Read koho I Timôthe 4 Bible Online

I Timôthe 4 - koho bible

I Timôthe 4

¹Yàng Hwềng yal loh làng lah tòm tŭ tơngai lồi dut gơs cau ƀà rơp sang lòi bơta dòn mơ iat ală cà pơrlồm ơniai, mơ iat bơta bơto sồr gùng duh khoai cà dê,

²bơh bơta ma blac cau đơs blac dê, ma blac cau gơs nùs tồr tul kră.

³Bol khai bơkơŭ lap klau tòmbau ùr, mơ sồr wèr ală phan sa Yàng Tom Trồ neh crơng gơs, ai cau dòn mơ git jơnau song in ưnngài mơ dòp ngui.

⁴Bơh jơh ală phan Yàng Tom Trồ neh crơng gơs la niam lơm, ò gơs dô nơm phan lơi pal sang ò, mìng he git ưnngài mơ dòp ngui,

⁵bơh kơnòm di jơnau Yàng Tom Trồ mơ jơnau hòi dan tàng phan hơ̆ gơlik gơs sàng goh.

⁶Dilah mê tơngkah ală bơta hơ̆ oh mi in, gen mê la cau duh broă niam Yàng Krist Jesu dê, geh ròng bơh ală jơnau bơta dòn dê mơ bơh bơta bơto sồr niam mơ mê neh jat.

⁷Sang tĕ ală jơnau gơlềng gơlàng jat dunnia mơ jơnau bơceh is ală mò kra dê, mơya bơtê is tĕ bơh bơta duh rngòt.

⁸Bơh bơta bơtê lơh pràn să jan in gen gơs kwơ dô êt lơm, ai bơta duh rngòt gơs kwơ tòm jơh ală bơta, bơh neh gơs jơnau ho pơgon bơh bơta kis tòm rài do mơ tòm rài tơnơ̆ sơl.

⁹Hơ̆ la jơnau nền cê ngan, pal dòn dòp wil tơl.

¹⁰Kung bơh hơ̆ mơ bol he kong bòl glar lơh broă mơ tòmlơh, bơh bol he neh ơn nùs gơn kơnòm di Yàng Tom Trồ gam kis sùm, la Yàng Dong Klàs jơh ală cau dê, sơnròp ngan la ală cau dòn dê.

¹¹Hơ̆ la bơta mê pal tơngkah mơ bơto sồr.

¹²Bañ lòi cau lơi dơñŏ tơnhial di mê tài bơh mê gam kơnòm să, mơya pal ai tĕ jơnau đơs, bơta lơh lòt, bơta kòñ gơboh, bơta dòn mơ bơta sàng goh nàng lơh krơh ală cau dòn in.

¹³Ngac ngar tĕ sền Sră Goh tòm tŭ pơjum bal, bơto tơngkah mơ bơto sồr jơl tus di tŭ añ tus.

¹⁴Bañ sang lòi bơta nđàc tòm mê, la bơta nđàc kơnòm di jơnau gơnoar hwơr, mơ bơta ơn tê mpồl cau kra dê neh ai mê in.

¹⁵Jơh nùs tĕ lơh ală broă hơ̆ mơ jơh nùs ngac ngar tòm ală bơta hơ̆, tồ bơta ntoat tơngguh mê dê geh yal tơlik jơh tơl nă cau in.

¹⁶Kơrmap gàr tĕ să tòm mê mơ bơta bơto sồr mê dê; pal kơ̆ wền tĕ tòm ală bơta hơ̆, tài bơh lơh behơ̆ gen rơp dong klàs să tòm mê bal mơ ală cau iat mê sơl.