Read koho Tit 2 Bible Online

Tit 2 - koho bible

Tit 2

¹Mơya mê pal bơto ală bơta tòmpal mơ gùng duh khoai song.

²Tơngkah tĕ ală cau kra pal git kơrhia, kràñ cê, jak chài, ơm kơ̆ tòm bơta dòn, bơta kòñ gơboh mơ bơta ơt ơl.

³Ală mò kra kung behơ̆ sơl, pal lơh lòt jat bơta sàng goh, ò di đơs iơh, ò di lơh gơs dĭ tơrnòm alak dê, mơya pal lơh gơs cau bơto bơta niam,

⁴nàng bơto cau ùr kơnòm să git kòñ gơboh bau, gơboh kòn he dê,

⁵gơs nùs kràñ cê, ơm song mơ bau klau, rcang broă tòm hìu nhă, kơ̆ dơn, dòn duh bau klau, tồ jơnau Yàng Tom Trồ dê ò gơkòl cau đơs bơrsèl tơnhial.

⁶Kung pal bơto tơngkah ală cau klau kơnòm să lơh lòt dô bă git kơrhia.

⁷Tòm jơh ală bơta ai tĕ să tòm mê nàng lơh krơh bol khai in bơh broă niam, tòm bơta bơto sồr mê dê pal gơs sàng goh song ring, kràñ cê,

⁸Jơnau đơs di gùng mơ ò gơs tiah geh lah pơrhơng, tồ cau sò tơm in ƀàssìl, ò geh jơnau lơi đơs iơh di bol he.

⁹Bơto tơngkah tĕ ală cau dĭ gơna pal dòn duh cau tòm he, pal lơh niam nùs cau tòm he tòm jơh ală broă, bañ pơndang,

¹⁰bañ kơñau phan lơi, mơya pal yal tơlik nùs dòn song wil tơl, nàng tòm jơh ală bơta lơh jơnau Yàng Tom Trồ dê la Yàng Dong Klàs bol he dê geh gơklŏ.

¹¹Bơh bơta nđàc Yàng Tom Trồ dê ai bơta dong klàs jơh tơl nă cau in neh geh yal tơlik rau.

¹²Bơta nđàc hơ̆ bơto bol he pơndang sang tĕ bơta ò duh rngòt mơ nùs hàm kòñ is dunnia dê, mơ pal kis dô bă git kơrhia, song ring mơ duh rngòt tòm rài do,

¹³tòm tŭ kơp gơn bơta gơn kơnòm lơngai lơngò, la bơta tơlik mat dô bă gơklŏ Yàng Tom Trồ dờng dê mơ Yàng Dong Klàs bol he dê la Yàng Jesu Krist,

¹⁴la Bơtau neh phi să bơh bol he nàng tơwài bol he bơh jơh ală bơta tồi glài iơh bơsak, mơ bơh să tòm Kơnràñ mơ lơh sàng goh dô nơm làng bol gơrê hơ Kơnràñ, la làng bol gơs nùs ngac ngar tòm ală broă niam.

¹⁵Bơto tĕ ală bơta hơ̆, bơto tơngkah mơ lah pơrhơng dô bă gơs gơnoar wil tơl. Bañ lòi cau lơi sền òsơp di mê.