Read koho Jôsue 22 Bible Online

Jôsue 22 - koho bible

Jôsue 22

¹Gen Jôsue hòi pơjum cau Ruben, cau Gat mơ nggùl cau Manase,

²mơ đơs mơ bol khai lah: “Bol mê neh lơh jat jơh ală jơnau gơnoar sồr Môise dê la cau duh broă Yàng Jehôwa, mơ bol mê neh dòn bơr jơh ală jơnau añ neh sồr bol mê

³Bơh bol mê ò sang lòi oh mi bol mê bơh jŏ ngai tus di tŭ do, mơya bol mê neh kơrhia prap gàr lơh ală broă mơ Jehôwa Yàng Tom Trồ bol mê dê neh ai bol mê in.

⁴Tŭ do Jehôwa Yàng Tom Trồ bol mê dê neh ai ală oh mi bol mê in bơta rlô lơngai jat be Kơnràñ neh ho pơgon. Gen tàng rê tĕ hơ sàl bol mê dê tòm ù tiah gơs sre brê bol mê dê la tiah Môise cau duh broă Yàng Jehôwa dê, neh ai bol mê in đah ne hiòng Jordan.

⁵Mơya kơrhia tĕ prap gàr bơta sồr lam mơ bơta boh lam mơ Môise, cau duh broă Yàng Jehôwa dê, neh ai bol mê in, kòñ gơboh Jehôwa Yàng Tom Trồ bol mê dê, lòt tòm jơh ală gùng dà Kơnràñ dê, dòn bơr lơh jat jơh ală jơnau gơnoar sồr Kơnràñ dê, đềt mềr mơ Kơnràñ mơ jơh nùs jơh hwềng soàn duh broă Kơnràñ.”

⁶Gen Jôsue ai lơngai bol khai in mơ lòi bol khai rê, gen bol khai rê tòm sàl bol khai dê.

⁷Tŭ hơ̆ Môise neh ai nggùl jơi bơtiàn Manase in dô pơnah sre brê tòm Basan; mơya nggùl jơi bơtiàn ne Jôsue neh ai dô pơnah sre brê di gah oh mi Israel bol khai tòm ù tiah đah mattơngai mut hiòng Jordan. Mơ tòm tŭ Jôsue sồr bol khai rê hơ sàl bol khai dê, gen ai lơngai bol khai in,

⁸mơ đơs lah: “Rê tĕ hơ sàl bol mê dê bal mơ oă phan mơna mơ oă ngan phan poan jơng, bal mơ priă, màh, kòng, lòs, mơ oă ồi ào. Tòmpà tĕ ală phan neh pìt geh bơh di cau sò tơm bol mê dê oh mi bol mê in.”

⁹Behơ̆, cau Ruben, cau Gat bal mơ nggùl jơi bơtiàn cau Manase rê wơl hơ hìu bol khai dê, cah is bơh cau Israel tòm Silô, hơ̆ la tòm lơgar Kanaan, nàng rê hơ ù tiah Galaat la lơgar tòm bol khai dê mơ bol khai neh dòp sre brê jat jơnau gơnoar sồr Yàng Jehôwa dê neh sồr Môise.

¹⁰Tòm tŭ bol khai tus hơ Gêlilôt rềp hiòng Jordan tòm lơgar Kanaan gen cau Ruben, cau Gat, mơ nggùl jơi bơtiàn cau Manase bơt bơtào dô nơm cơnòng duh khoai dờng ngan di gah hiòng Jordan.

¹¹Mơ tòm tŭ làng bol Israel kơno lah bol hơ̆ neh bơt bơtào dô nơm cơnòng duh khoai dê nhàr lơgar Kanaan, tòm Gêlilôt, rềp hiòng Jordan, gơrê bal mơ Israel,

¹²Tòm tŭ làng bol Israel kơno bơta hơ̆, gen pơjum bal jơh Israel tòm Silô, nàng lòt tòmlơh mơ bol hơ̆.

¹³Behơ̆ làng bol Israel sồr Phineas, kòn klau cau gơnoar ơn phan duh khoai Eleajar, lòt tus hơ cau Ruben, cau Gat, mơ nggùl jơi bơtiàn cau Manase tòm lơgar Galaat.

¹⁴Kung gơs jơt nă cau kwang at bồ, kòp jơi bơtiàn Israel dô nă; kòp nă tòm bol hơ̆ la cau at bồ dô mpồl hìu nhă tòm ală jơi bơtiàn Israel dê.

¹⁵Tòm tŭ bol khai tus hơ cau Ruben, cau Gat, mơ nggùl jơi bơtiàn cau Manase tòm ù tiah Galaat, gen đơs mơ bol hơ̆ lah:

¹⁶“Jơh mpồl jơnum Yàng Jehôwa dê đơs lah: ‘Ñchi bơta bol mê ò dòn song do mơ bol mê neh tòmdră mơ Yàng Tom Trồ Israel dê, sang lòi ò lòt jat Yàng Jehôwa tòm ngai do, mơ bơt bơtào bol mê in dô nơm cơnòng duh khoai ndai ngai do nàng tòmdră mơ Yàng Jehôwa taih?

¹⁷Bơta tồi glài tòm Pheor ò tơl bol he in nàng lơh goh să tòm bol he ò ơ? Mơ bơh hơ̆ bơta rung rài neh dùh hơđang mpồl jơnum Yàng Jehôwa dê,

¹⁸mơ ngai do bol mê pal sang lòi ò lòt jat Yàng Jehôwa! Dilah ngai do bol mê tòmdră mơ Yàng Jehôwa, gen Kơnràñ rơp gơhào gơjrañ di jơh mpồl jơnum Israel tòm ngai hìng.

¹⁹Mơya tŭ do, dilah ù tiah bol mê dòp geh neh gơlik gơs ƀơ̆ ƀơl, gen tiă tĕ tus hơ ù tiah Yàng Jehôwa dê, la tiah gơs Hìu Ing Duh Khoai Yàng Jehôwa dê, mơ dòp dô pơnah sre brê bol mê dê digùl bol hi. Mơya bañ tòmdră mơ Yàng Jehôwa, hala tòmdră mơ bol hi mơ bơt bơtào bol mê in dô nơm cơnòng duh khoai ndai rlau mơ cơnòng duh khoai Jehôwa Yàng Tom Trồ bol he dê.

²⁰Ò di Akan kòn klau Jerah neh ò dòn song gơwèt mơ phan pal phi ơn, mơ bơta gơjrañ dờng Yàng Jehôwa dê neh dùh hơđang mpồl jơnum Israel dê ò ơ? Mơ ò di mìng dô nă khai neh kong chơt tài bơh tồi glài khai dê ò!’”

²¹Gen cau Ruben, cau Gat, mơ nggùl jơi bơtiàn cau Manase ho wơl mơ ală cau at bồ ală mpồl hìu nhă Israel dê lah,

²²“Jehôwa la Yàng Tom Trồ ală yàng dê! Jehôwa la Yàng Tom Trồ ală yàng dê! Kơnràñ git; mơ lòi tĕ Israel in git! Dilah gơs bơta tòmdră hala bơta ò dòn bơr Yàng Jehôwa gen bañ lòi bol hi in kis tòm ngai do.

²³Dilah bol hi bơt dô nơm cơnòng duh khoai is bol hi in nàng sang lòi Yàng Jehôwa; hala dilah bol hi lơh behơ̆ nàng ơn phan duh khoai chu pơrguc, hala ơn phan duh khoai mơ kòi mbo, hala ơn phan duh khoai ring lơngai hơđang hơ̆, gen dan să tòm Yàng Jehôwa lơh glài bol hi.

²⁴Ò di behơ̆ ò, bol hi lơh bơta hơ̆ la tài bơh bol hi rngòt tòm ngai tơnơ̆ ală kòn sau oh mi dê rơp đơs mơ kòn sau bol hi lah: ‘Ñchi bơta bol mê neh lơh gơwèt mơ Jehôwa Yàng Tom Trồ Israel dê taih?

²⁵Yàng Jehôwa neh ai hiòng Jordan lơh gơs nhàr digùl bol hi mơ bol mê. Ơ kòn sau Ruben, kòn sau Gat, bol mê ò gơs pơnah lơi tòm Yàng Jehôwa ò.’ Behơ̆ ală kòn sau oh mi dê rơp lơh ală kòn sau bol hi dê ò gam duh khoai Yàng Jehôwa.

²⁶Tài bơh hơ̆ tàng bol hi neh đơs lah: ‘Bol he bơt tĕ dô nơm cơnòng duh khoai, ò di nàng ơn phan duh khoai chu pơrguc hala ơn ală phan ơn duh khoai.’

²⁷Mơya, hơ̆ la nàng lơh cơng digùl bol hi mơ oh mi, digùl ală kòn sau tòm ală rài tơnơ̆ lah bol hi rơp duh khoai Yàng Jehôwa mơ ơn phan duh khoai chu pơrguc, phan ơn duh khoai mơ phan ơn duh khoai ring lơngai tòm hìu duh khoai Kơnràñ dê. Gen tòm ngai tơnơ̆ ală kòn sau oh mi dê rơp ò tŭ lơi đơs mơ ală kòn sau bol hi dê lah: ‘Bol mê ò gơs pơnah lơi tòm Yàng Jehôwa.’

²⁸Mơ bol hi đơs lah: ‘Dilah tŭ lơi bol khai đơs bơta hơ̆ mơ bol hi hala mơ kòn sau bol hi dê, gen bol hi rơp ho lah: Sền tĕ rùp să cơnòng duh khoai Yàng Jehôwa dê, mơ ồng pàng bol hi neh bơt, hơ̆ ò di bơt nàng ơn phan duh khoai chu pơrguc hala nàng ơn phan ơn duh khoai ò, mơya nàng lơh gơs dô nơm phan lơh cơng digùl bol hi mơ oh mi.’

²⁹Bol hi ò gơs tŭ lơi kòñ tòmdră mơ Yàng Jehôwa mơ sang lòi Kơnràñ tòm ngai do mơ bơt dô nơm cơnòng duh khoai ndai nàng ơn phan duh khoai chu pơrguc, ơn phan ơn duh khoai mơ kòi mbo, hala ơn phan ơn duh khoai, rlau mơ cơnòng duh khoai Jehôwa Yàng Tom Trồ bol he dê ơn di đap Hìu Ing Duh Khoai Kơnràñ dê.”

³⁰Tòm tŭ cau gơnoar ơn phan duh khoai Phineas, ală cau kwang at bồ mpồl jơnum, mơ ală cau at bồ ală mpồl Israel kơno jơnau cau Ruben, cau Gat, mơ cau Manase đơs, gen gơlơh niam nùs bol khai.

³¹Gen Phineas, kòn klau cau gơnoar ơn phan duh khoai Eleajar đơs mơ cau Ruben, cau Gat, mơ cau Manase lah: “Ngai do bol hi git lah Yàng Jehôwa ơm bal mơ bol he, tài bơh oh mi ò lơh dô bă ò dòn song gơwèt mơ Yàng Jehôwa tòm bơta do; behơ̆ oh mi neh dong làng bol Israel klàs bơh di tê Yàng Jehôwa.”

³²Gen Phineas, kòn klau cau gơnoar ơn phan duh khoai Eleajar, bal mơ ală cau kwang at bồ lik bơh bơta pơjum mơ cau Ruben, mơ cau Gat tòm Galaat, rê wơl hơ Kanaan, mơ yal wơl làng bol Israel in ală bơta neh gơlik gơs.

³³Bol khai yal wơl ală jơnau yal niam nùs cau Israel mơ jòng ro Yàng Tom Trồ. Mơ bol khai ò đơs bơh bơta tòmlơh tai nàng tơnroh ù tiah cau Ruben mơ cau Gat ơm.

³⁴Behơ̆ cau Ruben mơ cau Gat sơnđan cơnòng duh khoai hơ̆ la: “Dô bơta Lơh Cơng digùl bol hi mơ Jehôwa la Yàng Tom Trồ.”