Read koho II Timôthe 1 Bible Online

II Timôthe 1 - koho bible

II Timôthe 1

¹Pol la cau gơnoar bơto dờng bơh Yàng Jesu Krist, jat nùs kòñ Yàng Tom Trồ dê, mơ jat jơnau ho pơgon bơh bơta kis tòm Yàng Krist Jesu,

²Pơyoa Timôthe in la kòn kòñ gơboh añ jê: Dan mê in geh bơta nđàc, bơta nđàc sơngit mơ bơta lơngap lơngai bơh Yàng Tom Trồ la Bèp, mơ bơh Yàng Krist Jesu la Yàng bol he dê.

³Añ ưnngài Yàng Tom Trồ la Bơtau añ duh broă mơ nùs tồr sàng goh, be ồng pàng añ neh lơh, bơh añ kah mê ò dơh ngai mơ mang tòm tŭ hòi dan.

⁴Bơh añ kah dà mat mê, gen jơh nùs kơp kòñ tìp mat mê tồ geh bềng nùs hòn chò.

⁵Añ kah bơta dòn song ngan ơm tòm mê, la bơta dòn lài neh ơm tòm Lôit mò mê, mơ tòm Ơnit mè mê dê, añ dòn nền ngan lah gơ kung ơm tòm mê sơl.

⁶Tài bơh hơ̆, añ tơngkah mê tơrjik tĕ wơl bơta nđàc ai gòi Yàng Tom Trồ dê, la bơta nđàc mê neh dòp leng bơh bơta ơn tê añ jê.

⁷Bơh Yàng Tom Trồ ò di ai bol he in hwềng nùs rngòt rngơt, mơya ai hwềng nùs pràn kơldang, kòñ gơboh mơ git kơrhia.

⁸Behơ̆ mê bañ ƀàssìl tòm tŭ lơh cơng bơh Yàng bol he dê, mơ bơta añ ơm jàm tài bơh Kơnràñ; mơya kơnòm tĕ dê gơnap gơnoar Yàng Tom Trồ nàng kong bòl glar bơh Jơnau Niam.

⁹Hơ̆ la Bơtau neh dong klàs bol he, neh hòi sac bol he mơ bơta hòi sac sàng goh, ò di jat broă lơh bol he dê, mơya jat nùs kòñ Kơnràñ neh lơh nền, mơ bơta nđàc neh ai bol he in tòm Yàng Krist Jesu lài mơ tŭ òhềt gơs trồ tiah,

¹⁰tŭ do geh ràng tơlik bơh bơta tơlik să Yàng Krist Jesu, la Yàng Dong Klàs bol he dê, Bơtau neh tơnroh bơta chơt, ngui Jơnau Niam ràng tơlik loh làng bơta kis mơ bơta ò ồm lề.

¹¹Bơh Jơnau Niam hơ̆ tàng añ neh geh pồ bơtào lơh gơs cau bơto Jơnau Niam, cau gơnoar bơto dờng mơ cau bơto;

¹²mơ bơh bơta hơ̆ tàng añ kong ală bơta bòl glar. Mơya añ ò gơs ƀàssìl, bơh git Bơtau mơ añ neh dòn rau, kung dòn nền ngan lah Bơtau hơ̆ rgơi sền gàr bơta añ neh jào Kơnràñ in jơl tus di ngai hơ̆.

¹³Ai tĕ bơta dòn mơ bơta kòñ gơboh tòm Yàng Krist Jesu nàng kơrmap gàr kơr sơnoa gùng duh khoai song ngan mơ mê neh bơtê bơh di añ.

¹⁴Kơnòm tĕ di Yàng Hwềng Goh ơm tòm bol he nàng kơrmap gàr bơta niam neh jào mê in rau.

¹⁵Mê git lah jơh ală cau ơm tòm lơgar Asi sang lòi añ; tòm mpồl hơ̆ gơs Phigelus mơ Hermôgen.

¹⁶Dan Yàng ai bơta kòñ nđàc hìu Ônesiphôr in, bơh khai oă dơ̆ lơh nùs añ in rài bòl, ò ƀàssìl bơh añ kòl kơt mơ che sreng,

¹⁷pơrlơ̆ wơl, tòm tŭ ơm tòm Rôma khai neh jơh nùs jòi añ, mơ bàn añ sơl.

¹⁸Dan Yàng ai khai in bơta kòñ nđàc Yàng dê tòm ngai hơ̆! Mê git loh lah tòm Ephesô khai neh duh broă añ in oă ngan.