Read koho II Tesalônika 3 Bible Online

II Tesalônika 3 - koho bible

II Tesalônika 3

¹Lồi tơnơ̆, ơ oh mi, hòi dan tĕ bol hi in, nàng jơnau Yàng dê sơlo ntoat tơngguh mơ geh àng gơklŏ kung be ơm digùl oh mi sơl.

²Mơ kung hòi dan mơ Yàng Tom Trồ tồ bol he in geh dong tă klàs di cau lơh ò bồ mơ iơh bơsak, bơh ò di jơh tơl nă gơs bơta dòn ò.

³Mơya Yàng la Bơtau dòn song, Kơnràñ rơp lơh oh mi in kơ̆ nền mơ sền gàr oh mi klàs di cau iơh bơsak.

⁴Đah pơnah oh mi gen bol hi dòn nền tòm Yàng lah oh mi gam lơh mơ rơp lơh ală broă bol hi nting sồr.

⁵Dan Yàng tề lam nùs oh mi dê tus hơ bơta kòñ gơboh Yàng Tom Trồ dê mơ bơta ơt ơl Bơtau Krist dê.

⁶Ơ oh mi, bol hi ai sơnđan Yàng Jesu Krist bol he dê mơ nting sồr oh mi pleh tĕ di oh mi lơi lơh lòt ală alai, ò lơh jat ală jơnau bơto sồr mơ bol khai neh dòp leng bơh di bol hi.

⁷Bơh să tòm oh mi git mbe pal đòm jat bol hi, bơh bol hi ò tŭ lơi lơh lòt ală alai digùl oh mi.

⁸Kung ò tŭ lơi sa gòi phan cau lơi dê, mơya ngai mơ mang lơh broă bòl glar nàng ò lơh pơnjê di cau lơi tòm oh mi.

⁹Hơ̆ ò di la tài bơh bol hi ò geh gơnoar, mơya hơ̆ la nàng lơh krơh oh mi in, tồ oh mi in đòm jat bol hi.

¹⁰Tòm tŭ bol hi ơm mơ oh mi gen kung neh nting sồr oh mi in lah: Dilah cau lơi ò bài lơh broă, gen kung ò geh gơnoar nàng sa sơl.

¹¹Bơh bol hi kơno tòm oh mi gơs cau lơh lòt ală alai, ò tŭ lơi lơh broă, mơya kòñ lơh be tòm tòm broă cau ndai dê.

¹²Bol hi ai sơnđan Yàng Jesu Krist nting sồr mơ bơto tơngkah ală cau hơ̆ pal ơm mŏ mŏ mơ lơh broă, mơ sa piang tê tòm he lơh.

¹³Ơ oh mi, oh mi bañ ruc wơl tòm bơta lơh broă niam.

¹⁴Dilah cau lơi ò dòn jat jơnau bol hi đơs tòm sră pơyoa do, gen git tĕ cau hơ̆, bañ tòmsòr mơ khai, tồ khai in git ƀàssìl ƀàsso.

¹⁵Bulah behơ̆ bañ sền cau hơ̆ be cau sò tơm, mơya bơto tơngkah khai be oh mi sơl.

¹⁶Dan să tòm Yàng la Bơtau ai bơta lơngap lơngai sùm sùm tòm jơh ală bơta. Dan Yàng ơm bal mơ jơh tơl nă oh mi.

¹⁷Tê tòm añ la Pol cih jơnau còp să oh mi, hơ̆ la tềl cih tòm kòp nơm sră pơyoa añ jê; bơta cih añ jê la behơ̆.

¹⁸Dan bơta nđàc Yàng Jesu Krist bol he dê ơm mơ jơh tơl nă oh mi.