Read koho Philemôn 1 Bible Online

Philemôn 1 - koho bible

Philemôn 1

¹Pol, cau ơm jàm Yàng Krist Jesu dê, mơ Timôthe, oh mi bol he dê pơyoa Philemôn in, la cau kòñ gơboh mơ la cau bơyô lơh broă bal mơ bol hi,

²Mơ pơyoa Apphia in la ruh lŏ, Achippus la cau be cau ling dô mpồl bal mơ añ, mơ kung pơyoa Hìu Jum Goh in pơjum tòm hìu bi:

³Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp bol he dê, mơ bơh Yàng Jesu Krist.

⁴Añ òs sùm sùm ưnngài Yàng Tom Trồ añ jê, kòp dơ̆ añ kah hòi dan bi in,

⁵bơh añ kơno bơh nùs kòñ gơboh mơ bơta dòn bi dê gơwèt mơ Yàng Jesu, mơ gơwèt mơ jơh ală cau sàng goh.

⁶Añ hòi dan mơ Kơnràñ ai bơta gơtòmklac bal tòm bơta dòn bi dê mơ tơnggơs bơta git wă jơh ală bơta niam bol he geh tòm Bơtau Krist.

⁷Mơ tai, ơ bi, añ neh geh hòn chò mơ pơndòm pơniang oă ngan bơh nùs kòñ gơboh bi dê, tài bơh kơnòm di bi mơ nùs ală cau sàng goh neh geh rài bòl.

⁸Behơ̆ tàng, bulah añ gơs nùs khin cha ngan tòm Bơtau Krist mơ sồr bi lơh broă pal lơh,

⁹mơya tài bơh nùs kòñ gơboh chan añ rac dan la niam rlau. Mơ añ la Pol cau gơnoar ala mat Bơtau Krist dê, mơ tŭ do tài bơh Yàng Krist Jesu mơ kong ơm jàm.

¹⁰Behơ̆ añ rac dan mơ bi bơh Ônesim, la kòn klau tòm añ jê tòm Bơtau Krist, mơ tòm tŭ añ ơm jàm añ neh gơlik gơs bèp đah hwềng khai dê.

¹¹Lài òr khai ò gơs kwơ bi in, mơya tŭ do gơs kwơ bi in, mơ kung gơs kwơ añ in sơl.

¹²Añ sồr khai rê wơl hơ bi; hơ̆ la kung be pơyoa nùs tòm añ jê bi in sơl.

¹³Añ neh gơs nùs kòñ sồr khai ơm wơl mơ añ nàng khai ala bi duh broă añ in tòm tŭ añ kong ơm jàm tài bơh Jơnau Niam.

¹⁴Mơya añ ò bài lơh broă lơi mơ òhềt git nùs bi, tồ broă niam bi rơp lơh ò di la tài bơh rồn bơklơn, mơya la tài bơh nùs kòñ.

¹⁵Digơlan bơh bơta do tàng khai neh ơm ngài ing mơ bi nàng bi in dòp rò khai ơm sùm sùm,

¹⁶ò di sền be dĭ gơna tai ò, mơya sền màng rlau mơ dĭ gơna, sền be oh mi kòñ gơboh, sơnròp ngan la kòñ gơboh añ jê, tơ ài lah bi gen sơlo rlau tai, bơh pơnah đah poac să mơ pơnah tòm Yàng sơl.

¹⁷Behơ̆ dilah bi sền añ la oh mi bơyô bi dê, gen dòp rò tĕ khai kung be dòp rò să tòm añ sơl.

¹⁸Dilah khai neh lơh iơh di bi hala kòl dồs mơ bi phan lơi, gen kư̆ kòp tĕ hơ̆ la dồs añ jê.

¹⁹Añ Pol, tê tòm añ cih jơnau do: Añ rơp tơm bi in. Ai bi dồs mơ añ bơh să tòm bi, gen ò kòp.

²⁰Ngan, ơ bi, añ kơp kòñ bi lơh añ in hòn chò tòm Yàng, añ kơp kòñ bi lơh nùs añ in rài bòl tòm Bơtau Krist.

²¹Añ cih bi in bơh dòn nền lah bi òs dòn bơr, mơ git lah bi rơp lơh rlau mơ bơta añ neh đơs do.

²²Gam dô bơta tai, hơ̆ la rcang lài tĕ ơdŭ ơm añ in, bơh añ kơp kòñ lah kơnòm di oh mi hòi dan, gen añ rơp geh tus hơ oh mi.

²³Epapras la oh mi bơyô kong jàm bal mơ añ tòm Yàng Krist Jesu, khai còp să bi;

²⁴Mak, Aritakus, Demas mơ Luka, la oh mi bơyô lơh broă bal mơ añ, kung behơ̆ sơl.

²⁵Dan bơta nđàc Yàng Jesu Krist dê ơm mơ hwềng nùs oh mi dê.