Read koho II Timôthe 3 Bible Online

II Timôthe 3 - koho bible

II Timôthe 3

¹Git tĕ lah tòm ală ngai lồi dut rơp gơs ală tŭ tơngai bòl glar kalke.

²Bơh cau rơp kòñ gơboh di să tòm he, hàm hà jền priă, jòng să, pơnhừ să, bơrsèl tơnhial, ò dòn bơr mè bèp, ò kah bơta nđàc, ò sàng goh,

³ò gơs nùs nđàc, kalke gơsòc sòr wơl, jak đơs joh lah, ò git kơrhia, jàñ bơsak, ò gơboh di bơta niam,

⁴pơrlơ̆ dră di oh mi bơyô, mhar gơhào nùs, jòng is să he, kòñ gơboh bơta kơnhơl lềng rlau mơ bơta kòñ gơboh di Yàng Tom Trồ,

⁵đah bơdìh gơlơh be duh rngòt, mơya neh pơndang sang gơnap gơnoar bơta hơ̆ dê. Ală cau behơ̆ gen mê pleh tĕ ngài.

⁶Tòm mpồl bol khai gơs cau ƀà mut òm tòm ală hìu, kup bơklơn ală cau ùr gơla àñ bềng tồi glài, gơkòl ală bơta jat nùs hàm kòñ is chồl bơtrut,

⁷kư̆ bơtê sùm mơya ò gơs tŭ lơi rgơi git wă jơnau song.

⁸Bơh yau òr Jannes mơ Jamber tòmdră mơ Môise be lơi, gen ală cau do kung tòmdră mơ jơnau song behơ̆ sơl; nùs kơlôi bol khai dê ƀơ̆ iơh, bơta dòn bol khai dê ò kwơ.

⁹Mơya bol khai ò geh tòmdră tai, bơh bơta tùl gơla bol khai dê rơp geh ràng tơlik jơh tơl nă cau in, kung be bàr nă cau ne dê sơl.

¹⁰Mơya mê neh sền nề bơta añ bơto sồr, bơta lơh lòt, bơta kòñ jòi jat, bơta dòn, bơta kong ơt, bơta kòñ gơboh, bơta ơt ơl,

¹¹bơta kup kơryan, mơ bơta jê sồt bòl glar añ jê, la ală bơta neh gơtơntus di añ tòm Antiôt, Ikôni mơ Listrơ. Ală bơta kup kơryan hơ̆ añ neh kong lơm, mơya Yàng neh dong tă añ lik klàs jơh.

¹²Ngan, jơh tơl nă cau kòñ kis dô bă duh rngòt tòm Yàng Krist Jesu, gen rơp gơkòl kup kơryan.

¹³Mơya ală cau iơh bơsak mơ cau ma blac gen sơlo gơlik iơh tai, pơrlồm cau ndai mơ bol khai kung kòl cau ndai pơrlồm sơl.

¹⁴Mơya mê kư̆ ơm tĕ tòm ală bơta mê neh bơtê mơ neh dòn nền, bơh git mê neh bơtê ală bơta hơ̆ mơ ñcau,

¹⁵mơ bơh di tŭ mê gam dềt mê neh git Sră Goh rgơi lơh mê in gơlik gơs jak chài tồ geh dong klàs bơh bơta dòn tòm Yàng Krist Jesu.

¹⁶Jơh Sră Goh neh geh Yàng Tom Trồ khồm nhơm, mơ gơs kwơ nàng bơto sồr, bơto tơnggit, pơniam wơl, bơto cau tòm bơta song ring,

¹⁷tồ cau Yàng Tom Trồ dê geh wil tơl, mơ rcang sir wil tơl nàng lơh jơh ală broă niam.