Read koho Jôsue 7 Bible Online

Jôsue 7 - koho bible

Jôsue 7

¹Mơya làng bol Israel neh tìs glài ò dòn song gơwèt mơ ală phan kòl tơnroh; Akan kòn klau Karmi, sau Japdi, se Jerah, gơrê bal mơ jơi bơtiàn Juda, neh ai dô êt phan tơnroh hơ̆; mơ bơta gơjrañ Yàng Jehôwa dê gơhào tòmdră mơ làng bol Israel.

²Jôsue sồr cau lòt bơh Jerikô tus hơ Ahi rềp Bet Aben đah mattơngai lik Betel dê, mơ đơs mơ bol khai lah: “Guh tĕ sền òm ù tiah hơ̆.” Gen ală cau hơ̆ guh sền òm ƀòn Ahi.

³Tòm tŭ bol khai rê wơl hơ Jôsue gen yal lah: “Ò càng jơh làng bol guh hơ Ahi, mìng bàr hala pe rbô nă cau klau lơm pal lòt nàng brồ lơh ƀòn hơ̆; tài bơh bol khai gơs mìng dô êt cau lơm ơm tềng hơ̆, bañ lơh jơh làng bol in bòl glar guh tềng hơ̆.”

⁴Behơ̆, pơgap pe rbô nă cau tòm làng bol neh guh tềng hơ̆; mơ bol khai ntoat dô bơh di đap cau Ahi.

⁵Cau Ahi tơnchơt pơgap pe jơt prau nă cau tòm bol khai, mơ ting jat bol khai bơh đah bơdìh mpồng ƀòn jơl tus hơ Sebarim, mơ tơnchơt bol khai tòm tŭ mù kơh. Gen nùs làng bol lề lac kung be dà.

⁶Gen Jôsue crè ào khai mơ tơmbic să blup mat tòm ù di đap Đài Yàng Jehôwa dê jơl tus mho; khai bal mơ ală cau kwang kra Israel dê; mơ bol khai rsìh thul hơđang bồ bol khai dê.

⁷Gen Jôsue đơs lah: “Ơ Jehôwa Yàng Tom Trồ, ñchi bơh tài Kơnràñ neh cèng jơh làng bol do tiă hiòng Jordan nàng jào bol hi tòm tê làng bol Amôr tơnroh bol hi taih? Digơlan niam rlau bol hi neh lơh nền ơm wơl đah ne hiòng Jordan!

⁸Ơ Yàng Jehôwa, ñchi añ rgơi đơs tòm tŭ cau Israel neh wèt ngkòi bol khai di đap cau sò tơm bol khai dê taih?

⁹Làng bol Kanaan mơ jơh ală làng bol ơm tòm lơgar rơp kơno bơh ală bơta hơ̆, mơ bol khai rơp gơrwàng bol hi mơ tơnroh sơnđan bol hi bơh di ù; gen ñchi Kơnràñ rơp lơh mơ sơnđan dờng Kơnràñ dê taih?”

¹⁰Yàng Jehôwa đơs mơ Jôsue lah: “Ñă tĕ, ñchi mê lơh blup mat di ù behơ̆ taih?

¹¹Israel neh tìs glài; bol khai neh lơh tìs mơ bơta ho bal Añ jê mơ Añ neh sồr bol khai pal prap. Bol khai neh ai phan pal phi ơn; bol khai neh kơñau, neh lơh bơta blac pơrlồm mơ neh ơn ală phan hơ̆ bal mơ ală phan tòm bol khai dê.

¹²Gen tàng làng bol Israel ò rgơi ntào tòmdră di đap cau sò tơm bol khai dê. Bol khai wèt ngkòi di đap ală cau sò tơm bol khai dê, tài bơh bol khai neh gơlik gơs phan pal phi ơn nàng tơnroh să tòm bol khai dê. Añ rơp ò ơm bal mơ bol mê tai, dilah bol mê ò tơnroh phan pal phi ơn hơ̆ bơh digùl bol mê.

¹³Guh tĕ, lơh sàng goh làng bol in, mơ đơs mơ bol khai lah: ‘Bol mê lơh tĕ să tòm he sàng goh tòm ngai hìng, bơh do la jơnau Jehôwa Yàng Tom Trồ Israel dê đơs lah: “Ơ Israel, ală phan pal tơnroh gam ơm digùl bol mê: bol mê ò rgơi tòmdră jai mơ ală cau sò tơm bol mê dê jơl tus di tŭ bol mê neh tă sang ală phan pal tơnroh hơ̆ bơh digùl bol mê.”

¹⁴Gen tàng drim hìng kòp jơi bơtiàn bol mê rơp tơlik mat di đap Yàng Jehôwa, jơi bơtiàn lơi mơ Yàng Jehôwa sơnio gen kòp mpồl tòm jơi bơtiàn hơ̆ rơp lòt tus hơđap, mpồl lơi mơ Yàng Jehôwa sơnio, gen kòp nơm hìu nhă tòm mpồl hơ̆ pal lòt tus hơđap, mơ hìu nhă lơi mơ Yàng Jehôwa sơnio, gen kòp nă cau klau tòm hìu nhă hơ̆ pal lòt tus hơđap.

¹⁵Cau lơi kòl sơnio neh gơs ală phan pal tơnroh gen rơp kong chu tòm ồs bal mơ jơh ală phan gơrê bal mơ khai, tài bơh khai neh lơh tìs mơ bơta ho bal Yàng Jehôwa dê, mơ neh lơh dô bơta tràl sơrbil tòm Israel.’”

¹⁶Behơ̆ Jôsue guh gòñ bơh drim, khai sồr kòp jơi bơtiàn Israel lòt tus hơđap, mơ jơi bơtiàn Juda kòl sơnio.

¹⁷Kòp mpồl tòm jơi bơtiàn Juda lòt tus hơđap, mơ mpồl Jerah kòl sơnio. Kòp hìu nhă tòm mpồl Jerah lòt tus hơđap, mơ hìu nhă Japdi kòl sơnio.

¹⁸Jôsue sồr kòp nă cau klau tòm hìu nhă Japdi lòt tus hơđap, gen Akan kòn klau Karmi, sau Japdi, se Jerah tòm jơi bơtiàn Juda, kòl sơnio.

¹⁹Gen Jôsue đơs mơ Akan lah: “Ơ kòn klau añ jê, lơh gơklŏ tĕ Jehôwa Yàng Tom Trồ Israel dê, mơ yal glài tĕ mơ Kơnràñ; tŭ do yal tĕ añ in ñchi mê neh lơh, bañ pồn bơta hơ̆ bơh di añ.”

²⁰Mơ Akan ho lah: “Ngan, añ la cau neh tìs glài mơ Jehôwa Yàng Tom Trồ Israel dê, mơ do la bơta añ neh lơh:

²¹Tòm tŭ añ gŏ tòm phan phà kup gơs dô nơm ào jrùh hàng mơnĕ bơh Sinar, bàr rhiang sieklơ priă, mơ dô pơnai màh kơnjơ̆ pram jơt sieklơ, añ neh hàm kòñ ală phan hơ̆ mơ neh ai gơ. Tŭ do ală phan hơ̆ neh pồn tòm ù tòm dơlam sàl añ jê, bal mơ priă ơm hơđơm.”

²²Behơ̆ Jôsue sồr cau lòt mơ bol khai ntoat tus hơ sàl, gŏ ală phan hơ̆ pồn tòm sàl khai dê bal mơ priă ơm hơđơm.

²³Bol khai ai ală phan hơ̆ bơh di sàl mơ cèng tus hơ Jôsue mơ jơh làng bol Israel, mơ bol khai ràng ală phan hơ̆ di đap Yàng Jehôwa.

²⁴Gen Jôsue mơ jơh Israel kup Akan la kòn sau Jerah bal mơ priă, ào jrùh, pơnai màh, ală kòn klau mơ ală kòn ùr khai dê, kơnrồ, alàng mơ belàt khai dê, sàl khai dê mơ jơh ală phan khai gơs mơ cèng tus hơ Thòng Akôr.

²⁵Jôsue đơs lah: “Ñchi bơh tài mê cèng bơta bòl glar hơđang bol hi taih? Yàng Jehôwa rơp cèng bơta bòl glar hơđang mê tòm ngai do.” Gen jơh Israel cơm lŭ tơnchơt khai, mơ chu bol khai tòm ồs, sơrbì lŭ hơđang bol khai.

²⁶Mơ rơndap lŭ dô gơnru dờng hơđang ƀồc Akan, gam tus ngai do. Gen Yàng Jehôwa rài bơta gơjrañ duh hơng Kơnràñ dê. Gen tàng, tiah hơ̆ geh sơnđan la thòng Akôr jơl tus di ngai do.