà dơ̆ sơnròp di di bol khai:

¹¹Bol khai geh tòmpà Kiriat Arba (Arba la bèp Anak dê), hơ̆ la Hebrôn, ơm tòm tiah kơh mơnơm Juda dê, bal mơ ală ƀlàng ñhơt gùt dar.

¹²Mơya ală ƀlàng sre bal mơ ală ƀòn dềt gùt dar ƀòn dờng gen neh ai Kalep kòn klau Jephune in lơh gơs sre brê.

¹³Bol khai ai kòn sau Arôn in la cau gơnoar lam bồ ơn phan duh khoai ƀòn Hebrôn, ƀòn kìng crŭ cau tơnchơt cau in, Lipna,

¹⁴Jattir bal mơ ƀlàng ñhơt gơ dê, Estemoa bal mơ ƀlàng ñhơt gơ dê,

¹⁵Hôlôn bal mơ ƀlàng ñhơt gơ dê, Debir bal mơ ƀlàng ñhơt gơ dê,

¹⁶Ain bal mơ ƀlàng ñhơt gơ dê, Juttah bal mơ ƀlàng ñhơt gơ dê mơ Bet Semes bal mơ ƀlàng ñhơt gơ dê; jơh ală la sin nơm ƀòn dờng bơh di bàr jơi bơtiàn hơ̆.

¹⁷Bơh jơi bơtiàn Benjamin cau ai bol khai in Gabaôn bal mơ ƀlàng ñhơt gơ dê, Geba bal mơ ƀlàng ñhơt gơ dê,

¹⁸Anatôt bal mơ ƀlàng ñhơt gơ dê mơ Almôn bal mơ ƀlàng ñhơt gơ dê; jơh ală la poan nơm ƀòn dờng.

¹⁹Jơh ală ƀòn dờng tòmpà ai ală cau gơnoar ơn phan duh khoai kòn sau Arôn dê, la jơt pe nơm ƀòn dờng bal mơ ală ƀlàng ñhơt bol gơ dê.

²⁰Ală mpồl hìu nhă Kôhat cau Lebi gam wơl gơrê bal mơ ală hìu nhă Kôhat tòm jơi bơtiàn Lebi dê, ală ƀòn dờng tòmpà bol khai in lik bơh jơi bơtiàn Epraim.

²¹Tòmpà tiah Sicem cau Epraim in, ƀòn kìng crŭ cau tơnchơt cau in, bal mơ ƀlàng ñhơt gơ dê tòm lơgar kơh mơnơm, mơ Gejer bal mơ ƀlàng ñhơt gơ dê,

²²Kipjaim bal mơ ƀlàng ñhơt gơ dê mơ Bet Hôrôn bal mơ ƀlàng ñhơt gơ dê; jơh ală la poan nơm ƀòn dờng.

²³Bơh di jơi bơtiàn Dan, bol khai dòp geh Eltekeh bal mơ ƀlàng ñhơt gơ dê, Gibethôn bal mơ ƀlàng ñhơt gơ dê,

²⁴Aijalôn bal mơ ƀlàng ñhơt gơ dê mơ Gat Rimmôn bal mơ ƀlàng ñhơt gơ dê, jơh ală la poan nơm ƀòn dờng.

²⁵Bơh di nggùl jơi bơtiàn Manase, bol khai dòp geh Taanak bal mơ ƀlàng ñhơt gơ dê, Gat Rimôn bal mơ ƀlàng ñhơt gơ dê, jơh ală la bàr nơm ƀòn dờng.

²⁶Jơh jơt nơm ƀòn dờng do bal mơ ală ƀlàng ñhơt gùt dar gơ, neh ai ală hìu nhă gam wơl cau Kôhat in.

²⁷Bơh di nggùl jơi bơtiàn Manase cau kung tă ai ală mpồl Gersôn cau Lebi in ƀòn dờng Gôlan tòm Basan la ƀòn kìng crŭ cau tơnchơt cau in mơ Be Esterah, bal mơ ală ƀlàng ñhơt gùt dar ƀòn; jơh ală la bàr nơm ƀòn dờng.

²⁸Bơh di jơi bơtiàn Isakar: Gơs Kisiôn, Daberat,

²⁹Jarmut mơ En Gannim, bal mơ ală ƀlàng ñhơt bol gơ dê; jơh ală la poan nơm ƀòn dờng.

³⁰Bơh di jơi bơtiàn Aser, bol khai ai Misal, Apdôn,

³¹Helkat bal mơ ƀlàng ñhơt gơ dê, mơ Rehôp bal mơ ƀlàng ñhơt gơ dê; poan nơm ƀòn dờng.

³²Bơh di jơi bơtiàn Neptali, bol khai ai Kedes tòm Galile bal mơ ƀlàng ñhơt gơ dê, ƀòn kìng crŭ cau tơnchơt cau in, Hammôt Dôr bal mơ ƀlàng ñhơt gơ dê mơ Kartan bal mơ ƀlàng ñhơt gơ dê, pe nơm ƀòn dờng.

³³Jơh ală ƀòn dờng ală mpồl cau Gersôn la jơt pe nơm, bal mơ ală ƀlàng ñhơt gùt dar.

³⁴Jơh ală cau gam wơl tòm jơi bơtiàn Lebi, mpồl Merari, geh bơh jơi bơtiàn Jebulun, Jôkneam bal mơ ală ƀlàng ñhơt gơ dê, Kartan bal mơ ală ƀlàng ñhơt gơ dê,

³⁵Dimnah bal mơ ală ƀlàng ñhơt gơ dê mơ Nahalal bal mơ ală ƀlàng ñhơt gơ dê; poan nơm ƀòn dờng.

³⁶Bơh di jơi bơtiàn Ruben, bol khai ai Besjer bal mơ ală ƀlàng ñhơt gơ dê, Jahjah bal mơ ală ƀlàng ñhơt gơ dê,

³⁷Kedemôt bal mơ ală ƀlàng ñhơt gơ dê mơ Mephaat bal mơ ală ƀlàng ñhơt gơ dê; poan nơm ƀòn dờng.

³⁸Bơh di jơi bơtiàn Gat, bol khai ai Ramôt tòm Galaat bal mơ ală ƀlàng ñhơt gơ dê, ƀòn kìng crŭ ală cau tơnchơt cau in, Mahanaim bal mơ ală ƀlàng ñhơt gơ dê,

³⁹Hesbôn bal mơ ală ƀlàng ñhơt gơ dê mơ Jaser bal mơ ală ƀlàng ñhơt gơ dê; jơh ală la poan nơm ƀòn dờng.

⁴⁰Jơh ală ƀòn dờng tòmpà ai ală mpồl hìu nhă cau Merari in la ală cau gam wơl tòm jơi bơtiàn Lebi, geh tòmpà bol khai in jơt bàr nơm ƀòn dờng.

⁴¹Ală ƀòn dờng cau Lebi dê ơm digùl ù tiah làng bol Israel dê, jơh ală la poan jơt phàm nơm ƀòn dờng bal mơ ală ƀlàng ñhơt gơ dê.

⁴²Kòp nơm ƀòn dờng hơ̆ gơs ƀlàng ñhơt gùt dar; jơh ală ƀòn dờng hơ̆ neh gơs behơ̆.

⁴³Behơ̆ Yàng Jehôwa neh ai Israel in jơh ù tiah mơ Kơnràñ neh srat să ho nền mơ ală ồng pàng bol khai dê, mơ Kơnràñ ai bol khai in lơh gơs sre brê mơ ơm tềng hơ̆.

⁴⁴Mơ Yàng Jehôwa ai bol khai in rlô bơh ală đah jat be Kơnràñ neh srat să ho nền mơ ală ồng pàng bol khai dê. Ò gơs dô nă cau sò tơm lơi rgơi ntào jai di đap bol khai. Bơh Yàng Jehôwa neh jào jơh ală cau sò tơm tòm tê bol khai.

⁴⁵Tòm jơh ală jơnau ho pơgon niam mơ Yàng Jehôwa neh bơtào mơ hìu Israel, ò gơs jơnau lơi ò gơlik gơs; jơh ală neh gơlik di ngan lơm.