Read koho Jôsue 5 Bible Online

Jôsue 5 - koho bible

Jôsue 5

¹Tòm tŭ jơh ală bơtau làng bol Amôr ơm đah mattơngai mut hiòng Jordan dê, bal mơ jơh ală bơtau cau Kanaan ơm rò gah dàlềng, kơno bơh bơta Yàng Jehôwa neh lơh rañ rsơh dà hiòng Jordan di đap làng bol Israel jơl tus di tŭ bol khai neh tiă hiòng, gen ală cau bơtau hơ̆ gơdô nùs jơh, mơ hwềng nùs tòm bol khai ò gam tai, tài bơh làng bol Israel.

²Tŭ hơ̆ Yàng Jehôwa đơs mơ Jôsue lah: “Lơh tĕ pềs mơ lŭ tơrneh, mơ siat gơltau làng bol Israel in dơ̆ bàr.”

³Gen Jôsue lơh pềs mơ lŭ tơrneh siat gơltau làng bol Israel tòm Gibea Haralôt.

⁴Jôsue neh siat gơltau làng bol in la tài bơh bơta do: Jơh ală cau klau tòm làng bol neh lik bơh di lơgar Ejiptơ la ală cau ling jak tòmlơh, neh chơt tòm tŭ lòt gùng tòm ƀlàng ngềt ngơt tơnơ̆ mơ tŭ neh lik bơh lơgar Ejiptơ.

⁵Bulah jơh làng bol lik bơh lơgar Ejiptơ neh siat gơltau rau; mơya jơh ală cau neh deh tòm tŭ lòt gùng tòm ƀlàng bràs, tơnơ̆ mơ tŭ lik bơh lơgar Ejiptơ, gen òhềt siat gơltau.

⁶Làng bol Israel neh lòt gùng poan jơt nam tòm ƀlàng ngềt ngơt jơl tus di tŭ jơh ală cau klau la cau ling lik bơh lơgar Ejiptơ neh chơt jơh, tài bơh bol khai ò dòn bơr Yàng Jehôwa. Bơh Yàng Jehôwa neh srat să ho nền mơ bol khai lah, Kơnràñ ò ai bol khai in sền gŏ lơgar mơ Kơnràñ neh srat să ho nền mơ ồng pàng bol khai dê la rơp ai bol he in, hơ̆ la lơgar hòr dà toh mơ dà lơwe.

⁷Gen tàng Kơnràñ neh bơtào tơngguh kòn sau bol khai nàng ala bol khai in. Hơ̆ la ală kòn sau do mơ Jôsue neh siat gơltau, tài bơh bol khai òhềt siat gơltau tòm tŭ lòt gùng.

⁸Tòm tŭ jơh làng bol neh lơh sir bơta siat gơltau rau, gen bol khai ơm tòm sàl bol khai dê jơl tus di tŭ bol khai geh bòi.

⁹Tŭ hơ̆ Yàng Jehôwa đơs mơ Jôsue lah: “Ngai do Añ neh tă tơlik bơh di bol mê bơta ƀàssìl lơgar Ejiptơ dê.” Gen tàng cau sơnđan tiah hơ̆ la Gilgal jơl tus di ngai do.

¹⁰Làng bol Israel neh bơtào sàl tòm Gilgal, bol khai prap gàr bơta pơjum sa lòt gan tòm ƀlàng ring Jerikô, tòm mho ngai jơt poan kơnhai hơ̆.

¹¹Ngai tơnơ̆ mơ ngai pơjum sa Lòt Gan, ngai hơ̆ bol khai sa phan gơlik bơh tòm lơgar, piang lă ò gơs kañ mơ gar ceh.

¹²Mana dơh wơl tòm ngai bol khai neh sa phan gơlik bơh ù tiah, mơ làng bol Israel ò gam gơs mana tai, bol khai neh sa phan tòm lơgar Kanaan tòm nam hơ̆.

¹³Tòm tŭ Jôsue ơm rềp di ƀòn Jerikô, khai pò mat mơ sền, gen khai gŏ dô nă cau klau at đào tòm tê ntào di đap khai. Jôsue lòt tus hơ khai mơ lùp lah: “Mê la cau bal mơ bol hi hala cau bal mơ cau sò tơm bol hi dê taih?”

¹⁴Khai ho lah: “Ò bal mơ đah lơi, tŭ do añ tus lơh gơs cau at bồ mpồl ling Yàng Jehôwa dê.” Gen Jôsue tơmbic să blup mat di ù, duh khoai mơ lùp lah: “Ơ Yàng añ jê, ñchi jơnau Yàng sồr cau duh broă Kơnràñ dê taih?”

¹⁵Cau at bồ mpồl ling Yàng Jehôwa dê đơs mơ Jôsue lah: “Hồ tĕ khŏ bơh di jơng mê, tài bơh tiah mê ntào la tiah sàng goh.” Gen Jôsue lơh behơ̆.