Read koho Jôsue 4 Bible Online

Jôsue 4 - koho bible

Jôsue 4

¹Tòm tŭ jơh làng bol neh tiă hiòng Jordan rau, gen Yàng Jehôwa đơs mơ Jôsue lah:

²“Sac rwah tĕ jơt bàr nă cau klau bơh digùl làng bol, kòp jơi bơtiàn dô nă,

³mơ sồr bol khai lah: ‘Ai tĕ jơt bàr pơnai lŭ bơh digùl hiòng Jordan, di tiah ală cau gơnoar ơn phan duh khoai neh ntào, mơ cèng gơ bal mơ mê, ơn gơ di tiah mơ bol mê rơp bơtào sàl mang do.’”

⁴Behơ̆ Jôsue hòi jơt bàr nă cau klau neh geh sac rwah bơh di làng bol Israel, kòp jơi bơtiàn dô nă,

⁵mơ đơs mơ bol khai lah: “Lòt gan tĕ di đap Đài Bơta Ho Bal Jehôwa Yàng Tom Trồ bol mê dê digùl hiòng Jordan. Kòp nă bol mê tui tĕ dô pơnai lŭ hơđang pơnì, dô pơnai lŭ kòp jơi bơtiàn làng bol Israel dê,

⁶nàng lơh dô nơm tềl digùl bol mê. Tòm ngai tơnơ̆, tòm tŭ kòn sau bol mê dê lùp bol mê lah: ‘Ală pơnai lŭ do gơs jơnau gơtha lơi taih?’

⁷Gen bol mê rơp ho bol khai lah dà hiòng Jordan gơkòl cah bàr đah di đap Đài Bơta Ho Bal Yàng Jehôwa dê. Tòm tŭ Đài Bơta Ho Bal tiă gan hiòng Jordan, gen dà hiòng gơkòl cah bàr đah. Ală pơnai lŭ do rơp lơh Israel in gơs dô bơta kah kirsơnre gam sùm sùm.”

⁸Behơ̆ làng bol Israel lơh jat jơnau sồr Jôsue dê. Bol khai tă jơt bàr pơnai lŭ bơh digùl hiòng Jordan, jat be khà jơi bơtiàn làng bol Israel dê, be Yàng Jehôwa neh sồr Jôsue mơ cèng gơ tus di tiah bơtào sàl mơ ơn gơ tềng hơ̆, jat be jơnau Yàng Jehôwa neh sồr Jôsue.

⁹(Jôsue rơndap jơt bàr pơnai lŭ neh tă bơh digùl hiòng Jordan, di tiah jơng ală cau gơnoar ơn phan duh khoai tùng Đài Bơta Ho Bal neh ntào. Ală lŭ hơ̆ gam tềng hơ̆ jơl tus di ngai do.)

¹⁰Ală cau gơnoar ơn phan duh khoai tùng Đài Bơta Ho Bal neh ơm digùl hiòng Jordan jơl tus di tŭ làng bol neh lơh sir jơh ală bơta mơ Yàng Jehôwa neh sồr Jôsue yal wơl làng bol in, jat jơh ală bơta Môise neh nting sồr Jôsue. Làng bol tiă hiòng sơrbac sơrbang.

¹¹Tòm tŭ jơh làng bol neh tiă gan hiòng rau, gen Đài Bơta Ho Bal Yàng Jehôwa dê mơ ală cau gơnoar ơn phan duh khoai kung lòt gan di đap làng bol.

¹²Cau Ruben, cau Gat mơ nggùl jơi bơtiàn cau Manase at phan tòmlơh mơ tiă hiòng di đap làng bol Israel, jat be Môise neh nting sồr bol khai.

¹³Gơs pơgap poan jơt rbô nă cau at phan tòmlơh tiă hiòng di đap Yàng Jehôwa tus hơ ƀlàng ring Jerikô nàng tòmlơh.

¹⁴Tòm ngai hơ̆ Yàng Jehôwa yò tơngguh Jôsue di đap jơh làng bol Israel mơ bol khai ki ngàm di Jôsue, be bol khai neh ki ngàm di Môise tòm jơh rài kis khai dê.

¹⁵Gen Yàng Jehôwa đơs mơ Jôsue lah:

¹⁶“Sồr tĕ ală cau gơnoar ơn phan duh khoai tùng Đài Bơta Ho Bal guh bơh di hiòng Jordan.”

¹⁷Behơ̆ Jôsue sồr ală cau gơnoar ơn phan duh khoai lah: “Guh tĕ bơh di hiòng Jordan.”

¹⁸Gen ală cau gơnoar ơn phan duh khoai tùng Đài Bơta Ho Bal Yàng Jehôwa dê guh bơh hiòng. Tòm tŭ mpàng jơng bol khai dê jă hơđang ù rañ rsơh, gen dà hiòng Jordan gơhòr rê wơl hơ tiah yau gơ dê mơ hòr bam ngơr wơl jơh ală đah be lài.

¹⁹Tòm ngai jơt kơnhai dùl, làng bol guh bơh hiòng Jordan mơ bol khai bơtào sàl tòm Gilgal di nhàr đah mattơngai lik ƀòn Jerikô dê.

²⁰Jơt bàr pơnai lŭ mơ bol khai neh tă bơh hiòng Jordan, gen Jôsue neh bơtào tòm Gilgal.

²¹Khai đơs mơ làng bol Israel lah: “Tòm ngai rơp tus, tŭ kòn sau bol mê lùp bèp bol khai lah: ‘Ală lŭ do gơs jơnau gơtha lơi taih?’

²²Gen bol mê yal tĕ bol khai in lah: ‘Làng bol Israel neh tiă hiòng Jordan hơđang ù rañ rsơh.’

²³Bơh Jehôwa Yàng Tom Trồ bol mê dê neh lơh soat dà hiòng Jordan bol mê in jơl tus di tŭ bol mê neh tiă rau. Jehôwa Yàng Tom Trồ bol mê dê neh lơh hiòng Jordan kung be Kơnràñ neh lơh mơ Dàlềng Pơrhê, hơ̆ la Kơnràñ lơh rañ rsơh jơl tus di tŭ bol he neh tiă gan rau.

²⁴Behơ̆ tồ jơh ală làng bol tòm dunnia in git lah tê Yàng Jehôwa dê gơs gơnoar dờng, mơ tồ bol mê in duh rngòt di Jehôwa Yàng Tom Trồ bol mê dê sùm sùm.”