Read koho I Timôthe 5 Bible Online

I Timôthe 5 - koho bible

I Timôthe 5

¹Bañ lah pơrhơng kơnjơ̆ cau kra, mơya bơto tơngkah tĕ khai be bèp; ai cau pơnu gen be oh mi;

²cau ùr jòng sơnam kung be mè; cau ơruh be ruh lŏ, mơ pal gơs sàng goh tòm jơh ală bơta.

³Ki ngàm tĕ di cau ùr bơnrau ngan la ùr bơnrau.

⁴Mơya dilah cau ùr bơnrau lơi gơs kòn hala sau, gen sơnròp ngan pal lòi bol khai bơtê lơh bơta niam gơwèt mơ hìu nhă tòm khai dê mơ dong kòl wơl mè bèp khai dê, bơh bơta hơ̆ la niam mơ geh dòp di đap Yàng Tom Trồ.

⁵Cau ngan la ùr bơnrau mơ ơm is dô nă khai gen neh gơs nùs gơn kơnòm di Yàng Tom Trồ, ngai mơ mang kư̆ hòi dan, rac dan mơ Yàng.

⁶Mơya cau ùr bơnrau lơi kòñ kơnhơl gơlềng gơlàng, gen bulah kis mơya kung be chơt.

⁷Ai tĕ ală bơta hơ̆ nàng bơto kràñ cê bol khai in, tồ bol khai in ò gơs tiah geh lah pơrhơng.

⁸Dilah gơs cau lơi ò sền gàr gơp jơi he, lài ngan la cau tòm hìu nhă he, gen cau hơ̆ neh pơndang sang bơta dòn, behơ̆ la iơh rlau mơ cau ò dòn.

⁹Tồ geh cih sơnđan tòm sră sơnđan mat cau ùr bơnrau, gen cau ùr bơnrau pal geh tơl prau jơt nam, mơ neh gơs mìng dô nă bau klau lơm,

¹⁰la cau ùr gơs pơnro niam bơh broă niam khai dê, kung be neh ròng kòn sau, git wă rò nac crih, rào jơng ală cau sàng goh, dong kòl cau rƀah dồn sa, mơ jơh nùs lơh tơl ală broă niam.

¹¹Mơya bañ dòp ală cau ùr bơnrau gam kơnòm să, tài bơh tòm tŭ poac mhàm chồl bơtrut bol khai sang lòi Bơtau Krist, gen bol khai kòñ jòi bau,

¹²mơ bol khai kong lơh nền glài tài bơh neh sang lòi jơnau ho pơgon bơh sơnròp.

¹³Rlau mơ hơ̆ bol khai mòng ơm gòi, lòt bơh hìu do nơu hơ hìu ne; ò di mìng bol khai ơm gòi lơm ò, mơya kung đơs ală jơnau gơtrềng gơtràng cok cek, lơh be tòm tòm broă cau ndai dê, mơ đơs ală bơta ò pal đơs sơl.

¹⁴Behơ̆ añ kòñ ală cau ùr bơnrau gam kơnòm să pal jòi bau, deh kòn mơ at bồ hìu he, tồ cau sò tơm in ò gơs kai nàng đơs iơh.

¹⁵Bơh gơs dô êt cau ùr bơnrau neh wèt jat cà Satan rau.

¹⁶Dilah cau ùr lơi la cau dòn jat Yàng gơs cau ùr bơnrau tòm hìu he, gen dong kòl tĕ bol khai, tồ ò lơh kơnjơ̆ Hìu Jum Goh in, nàng Hìu Jum Goh in rgơi dong kòl ală cau ngan la ùr bơnrau.

¹⁷Ală cau kwang kra lam bồ dô bă niam gen cau pal ki ngàm oă rlau tai, lài ngan la ală cau kong bòl glar tòm broă bơto jơnau Yàng mơ bơto sồr.

¹⁸Bơh Sră Goh đơs lah: “Mê bañ gla bơr kơnrồ tòm tŭ pơrjă kòi;” mơ “Cau lơh broă pal geh jền tơngai he dê.”

¹⁹Bañ dòp jơnau cau yă dô nă cau kwang kra lơi dilah ò gơs bàr hala pe nă cau lơh cơng.

²⁰Cau tìs glài, gen lah pơrhơng tĕ bol khai di đap jơh ală cau nàng lơh cau ndai in rngòt.

²¹Di đap Yàng Tom Trồ mơ Yàng Krist Jesu mơ ală cau gơnrơh neh geh sac rwah, añ bơto mê kràñ cê prap tĕ ală bơta hơ̆, bañ pin lài tòm dơngoh, lơh broă lơi kung bañ kơryơn đah lơi.

²²Bañ sơrbac sơrbang ơn tê hơđang cau lơi, bañ ƀư di broă tồi glài cau ndai dê, kơrmap tĕ să he sàng goh.

²³Tài bơh klung mê, mơ tài bơh mê òs kòp jê, gen bañ hùc mìng dà lơm, mơya kung ngui dô êt tơrnòm sơl.

²⁴Gơs tồi glài cau ƀà dê geh ràng tơlik loh làng mơ kong cau cahrña lài, gơs tồi glài cau ƀà dê rơp geh ràng tơlik tơnơ̆.

²⁵Kung behơ̆ sơl, gơs broă niam geh ràng tơlik loh làng, mơ kung gơs broă òhềt geh ràng tơlik, mơ tơnơ̆ wơl kung ò rgơi pồn ndơp sơl.