Read koho II Timôthe 4 Bible Online

II Timôthe 4 - koho bible

II Timôthe 4

¹Di đap Yàng Tom Trồ mơ di đap Yàng Krist Jesu la Bơtau rơp cahrña cau kis mơ cau chơt, añ bơh bơta tơlik mat Kơnràñ dê mơ bơh lơgar Kơnràñ dê mơ bơto kràñ cê mê in lah:

²Bơto yal tĕ jơnau Yàng, bơto sùm bulah bơtoah hala ò bơtoah, bơto pơndòm, lah pơrhơng, chồl bơtrut, jơh nùs kong ơt tòm bơta bơto sồr.

³Bơh tŭ tơngai rơp tus mơ cau ò bài iat bơta bơto sồr jơnau song; mơya bơh bol khai kòñ iat jơnau bơkah tồr, gen rơp jat nùs hàm kòñ is he dê mơ pơjum ală cau bơto ơm gùt dar he,

⁴sềt tồr ò bài iat jơnau song, mơ wèt tồr hơ đah jơnau gơlềng gơlàng.

⁵Mơya mê git kơrhia tĕ tòm jơh ală bơta, kong bòl glar, lơh broă cau bơto yal Jơnau Niam dê, lơh dô bă wil tơl gơnoar broă mê dê.

⁶Bơh añ neh kòl tuh tơlik be phan pơdơng rau, mơ ngai sang rài añ jê mòr rềp rau.

⁷Añ neh tòmlơh bơta tòmlơh niam, añ neh ntoat sir bơta ntoat pơrlòng, añ neh prap gàr bơta dòn.

⁸Bơh do jơl hìng nau sơgơn bơtau bơta song ring neh prap lòi añ in; Yàng la Kwang Cahrña song ring rơp ai sơgơn hơ̆ añ in tòm ngai hơ̆, ò di mìng añ in lơm ò, mơya kung ai jơh ală cau kòñ gơboh di bơta tơlik mat Kơnràñ dê sơl.

⁹Pơnđơl tĕ să lòt tus mhar hơ añ;

¹⁰tài bơh Demas hàm kòñ rài do gen tàng neh sang lòi añ rau mơ neh lòt hơ Tesalônika. Kretsen lòt hơ Galati, ai Tit gen lòt hơ Dalmati.

¹¹Gơs mìng dô nă Luka lơm ơm mơ añ. Cèng tĕ Mak lòt bal mơ mê, bơh khai gơs kwơ ngan añ in tòm gơnoar broă.

¹²Añ neh sồr Ticikơ lòt hơ Ephesô.

¹³Tòm tŭ mê tus, cèng tĕ ào jrùh mơ añ neh lòi tòm hìu Katpus, ƀòn Trôas, bal mơ ală sră pơàr sơl, sơnròp ngan la ală dap sră mơ gơltau.

¹⁴Aleksandria la cau chài tiar kòng, neh lơh iơh di añ oă ngan; Yàng rơp sal wơl khai in jat be broă khai dê.

¹⁵Mê kung pal kơrhia tĕ di cau hơ̆, bơh khai jơh pràn tòmdră di jơnau bol he dê.

¹⁶Tòm tŭ añ tò să añ dơ̆ sơnròp, ò gơs cau lơi ơm dô đah bal mơ añ, jơh ală cau sang lòi añ lơm. Dan glài hơ̆ ò tuh hơđang bol khai!

¹⁷Mơya Yàng neh ơm dô đah bal mơ añ mơ bơtơl pràn añ in, tồ bơh añ mơ Jơnau Niam geh bơto yal wil tơl, nàng jơh ală cau làng bol bơdìh geh kơno; behơ̆ añ neh geh dong tă bơh di bơr klìu triă.

¹⁸Yàng rơp dong tă añ bơh di ală broă iơh bơsak, mơ dong klàs añ nàng mut tòm lơgar Kơnràñ dê hơđang trồ. Dan bơta gơklŏ gơrê hơ Kơnràñ sùm sùm ò lồi! Amen.

¹⁹Dan còp să Prissil mơ Akila bal mơ cau tòm hìu Ônesiphôrus.

²⁰Erastus ơm wơl tòm Kôrintô, ai Trôphimus gam kòp jê, añ lòi khai tòm Miletus.

²¹Mê pơnđơl tĕ să tus lài mơ kơnhai mrềt. Ơbulus, Puden, Linus, Claudia mơ jơh ală oh mi còp să mê.

²²Dan Yàng ơm bal mơ hwềng nùs mê dê. Dan bơta nđàc ơm bal mơ ală oh mi.